نزف تصعب مجاراته

[[ مازن ]]

في حيرة من أمري

و الأخلاق قافلة اليوم , و الزكام زاد الطين بلّه , ماني قادر أفكّر

أحس رأسي بينفجر ><"

تعبت أضرب أخماس بأسداس ,


_



سؤال / هل الواسطة حلال ؟

سؤال ثاني / ليه أمورنا ما تمشي إلا بفيتامين واو ؟



حسبي الله و نعم الوكيل ,

[[ مازن ]]

شهيدٌ يسعفهُ شهيد , فيداويهِ شهيد , فيُشيّعهُ شهيد , فيصلي عليهِ شهيد فيدفنه شهيد ! *


_


أصبحت سوريا شهيدة ,

لأحدهم *

[[ مازن ]]

عبدالمجيد

بإنتظار بشارتك على أحرّ من الجمر ,

[[ مازن ]]

هذا المنشور له قصّة :

هل كتب الله لنا أن نقاتل مع عيسى عليه السلام ؟

و هو من صفحة أخوي و حبيبي المستشار الخاص / أحمد


في يوم من الأيام ,


كنت أتكلم مع أحمد عن صديقه : المهند - الله يشفيه و يعافيه و يردّه لأهله و لديرته بالسلامة -

جلسنا نسولف و كل شوي ندخل بسالفة و نطلع من سالفة ,

إلى إن قلت له أحمد فيه شيء ودي أقوله بس مدري كيف

( خفت يكون كلامي فيه نوع من التكهن >> برآ )



قلت له :

الحين الألعاب بشكل عام بآخر مرحلة تشتد المصاعب و و و إلخ

و أنا حاس إن ( يوم القيامة قرّب قرّب حيل , حاس إنه قريب منّا )


قال أحمد :

أنا حاس بنفس الأحساس و أحس بعد إننا بنقاتل مع عيسى - عليه السلام -

و صرت كل ما دخلت صفحة أحمد , أحس بإحساس مدري وش يبي


_



يوم القيامة بعلم الغيب , بس ربي من رحمته بالعباد سخّر لهم العلامات الصغرى

و الأيام هذي كثرت الفتن و كثر الهرج و المرج , و الله المستعان



_


اللهم أختم لنا بخير , و توفنا و أنت راضٍ عنّا

و أجعل اللهم الحياة زيادةً لنا في كل خير , و أجعل اللهم الموت راحةً لنا من كل شر

الله الله بالتوبة , فالموت خطّاف

و كفى بالموت واعظاً , اليوم نحن فوق الأرض و بكرة ممكن نكون تحتها

[[ مازن ]]

من أكثر الأمور إللي ممكن تسبب ( حالة إستنفار ببيتنا )

لما يضيع سلطان , أدري إنكم حفظتوا شكله و إسمه و سوالفه من كثر ما أتكلم عنه

هالمزيون اليوم ركب فوق دولاب المطبخ و إنبطح

و كان وقت العصر , و تو عبدالله و مالك ( أخواني بالإبتدائي ) , جايين من البقالة

وزعنا الأغراض علينا وكل واحد أخذ طلبه , و يجلس عبدالله ينادي سلطان

سلطااااااااان , سلطننا , سلووووووط , يا ولد إلخ , و لكن لا مجيب >> آهات لو سمحتوا

و نرسل مالك يدروه يمكن إنه فوق وما يسمعنا

و يجي يركض و يقول ما لقيته , شلون ما لقيته

طيب رح للحوش يمكن يلعب هناك ؟ و نفس الشيء قال ما لقيته والله ما أروح لأي مكان بجلس آكل

و نقوم كلنا ندوره و نعلن حالة الطواريء بالبيت

و نطلع للشارع و ندور و ندور و ندور و ندور و ندور و ندور و ندور >> خلاص

والله إن حتى جدتي تدوّر بالبيت و بالدواليب و بالمخازن و فوق و تحت و بالملحق بس ماله أثر

و ما خلينا بيت ما دقينا بابه شوفوا سلطان داخل يلعب مع بزرانكم أو لا ؟

و الله العظيم قبل آذان المغرب بعشر دقايق يمكن , و تدخل جدتي مع مرة جارنا للمطبخ للمره إللي مدري كم

إلا هو يرفع رأسه و يقول : ههههههههههه أنا هنا

و تصرخ عليه جاراتنا ذيك الصرخة إللي أتوقع والله أعلم بيتوب بعدها

و تتصل على رجلها و ينتشر الخبر بالحي إننا لقيناه فوق دولاب المطبخ


حسبي الله على عدوّه و على شيطانه كان ذي ثاني مره يسويها فينا

المره الأولى كان منخش بسريره و جاه النوم و نام و إحنا ندوره , هو نحيف و ديباجه ( غطاءه ) ثقيل

و يرتفع يعني مو كإن فيه أحد و نفس الحالة دقينا ناقوس الخطر بالحي و ندور تحت السرير بس ربي

ماكتب نرفع الغطاء << هالحادثة قبل كم شهر

و زعلت عليه يوم كامل ما لعبت معه و اليوم قلت له : ما راح ألعب معك إلا بعد إسبوع

قال يعني كم يوم ( ثو كذا بأثابعك ) رفع يدينه بوجهي , عديت 7 أصابع بيديه و قلت له , كذا


قال , يعني أنام و أقوم عدد كذا و تلعب معي


_

أصعب شيء ضياع البزر خاصةً لما تكون بمكان عام , تركض زي المجنون و تنسى الناس و تجلس تهابد و تنادي

و تدعي و و و و إلخ , , و إذا شفته جاء يبكي ضميته و نسيت كل العصبية

[[ مازن ]]

[ لَا يَرَوْنَ فِيهَا شَمْسًا وَلَا زَمْهَرِيرًا ]

اللهم اجمعنا بأحبابنا في الجنة ♥

[[ مازن ]]

جود , روان , ريماس , محمد , عزوز

اليوم طلعنا نتمشى و تمردنا على قوانين صالح

و هو للحين ما درى , بس دام مالك و عبدالله ماراحوا معنا , فلنبشر بالفتنة

[[ مازن ]]

بعد ما رجع صالح من المستشفى حول الساعة 11 و نص و قبل يجي نايف عشان يآخذ خواته

قال : مين حرّك سيارة عمر من مكانها ؟ ( عمر رايح للجبيل مع عيال عمي و موقف سيارته عند البيت )

طبعاً تم الأعتراف إن الجاني هو عبدالعزيز بتشجيع مني و من محمد

و صدر بحقنا العقاب اللازم

أنا و محمد منعنا من إستخدام السيارة لمدة شهر

( أصلاً ما يسمحون لي أسوق إلا داخل الحي , و ياليت لحالي لا , لازم يا عمتي أو جدتي معي )

أما إني آخذ السيارة و أجلس أفر فيها , هذا ممنوع ببيتنا منعاً باتاً


أما عبدالعزيز , تم سحب سيارة صالح القديمة منه , و بناءً على هذا فهو يا يروح مدرسته مشي

أو يشوف واحد من ربعه يوصله


_


تعبنا نشرح له إن كل مافي الموضوع رحنا للكورنيش تمشينا شوي و رجعنا , لا فحطنا ولا لقطنا ساهر

ولا قطعنا إشارة , بعدين عزوز بثالث ثانوي إللي بعمره متزوج و ينتظر مولوده بعد

مو مثله حتى سيارته سحبوها منه و أصلاً كان ممنوع يستخدمها إلا للمدرسة بس

بس مين يقنع صالح

والله يستر من عمر لا جاء بكرة وش بيعاقبنا بعد


بس بعد يبقى هذا أحسن يوم

[[ مازن ]]

اللهم إليك نشكو ضعفنا و قلة حيلتنا ، ونسألك بأنك المجيد المنتقم أن تقصم ظهر عصابات الأسد

كيف شئت و بما شئت إنك القادر على كل شيء


_


عذراً سوريا , فلا نملك سوى الدعاء ,

[[ مازن ]]

تعبان ><"

و صوتي أختفى بنسبة 90 % , إللي يجلس جنبي ما يسمعني

و أحس جسمي منهد , خمول , ما ودي أتحرك , الحمدلله على كل حال

أول ساعة بعد ما آخذ حبتين فيفادول , أحس بنشاط بس بعدين يروح مفعول الحبتين ><"


_


دعواتكم لي بشفاء حنجرتي بالقريب العاجل , ماني قادر أسولف ولا أهاوش ذذ

الظاهر الدور بالزكام بيمشي على البيت كله , و كل إسبوع بيسدح إثنين أو ثلاثة ><

[[ مازن ]]

يارب , إستودعناك سوريا

يارب , إستودعناك سوريا

يارب , إستودعناك سوريا


_


يالله , قهر قهر قهر قهر

أحس ودي أسوي لهم شيء ,

يارب , يارب , يارب , يارب يا كريم يا رحيم يا رحمن أنصر السورييّن على الطاغيّة و أعوانه , يارب

يا رب يا كريم أرنا فيهم عجائب قدرتك , يا رب أشف غليلنا بنصرك , ياكريم

يارب عجّل بنصرك الذي وعدت , يارب عجّل بنصرك الذي وعدت , يارب عجّل بنصرك الذي وعدت



_


ضيقة صدر

والله حالهم ما يسّر ,




يارب , ما نملك غير الدعاء , و أنت قلت و قولك حق ( إدعوني استجب لكم ) , فعجّل بنصرك يا كريم

[[ مازن ]]

عمر

تروح و ترجع بالسلامة ,

يارب يخلّص بيتنا بسرعه عشان ترتاح من الطريق رايح للحفر , راجع للدمام

الله يكتب أجرك و يوفقك و يكتب لك بكل خطوة سعادة و توفيق من رب العالمين



_


بس وش نسوّي إذا العمّال ما شافوا أحد عندهم ما يشتغلون

والله مرّه ما كان أحد فاضي يروح للحفر لمدة إسبوعين , رحنا ثالث إسبوع بالعيد إلا البيت زي ماهو

وجع يوجع شيطانهم كانهم معذبين عموّري

[[ مازن ]]

يالبيه بس

و أنا أقول ليه المعالي منّور , حسبي الله على من تسبب ببعدك عن المعالي

عدت و العود أحمد , يا روح أخوك و نبض قلبه


http://forum.ma3ali.net/t818179-6.html



أخوي الجامعي / عبدالله أبانمي - الرياض

يا بخت الرياض فيك يا خلّي




_

وكذلك صديقي الصدوق والشسمة ذا خلوق مازن :" ساحب عليه ينتظرني يالبيه ارسله رسالة خاصة والظاهر اقرب مالها بدق عليه ع الجوال اصرف واسرع ذذ

يالبيه بس يا سلمان

عادي فديتك خذ راحتك , بالنسبة لذاك الموضوع ماني مستعجل عليه

[[ مازن ]]

هل من علاج لأخي ؟!

http://forum.ma3ali.net/t849814.html#post13849115

[[ مازن ]]

أشتاق له بصمت , و الصمت موجع

[[ مازن ]]

و إللي يجلس بالمشّب ( بيت شعر بالحوش ) , مقابل للمنقل ( الوجار / مكان نشب فيه الحطب )

و يجلس يلعب بالملقاط و يحرك الحطب فوق تحت يمين يسار , ثم فجأة من الحماس يمسك الملقاط بيده

بالله عليكم مو إنسان فاهي

هذا قبل الصلاة أتفلسف على أخواني و ألعب بالملقاط و أنا أسولف إلا أمسك الطرف الحار منه

قسم بالله صرخت صرخه أتوقع سابع جار سمعوني , جدتي أول شيء جلست تسمي علي

يوم قلت لهم مسكت الملقاط صار وجهها كذا ( ) ,

أححح بالبداية قام يحرقني ثم بعدين خف , جدتي تقول خف الحرق لإن الجلد نضج

بس لو ما نضج كان ألمه أشد , الحين بكفي خطين

بس مع الماء يوجعني زيادة

_


تكفى يا ( أنا ) كافي فهاوة ,

[[ مازن ]]

غصباً عني أكرههم ><"

[[ مازن ]]

يارب , إرحم موتانا و موتى المسلمين

يارب , أرح قلبي بشفائه

يارب , إستودعتك عمر فأحفظه يا من لا تضيع ودائعه

يارب , سلطان ينسى سالفة الحفلة شوي

يارب , جدتي توافق أغيب بكرة


_


تصبحون على خير و راحة بال

[[ مازن ]]

لا لا لا غش غش غش

غبت عشان شيء بسويه , و حطيتها نومه من صلاة الفجر إلى قبل نص ساعة جدتي صحتني أفطر قبل الصلاة

راح غيابي على الفاضي , هذا جزاء إللي يغيب غصب عن جدته ما يتوفق بغيابه


_


اليوم بشوف حسّوني

و يمكن العصر نسوي حفلة سلطان أو بكرة , حسب المزاج , هي كلها كيكه و ورق عنب و بيبسي و بالونات

و إنشودة و نعزم خواتي و بزارين الجيران , و تصير الصالة حوسة و الكبار لهم قهوة حلا فطاير + إللي ذُكر فوق

و هديه عبارة عن كم حلاوه على لعبة لسلطان و بس , المشكلة مين فاضي يسويها

إممم من زمان ما سوينا حفلة ببيتنا , آخر مره سوتها أختي ( أم رند ) حفلة نجاح الصغار بالمزرعة

الله ييسّر و يكتب إللي فيه الخير

[[ مازن ]]

وسعر الكتاب 20 ريال .. ودي لو تدوره في المكتبات وتشتريه .. والله بفرح مررره لو قريته وأتمنى تكون بخير دايم .. وسلامي لجدتك وأخوانك وفي أمان الله

مدري وش أقول !!

أحبك و بس

إستودعتك خالق الدنيا و ما فيها