( الشبكة ) !

[العيطـــموس]

المتفق عليه أن الشبكة تطول البنت وأمها ، لكن ماذا عن أخواتها ووالدتها وجدات البنت ؟!

بعد مره وحده الجيران!!
العروس وبس حتى الأم ماتاخذ شئ>>أمي بزواجات خواتي ماخذت ولاشئ ليش الرجال يكد علينا!!
ويوم الملكه يكون عشاء بس على الرجال لأنه هو اللي فرحان وش علينا منه ويكون العشاء ببيت العروس
تكريم يعني للنسب الجديد
والهديه بيوم الزواج هذي أختي الكبيره
الثانيه تتطور شوي والهديه صارت قبل
المهر 40ألف وهي تجيب الذهب من مهرها هذا إذا باقي أحد يشتري ذهب

[[ مازن ]]

حسب إللي أعرفه من أخواني و خواتي , إن الملكه أو ( الشبكه عندكم ) , تكون بنفس يوم عقد القران ,

و الزوج يجيب لزوجته هديه عباره عن دبله + طقم ذهب + عطر أو أي شيء على ذوقه

و العشاء يكون ببيت العروس , و يكون مختصر جداً جداً , و ما عندنا صراحه فكرة إن نعطي أم العروس شيء ,

طبعاً قبلها بالتأكيد تكون الخطبه ثم الشوفه ثم إن صار نصيب يحددون موعد الملكه و بس ,

الله يوفقك و ييسر أمورك يالغالي ,

[(الفارس الملثم)]

المشاركة الأصلية كتبت بواسطة ( أبو عبدالله ) حنا ماعندنا شبكة وحفلة وخربطة .... بس ملكة ويوم الزواج يجيب لزوجته هدية طقم ذهب والا الماس والسلام وبعضهم ولا شي مهر وان تعصر جاب هدية ساعة

نفس عاداتنا بالضبط مافيه شي الزامي من طيب خاطر اذا بيجيب لها هديه وحتى ليلة العرس مافيه لاهدايا ولاشي يعطيها صباحيه من بكره وخلاص<مبلغ من المال

واعرف كثير شباب والله من ملك الى ان اعرس ماجاب لزوجته شي بس المهر والوجه من الوجه ابيض
وهذا يعتمد على عاداتنا لان المهر عندنا من 80 وانت طالع
غير الشقه والأثاث وحوسة العرس ولزوم انبساط الأهل بالقاعه ومستلزماتها

عني قدمت لزوجتي بأول لقاء بينا بعد الملكه طقم ذهب ابيض بسسسيط جداً هديه مني لها لاعاده ولاهم يحزنون وظروفي الماديه لم تكن لتساعدني كثيراً فمازلت طالب بالجامعه حينها والأمور طيبه

بعد الزواج تبدأ السعاده الحقيقه التي ليست بالهدايا وجميل ان يبدأ الزوجين حياتهما بأساس مادي مريح

الله يوفقك ويجمع بينكما بخير

[أمامة..!]

* أهم شي في الموضوع فضة لأ..

يوم الأحد الماضي قرأت خبر تخفيض في محل بيع الألماس في جدة
أمم والله ما أذكر اش اسمه المهم سلسلة بتعليقتها تقريباً ب 300
ابحثوا واشتروا من الان وخبوها ليوم الشبكة
المهم فضة لا ..
مهما كانت البنت طيبة ولا تهمها هالاشياء إلا أنها تفرح بالهدية القيمة
يعني طقم ذهب ب 7000 لوحده يكفي مو لازم ساعة والخرابيط الباقية
المهم هدية كبيرة شوي .. والهدية تحسسها بقيمتها
خصوصاً في بداية الأمر .. لأنها بتحس إنه تعب وحط مبلغ وقدره
عشان خاطرها وطبيعي في البداية بتكون مشاعرها ملخبطة
فالهدية القيِّمة إن شا الله تضبط هالمشاعر ..
عموماً .. دين الرجل وأخلاقه مع المرأة أراها أنا أجمل هدية من الله

ووفق الله الجميع ..


أضيفت عن طريق ma3aliMobile

[جمر الشوق..]

مثل ما قال بعض الاعضاء الهدية تقتصر على البنت فقط بدون امها او اخواتها.. اصلا الرجال شدخله فيهم..!!!

واشوف اللي حولي تكون طقم ذهب او ذهب ابيض مطعّم بألماس مع ساعة حلوة وبس.. عاد يتفنن بطريقة التغليف ومحلات الهددايا ما تقصر..

والهدية مهمة للبنت من ناحية تقدير رجلها لها وبداية حياة جديدة لهم..


بس تكفى فضه امسحها تمااااااااااااااما من القائمة..


بالتوفيق..

[قنديل الحياة]

.

أبي أقول نصيحة لكل المقبلين على الزواج بخصوص الهدايا والشبكة للعروس وأم العروس ..

أمك ثم أمك ثم أمك لاتنساها بغمرة الأحداث صحيح بتكون اهيا أقرب الناس لك وواقفه معاك لكن لما تجي للهدايا

اذكرها قبل زوجتك وأختك وحتى أم زوجتك ونفسك بعد !

لأن سبحان الله قلب الأم تلقائياً راح يبدأ المقارنة بينها وبين زوجة ولدها علشان جذي أدري إن كلكم فيكم الخير وماتقصرون

بس أرجوكم لاتنسون هدية الأُم حتى لو ارفضت وعطتك حجج وإنها ماتحتاج الهدايا لاتصدقها تراها تجاملك علشان ماتكلّف عليك ..

اذكرها قبل الكل كرد لمعروفها لأن لولاها بعد الله سبحانه ماأفتحوا أهالينا البيوت ولاجابونا على وجه الأرض ..

الله يوفق الجميع وصاحب الموضوع ويرزقنا بر والدينا وخصوصاً الأم مانلحق جزاها ليوم الدين ..

[نــوف .]

الحمد لله , ماعندنا هالأمور هذي
ملكة بسيطة وحفل زفاف وبس ,
والهدية غالباً تكون بليلة الزواج ..

[شيخة السعد]

المشاركة الأصلية كتبت بواسطة قنديل الحياة . أبي أقول نصيحة لكل المقبلين على الزواج بخصوص الهدايا والشبكة للعروس وأم العروس .. أمك ثم أمك ثم أمك لاتنساها بغمرة الأحداث صحيح بتكون اهيا أقرب الناس لك وواقفه معاك لكن لما تجي للهدايا اذكرها قبل زوجتك وأختك وحتى أم زوجتك ونفسك بعد ! لأن سبحان الله قلب الأم تلقائياً راح يبدأ المقارنة بينها وبين زوجة ولدها علشان جذي أدري إن كلكم فيكم الخير وماتقصرون بس أرجوكم لاتنسون هدية الأُم حتى لو ارفضت وعطتك حجج وإنها ماتحتاج الهدايا لاتصدقها تراها تجاملك علشان ماتكلّف عليك .. اذكرها قبل الكل كرد لمعروفها لأن لولاها بعد الله سبحانه ماأفتحوا أهالينا البيوت ولاجابونا على وجه الأرض .. الله يوفق الجميع وصاحب الموضوع ويرزقنا بر والدينا وخصوصاً الأم مانلحق جزاها ليوم الدين ..

اعجبتني هذه اللفتة منك ..كتب الله اجرك

واذكر الشباب زوجتك تستطيع ان ترضيها باي شئ بعد الزواج تمشيه عشاء سفرة
لكن امك وام زوجتك احرص على ان ترضيهم قبل الزواج بهدية قيمه على قد ميزانيتك

اذا رضت عليك امك وام زوجتك ابشر بسعدك والله
وان ما رضين عليك ابشر والله بالنكد والمشاكل من كل ناحية


والله يعينكم يا اهل الشبكات والعادات الدخيلة التي ما انزل الله بها من سلطان

[السندريلا رجاء]

وربي الموضوع كوم والفضة كوم تاني ضحكة كتييييييييييييييييييييييييير

لية الي بتتزوجها من ايام التسعينات

الله يسعدك يارب

اهديلها طقم ذهب بسيط وعطر وعلبة شوكلاتة وانتهى

اما مامتها قطعة قماش وعطر >> كنت ياقولك خاتم دهب بس لما شوفت الفضة بداية الموضوع بطلت

عاداتنا غريبة شويا بس مو صعبة والله ومو مكلفة بس تعبانة اكتب يمكن ارجع تاني

ربي يوفقك زي ماضحكتني

[Einstien]

.
،’
بورك فيكم جميعاً ،
والله انحرجت من الردود التي اخشى إن ردد عليها منفردة أن لا أوفيها حقها
لكن أحسب أنكم افدتوني واستفدنا جميعاً
با×
بالنسبة للفضة لم أفكر بتقديمه إطلاقاً ، لكن أعرف من أقربائي من قدمه لزوجته وحالهم فوق المتوسط ،
وحبيت أقولكم إني اكتشفت إن فيه صباحة بعد ، والله تكاليف ما أنزل الله بها من سلطان
الحمدلله بالنسبة لي الحال ميسورة لكن غيري ممن يتمنون الستر والحال الله أعلم به
تم تقييم جميع الردود
_ _ _ _ _ _ _ _ _ _ _ _ _ _ _ _ _ _ _ _ _ _ _ _ _

l أينشتاين l Einstien

.

[ربى حمد]

مبرووووك مقدماً أخي Einstien ومنك المال ومنها العيال والله يتمم عليك ..

هل تعني لك الشبكة وجمالها وتؤثر في قلبك إلى زوجك يعني قُدم لكٍ ألماس مثلاً ؟

بالنسبه لي و أخواتي تعني لنا الشيء الكثير ولدرجه تأثيرها على أخواتي محتفظين بشبكاتهم لين يومك ذا ومستحيل يفرطون فيها ..
من المعروف عندنا دخول عريس الغفله على البنت في الملكه وتلبيسها الشبكه في بيت أهلها والعشاء على أهل العروس بس أحيانا أهل المعرس أذا كانو شقرديه وسنعين يكون العشاء عليهم
بس الي حاصل في أغلب القبائل يوم الشبكه غير وبعدها الملكه وبعدها الزواج
يعني الشبكه مالها شغل في الملكه
للأسف في بعض الناس يدخل يلبسها الشبكه قبل مايتملك بزعمه أنه خلاص شبكها يعني ملكها له
أحدى أخواتي انشبكت قبل الملكه ومتصله علينا أمه تبي ولدها يدخل يلبّسها بنفسه بس أبوي وأمي رفضو وقالو اذا بيدخل يتملك عليها ..بس الحين مايدخل عليها وهي ماتحل له
على طاري المهر أخوي عطا مرته 30 الف وقال المهر علي وكتب عند الشيخ أن المهر قدره 10 الاف بعدين يوم راح لسوق الذهب طلع عليه الذهب 25 ألف
بس الحين في الغالب صارت الناس تعطي البنت 40 ألف وفيها الذهب والبنت هي الي تروح فيها والله أن الـ 40 ماتسوى ولا تسوي شيء حتى أعرف كثير من صديقاتي زادوهم أهلهم وبعضهم تسلفووو مساكين
يعني الذكيه هي الي بتأخذ الـ 30 ألف والذهب على المعرس عشان ماتتورط وتبلش
وأذا على القاعة حقت الزواج ماقتعت فيها أبداً وشوله بس خساير وتبذير والناس مايملى عينها ولا التراب وأبرك من هالقاعة السفر والله أن شهر العسل أبرك بكثير من جمعة الناس الي ماتقدم ولا تأخر وخاصه في هالوقت الناس ماتعطي خير

وصدق من قال :
لاهمّ الا همّ العرس ولا وجع الا وجع الضرس

[د.يوسف محمد السعيد]

ارفع هذا الموضوع للمقبلين على الزواج

سبق ان طرحت موضوعا مماثلا بعنوان

"الشبكة والصباحه"

فمن يأتي لنا برابطه مشكورا؟

[د.يوسف محمد السعيد]

رابط

http://forum.ma3ali.net/t142926.html

منتدى المعالي > المنتديات العامة > منتدى الأسرة
>> الشبكة والصباحه