قالت ( الا تخجل ايها السعودي ) ... فاعتقلت

[كتمــان]

لن أنسى اليوم الوطني الـ 81 .. فقد كان لي فيه موعد مع الاعتقال!!
أردت ايصال صوتي .. فاعتقلوني .. واعتقلوا صوتي!!
ولن أنسى ليلة الوطن .. حيث قضيتها في المنفى!!
هنا التفاصيل:
... البداية كانت الخميس الماضي .. بعد صلاة العشا رحت لأحد المجمعات التجارية بمدينة الرياض عشان اوزع المنشور اللي سبق حطيته بالصفحة بعنوان "الا تخجل ايها السعودي" .. وزعت عدد بسيط على السيارات بالمواقف ودخلت داخل السوق وكنت ادور واوزع .. عدد ما وزعت ما يزيد عن 30 ورقة .. وكان المكان زحمة جدا .. بصراحة حماسي للعمل لما كنت بالبيت اختفى لما جيت على ارض الواقع لاني حسيت اني اخطيت الطريقة فهؤلاء الناس لن يعملوا لقضيتنا اي شي .. فتوقفت عن التوزيع واتصلت بأخوي عشان ياخذني قال انه جا وبالمواقف.. توجهت لبوابة الخروج .. فتفاجئت برجال الامن العاملين بالمجمع يغلقون الباب في وجهي ويأتي آخر ويأخذ شنطتي والكيس اللي فيه المنشورات .. طبعا كان شغلهم سريع ومفاجئ بالنسبة لي .. (الحريم اللي وزعت عليهم هم اللي بلغوا) وحاصروني تقريبا اربعة سكيورتية وقالوا تعالي معنا لمكتب الامن .. وانا امشي الا هيئة الامر بالمعروف متوجهين لي .. ويستلموني تحقيق وهواش (روعوني) ..وصرت محط انظار المتسوقين.. قلت له لو سسمحت فضحتني عند الناس ودوني مكتب الامن .. وفعلا وداني وهو يستجوبني ..
قلت لهم ابغى محرمي اخوي برى ينتظرني وعطوني جوالي ودقيت عليه وجا (ياعمري اخوي ماله ذنب انفجع) .. وكل من جا بوجهي من ضابط ولا رجل امن ولا من الهيئة .. بلباس عسكري وبلباس مدني .. يحققون معي.. طلعوا رجال الهيئة .. وحاصروني ثلاثة من رجال امن السوق تحقيق معي ومع اخوي .. ويشدوون معنا ويهزأون فينا وقالو لي لو منتي حرمة ضربناك وانك تبين مظاهرات وفتنة وتحريض .. ولو وراك احد اعترفي منهو لا تكونين ضحية الخ الخ ..قلت لا وراي احد ولا شي .. وانكم كبرتوا السالفة مرة وهي ما تستاهل.
واجتمعوا يكتبون محضر .. واتفاجأ ان رجال الهيئة بالغرفة المجاورة ومعهم رجال مدنين يكتبون شي .. قلت للسكيورتي هذولي وش يكتبون قال مدري عنهم وهو معصب منهم وانهم مالهم دخل حنا اللي باشرنا الحالة .. وفعلا كانو حضراتهم بيختلقون فيني محضر من راسهم .. اخذه منهم رجل الامن وقطعه.
صار مكتب الامن خلية نحل من كثر المتواجدين رغم ان مساحته ما تتعدى ثلاثة متر في مترين.. ضباط على مدنيين على مدير السوق .. تقريبا 15 شخص .. احد يحقق واحد يطالع ويتفرج ويطلع ..واحد يحقق وهو يكلم بالجوال وينقل لهم كلامنا .. جلسنا بالمكتب تقريبا ثلاث ساعات .. وقاموا يتهاوشون علينا الدوريات يقولون بناخذهم وشرطة الحي تقول لا احنا اللي بناخذهم (فرحانين على وشو مدري)؟!

المهم ... اخذونا شرطة الحي .. وركبوني انا واخوي الدورية .. وودونا لمركز الشرطة ... وهناك تم التحقيق معي ومع اخوي في غرفتين منفصلة ... وفي حوالي السساعة الواحدة صباحا أخرجونا .. وتفاجئت انهم مقيدين رجلين اخوي .. وركبونا الدورية بمرافقة سجّانة .. وودونا لمباحث سعد على طريق الدمام.
وهناك .. دخلوني غرفة فيها موظفة فتشتني .. بعدين جا المحقق وبدأ التحقيق مباشرة وكان بالتناوب مع آخر بشكل متواصل حتى السابعة صباحا .. ما عدا وقت صلاة الفجر .. وخلال هالوقت وتقريبا الرابعة صباحا اخذو اخوي للبيت وفتشوه واخذو الجوالات واللابتوبات ورجعوا
من التحقيق وللأمانة ... كانوا جدا متعاونين ومحترمين .. وكانوا يتركوني على راحتي بالتفكير والاجابة عن الاسئلة..وكانوا يكتبون السؤال وانا اكتب الاجابة بخط يدي واوقع وابصم عند كل سؤال واجابة ... كانوا متخوفين اني تبع جهة معينة .. فقلت طبعا لا .. انا عملي لدافع شخصي عشان اخوي المسجون ... قالوا لكن ما شفناك كتبتي اطلقوا اخي .. لو كنتي كاتبته ما قلنا شي ... لكن كاتبه اطلقوا المعتقلين كلهم .. وحاطة اخوك شماعة!! .. هل تدرين وش قضاياهم هالمعتقلين ؟ وبعدين ليه كاتبة اطلقوا الشيخ يوسف الاحمد؟ .. قلت لانه الوحيد اللي دافع عن المعتقلين ..وبعدين كان همي اخوي بس ثم صار همي كل المعتقلين لاني حسيت بمعاناتهم من خلال القصص اللي اشوفها كل يوم.
والخوف الثاني انهم يعتقدون اني ابغى فتنة وتحريض المجتمع للمظاهرات ..من خلال الحوار والتحقيق فهموا الحقيقة وهي ان الدافع شخصي وعرفوا ظروفي الشخصية وحالتي الصحية اللي سببها فقد اخوي
وقال لي وليه متضاية اخوك عند اهله وصحته احسسن منك .. هههههه شر البلية ما يضحك .. وان فيه لجان مناصحة ترفع تقارير كل اسبوع .. واللي يبقى في عقله 20% من الفكر اللي بالي بالك يطلعونه مركز محمد بن نايف .. عشان كذا لا تقولين ليه معتقلين قضاياهم كبيرة وطلعوا.وترى اسعد اللحظات عندنا لما نشوف احد المعتقلين طالع.
وبعد التحقيق والتعب قال كل اللي قلتيه ما يهمنا .. نبغى تقولين اللي ورى الكواليس ..قلت والله ما وراي شي وشغلي كله واضح ... قال ترى بنجيب لابتوبك وبنشوف ايميلاتك وحتى لو كنت مفرمتة الجهاز بنطلع كل شي .. قلت عااااادي .. ما عندي شي اخفيه والحمد لله .. قال وش معنى الحين تحركتي واخوك مسجون من زمان .. قلت راجعت الداخلية وما دخلوني .. وارسلت برقيات بدون فايدة .. سكت طبعا.
كنت متماسكة جدا وما خفت منهم بفضل من ربي .. لكني انهرت وبكيت بشدة لما تكلمت عن فقدي لاخواني الشهيد (نحسبه كذلك)والمعتقل ..
الساعة سبع الصبح زي ما قلت انتهى التحقيق ..و قال لي المحقق اوعدك بتابع قضية اخوك بنفسي .. قلت معليش ما اصدق هالجملة .. قال ليه وهو يتبسم للمحقق الثاني .. قد سمعتيها قبل؟؟ .. قلت ايه من الامير محمد بن نايف قالها لابوي .. وسكت بعدين قال .. يلا قومو روحو الغرفة الثانية افطروا وارتاحوا .. لين يجي احد ياخذكم .. قلت نعععم!! يعني بنطلع؟؟.. قال وهو يجمع المنشورات بيده .. ايه انتي ما سويتي شي !!! .. انصدمت وسكت اجل ليه معتقليني!
جلست مع المفتشة ننتظر ومليناااااا من الانتظااار .. من سبع ونص الصبح يوم الجمعة الى ثنتين ونص الظهر .. بصراحة شكيت انهم يكذبون علي واني ما راح اطلع ..ثار علي القولون العصبي وما قدرت اكل اي شي لان بطني كان شوي وينفجر!! وطبعا ما ذقت طعم النوم .. بس اشرب موية.
ثنتين ونص الظهر استدعاني المحقق .. وبلغني ان الموضوع وصل للأمير محمد بن نايف .. وانه علمه بكلمتي انه معطي ابوي وعد بمتابعة موضوع اخوي .. وقال الامير انها بنتنا ونوعدها بعد ..قلت طيب ابي اخوي .. قال خلاص بنعطيكم زيارة استثنائية تشوفينه ..
نرجع لأخوي اللي كان معي .. ما زال الى الظهر بالقيود لأن المفتاح انكسر .. وجلسنا ننتظر يفكونه..طلبوا الدفاع المدني وجو بعد طول انتظار وما قدرو يعملو شي!! .. لحد بعد العصر .. وبالنهاية جا احد الموظفين معه قطاعة حديد .. وقطعها ... وطلعنا منهم الساعة خمس العصر ..ونحن لا نكاد نصدق .. فالحمد لله .. وحتى لما وصلت البيت ما قدرت انام .. واكملت 40 ساعةتقريبا بدون نوم ..
ويوم السبت ابشركم زرنا اخوي المعتقل ..بمبنى الضيافة بالحاير مو مبنى الزيارات وكانوا مجهزين لنا الشاي والقهوة والعصاير والفطاير والحلويات .. وكاسات وبيالات زجاجية مو بلاستيك كالعادة (وجه متعجب) انفجع اخوي المعتقل على باله فينا شي .. يقول لان صديقه المعتقل ما دخل هالمبنى حق الضيافة الا بعزا امه ..
الجوالات رجعوها صباح الثلاثاء .. اما الابتوبات .. قالوا بعد اسبوع او اسبوعين..
حاليا افكر بشي واحد .. ليلة واحدة فقط جربتها وراء الشمس .. كانت موجعة نفسيا وجسديا .. كيف بمن امضى سنواااات؟؟؟!! حسبنا الله ونعم الوكيل .. واسسأل الله ان يفك قيد جميع المعتقلين والمعتقلات المظلومين والمظلومات .. انتهى.
................


لا تنصح بما امر الله به بل قل ( ارقص ايها السعودي )


اللهم شل لسان من بلغن عليها




.

[ヾ الــوجـــــــــد ヾ]

قصه موجعه .. اللهم فكـ أسر كل معتقل بغير حق ..
ومن بلغ عنهآ عليهم من الله مآيستحقون ..
..اللهم فكـ أسر الشيخ خآلد الرآشد والشيخ يوسف الأحمد
اللهم آآمــــــين ...

.............

[(احساس مصرقعه)]

الله يساعدك وينصرك..انشا الله,,,

[خـــلود]

اللهم شل لسان من بلغن عليها

القصة صارت لك شخصيًا يا كتمان ؟
-

عن القصة فلا أملك ما أقول ، إلا أنّ الله يمهل ولا يهمل !

[آلام أمة]

ليس في جعبتي ما أقول سوى~
.. كنتِ بطلة.!