الدنيا ضاايقه فيني

[ايلازابيث]

الدنيا ضاايقه فيني
انا كان في ولد يكلمني وبعدين تركته من سنه تقريبا وصاار يدق على تلفوون البيت وامي مرره ردت عليه وهااوشتني وقاالتلي اذا دق ثااني مررره يااويلك وانتي تتحمليين مشكلتك ودقيت وقلته حرام عليك سببتلي مشكله مع اهلي وقاالي شووفي انا بتركك بس مووعشاانك عشاان ما اسبب مشااكل للناس بس بشرط اني انا ابغا اكلمك بس موو بالجووال انا ما اعرف اتكلم الا اذا قابلتك وابغى اقاابلك بالسوق وانا ودي ارجعله لان نفسيتي زفت من اول ماتركته وانا خاايفه من اهلي ويانبني ضميري وبنفس الوقت نفسيتي زفت اذا تركته وش اسووي ؟؟؟؟

[» الجُــمانــة » ♥]

ـ

السلام عليكم ..


هل لكِ اخت اكبر منكـ .!

كلمية بالموضوع ..!

ويمكن تقدر تساعدكـ .!

ـ

[الرايه]

وانا ودي ارجعله لان نفسيتي زفت من اول ماتركته

وإذا رجعتِ له بتصير أزفت ،،
توقعت أن مثل هذه الحركات صارت قديمه ومعروفه لدى الفتيات من الذئاب الخبيثه ،،

انا ما اعرف اتكلم الا اذا قابلتك وابغى اقاابلك بالسوق

ياسلام ،،
يعني أول كان يستطيع محادثتك عبر الهاتف والآن إلا يريد رؤيتك !
عزيزتي صدقيني مايريد إلا خداعك ، أحس أنك ستتركينه وتنجين منه ،،
لذلك هو يريد أن " يمسك عليك شيء " ثم هيهات النجاة ،،
بتصيرين ماتنبغين ولا بتراب ،،
نفسيتك زفت لأنك تفكرين فيه فقط ،، لو كنت تفكرين في التوبه لكانت نفسيتك أفضل ،،
لكن أنتِ إبتعدتِ عنه فقط خوفا من أهلك والمشاكل وليس من الله ،،
لذلك لايهين عليك تركه ،،
يجب أن يكون قرارك في تركه ينبع من داخلك ؛ لأنك فعلاً تخافين من الله وتخافين على عرضك وليس وكأنه مفروضا عليك من أهلك ،، فضلاً عن أنه لايحبك !

هدانا الله وإياك ،،

[بصمة ضياء]

ايلازابيث

1- روحي توضأئي وصلي ركعتين وانتهي اللية من سورة يوسف كاملة
بكرة برجع للموضوع
واتمنى اشوف ردك انك سويتي اللي قلت لك عليه
و الله لا هو ولا 10 من امثاله يقربون صوبك بإذن الله


برجع .. ولاتنسين سورة يوسف واذا تقدرين تخلصين 7 مرات والله يكون شي طيب

[العيطـــموس]

إيه الشيطان بدأ يوسوس لك إن نفسيتك زفت وإنك بحاجته!!>>صح نسيت أسلم عليك بالأول ياهلا فيك
والله يسهل أمرك)
أول شئ أمك داريه باالموضوع؟؟
وانا من رأيي إنه واحد نذل وحقير أجل بيكلمك بسوق؟
اللحين يهلس عليك ويقول ماابغى أسبب لك مشاكل وبنفس الوقت يطلب يقابلك بسوق!وش يضمنك وش يبغى يسوي لك؟
وبعدين وش الموضوع المهم اللي يخليكم تتقابلون بسوق؟؟
توكلي على ربك وأدعي ربك وأتركيه عنك وانا من رأيي تتحملين أمك واللي تسويه فيك لأنه فتره وبتعدي ولا تتورطين وتجيبين لنفسك مصيبه وفضيحه أكبر من كذا؟لو قدر الله وصادتكم الهيئه وكلموا أهلك>>عاد بيكلمون رجال موب أمك!!وش بيكون موقفك ؟
صدقيني ماعنده إلا قلة الحياء واصلا لو بترجعين تحسبين إنك بترتاحين!!لا والله بيزيد عذابك والله أعلم وش بيكون بعدين من بلاوي؟
يمكن الضيق اللي عندك الان من ذنبك ومكالماتك اللي مايحل لك ولا له تكلمون بعض؟
وأنتي حتى لو دق لاتبيني إنك ضعيفه وأنه مسبب لك أزمه وخوف وتروحين تدقين عليه وتقولين لا تدق؟؟يعني تحسبين أن واحد من هذي الأشكال اللي مايخاف الله بيقول إيه والله حرام أسوي له مشكله مع أهله؟لا ياعمري بيزيد عناد وترهيب لك لين يخليك بمزاجه)
وصح أحمدي ربك إن ماعنده تسجيل لك أجل وش بتسوين لو صار؟ويمكن طلعة السوق تجيب لك مصيبه أعظم يمكن يسجلك أو يخلي نذل مثله يصوركم؟يالله عاد أطلعي منه!!
تكفييين من أخت ناصحه لك وربي الدنيا تخوف وأنتي مشيتي بطريق غلط أحمدي ربك جت على كذا؟وأنسحبي وتحملي أي شئ بس لاتتمادين وترجعين مره 2 وأتقي الله أتقي الله لا ربي يقلب حياتك مع زوجك جحيم بسبب هذا الذنب !!
اللي يستمتع باالحرام ينحرم من لذة الحلال)
شوفي سمعنا في بعض البرامج اللي كان فيه مداخلات من بنات تائبات شوفي كيف كانوا يبكون بحرقه وندم على اللي كانوا فيه؟شوفي المشاكل اللي صارت لهم بسبة مكالماتهم )
وخلاص ماعندي شئ أقوله ماأقول إلا ربي يهديك ويحفظك ويكفيك شر نفسك والشيطان........

[(الفارس الملثم)]

نفسيتك بتكون زفت لو اتبعتي خطوات الشيطان
التعلق بالبشر والحب اللي بني على باطل هو اللي خلا نفسيتك زفت
يقول يبي يقابلك لاتردين عليه لان هالسوالف معروفه عند الشباب
وانتِ المفروض تحطين خطوط حمراء لنفسك امام هالأشكال
امك عرفت شوفي وش سوت فكري بأهلك وردة فعلهم لاترخصين بنفسك
قولي اللهم اكفني بحلالك عن حرامك
اتركيه لله وثقي ربي بيعوظك خيراً منه
وكيف الى الآن متعلقه فيه وهو يقول هالحكي ويساومك على نفسك
ترى الموضوع مو واقف الى هالحد
كلمك وقابلتيه بسوق وبعدين...........!!!!
استغفري ربك وانيبي اليه وركعتين في جوف الليل باذن الله ستكفيك مااهمك
والله يوفقك ويستر عليك

[الذهبـي]

الله المستعان ، وين وصل الحال بشبابنا وكأن الأمر بسيط
يابنت الناس اتق الله ، والله انك انت الخسرانه ، وهو بنظرة المجتم رجال مايعيبه شيء
انتبهي ثم انتبهي ثم انتبهي

[رواء الروح]

المشاركة الأصلية كتبت بواسطة ايلازابيث الدنيا ضاايقه فيني انا كان في ولد يكلمني وبعدين تركته من سنه تقريبا وصاار يدق على تلفوون البيت وامي مرره ردت عليه وهااوشتني وقاالتلي اذا دق ثااني مررره يااويلك وانتي تتحمليين مشكلتك ودقيت وقلته حرام عليك سببتلي مشكله مع اهلي وقاالي شووفي انا بتركك بس مووعشاانك عشاان ما اسبب مشااكل للناس بس بشرط اني انا ابغا اكلمك بس موو بالجووال انا ما اعرف اتكلم الا اذا قابلتك وابغى اقاابلك بالسوق وانا ودي ارجعله لان نفسيتي زفت من اول ماتركته وانا خاايفه من اهلي ويانبني ضميري وبنفس الوقت نفسيتي زفت اذا تركته وش اسووي ؟؟؟؟

ياقلبي إنتي تعبااااانه
كل شيء ولا تعبك ياقلبي
كلميه وارتاحي
وش تبين بأهلك بالطقاق


إتصلي ع الشيخ عادل المقبل وإذا تبين الأرقام ابشري وأنا أختك

[مجد أمة]

الله المستعان والحمدلله الذي عافانا ..
ماأبغى أطبطب عليك وأقول تحزنين والله قلبك موبيدك ولا أزمة وتعدي ..بس بقول
لا لا تتركينه قابليه بالسوق وبتمسكم الهيئة وبيطلبون أهلك ياخذونك وممكن أهلك يرفضون فيخلونك بدار رعاية الفتيات وتعيشين طول عمرك فيها <هذا الإحتمال الأول .
والإحتمال الثاني إن تم وركزي إن تم هذا اللقاء ع خير ورجعتي بيتكم بيكلمك ثاني وثالث ويسجل مكالماتك ويطلب صورك ويهددك فيها إن ماطلعتي معاه فتخافين وتطلعين معاه وتقعين في المحظور .وتعيشين تحت رحمته ذليلة وقتها بتكرهين نفسك وتكرهينه وتتمنين الموت .
شفتي المسلسل هذا كله دايم ينعرض لكن للأسف ننسى أو نتناسى الحلقة الأخيرة ..والسعيد من أتعظ بغيره .
وإذا على الضيقة الي تجيك فأنا أقولك للحين ماشفتي شيء لأن لو أستمريتي معاه بتشوفين الضيقة الي صح .
شوفي هذا الرابط وأفتحي الأجزاء الثانية لنفس البرنامج . الله يهديك ويستعملك لطاعته .

http://www.youtube.com/watch?v=i4hQk4JjdjU

[بحر الحنااان]

اتركيه وربي يسخر لك الافضل ومن ترك شيآ لله عوضه الله خير منه

[همساااات]

غيري رقم تليفونك ان كان يعرفه ...
وافصلي فيشه تليفون البيت فترة طويلة حتى لا يتجرأ ويتصل كل مرة ... وراح يتعب من الاتصال اذا شاف ما في رد ...
هذي امك ردت عليه .... ورحمتك .. كيف بأهلك من الرجال ...!

وقوي قلبك و خليك اقوى من قبل ولا تضعفين وتكلمينه و طنشي قد ما تقدرين و أنسيه
... تـــراه لعب بقلبك و الحين تبغينه ...

وكل ما اتجيك الحالة و تحسين تبغين تكلمينه أستغفري ربك على طول الوقت و أبعدي الشيطان ...
و أشغلي نفسك بأي شيء آخر بعيد عنه ... حاولي تصادقين صديقاتك أغلب الوقت ... حاولي تنمين نفسك بنفسك

المهم أنسي أمره تماما ....

[ابتســـام]

ياحبيبتي ()

أبحثي عن السعاده في أعين البشر ..وفي قسمات ملامحهم ..
وفي كلماتهم العذبه ..ولكنني سأقول بأنكِ لن تجدي سعادتك الحقيقيه إلا
حينما تضعيها في مكانٍ لايفارقكِ أبداً.."قلبك"
كُل البشر سيموتون ..كلهم سيرحلون..والكثير سيخدعون ويظلمون ويتنكرون ..
ولن يبقى بجانبك أحدٌ إلا الله ؛؛
لاتعودي إلى ذلك الذئب مرةً أخرى ..لأنهُ هلاك..لأنهُ الموت ياعزيزتي
لأنه الشخص الوحيد الذي سيسلبك عزك ..
كل ماعليكِ فعله هو لزوم الإستغفآر وإعطاء رقمه لأحد رجال الهيئه ..
وإذا تبغين رقم الهيئة أعطيك إياه ..
ولكن لا تتركي الإستغفار لحظه ..لستُ أقولها عبث وإنما من تجربه ..
حينما أستغفر أجد بأنني أسعد انسانه وحين أترك الإستغفار لاأجد أسوأ مني فالبشر ؛
ياحبيبتي؛؛ يعلمُ الله بأن كُل ماكتبتهُ لكِ ..كتبتُهُ بقلبي أولاً ثم بيدي~
أسأل الله أن يفرج عنكِ كل هم ٍ وكربٍ وبلوى ..وأن يكفَ عنكِ كل من أراد شراً؛؛

[العاصف]

في فمي ماء لا أستطيع التعليق والإضافة ممارأيت من ردود الأعضاء الرائعة
بورك فيكم وفي أقلامكم ..

أما الأخت أسأل الله أن يجنبك الشر ويحفظك الرحمن ..

[.: الإمبراطورة :.]

بغض النظر عن كل شيء ..
علاقتك مع هذا الشخص تحت أي إطار ؟
لا ترجين من علاقة غير شرعية خير ورآحة

نصيييييحة من أخت تحب لك الخير اقطعي علاقتك فيه ولا تفكرين تطلعين معه بأي شكل من الأشكال صدقيني أخاف تندمين على هالمقابلة طوول عمرك ...
يبغآك تسليه لا غير ..

فكري بكلامي زييين فكري بأهلك .؟ بنفسك وسمعتك .؟ فكري قبل شيء بربك اللي مطلع على كل صغيرة وكبيرة في هالعلاقة ..
اترركيه لله وتوبي توبة صادقة وبعدها مابتلقين وقت تفكرين فييه ..

ارجوووك لا تفكرين تتواصلين معه .. وربي خايفة عليك ..
لا تسمعييين لوساوس الشيطاان انتبهي الله يحفظك

الله يكيفك شرهـ ويطهر قلبك من محبته ..

وعشآن ينقطع عن ازعاجكم اتصلي على اي مركز هيئة بمنطقتك
وأعطيهم اسمه وأنه مزعجكم وبإذن الله بترتاحين منه ..

أهم شيء أصـــدقي مع الله .. يصدقك

[جَلجلت]

لا أزيد على ما قاله الأخوه والأخوات بارك الله فيهم وكتب أجرهم سوى أسأل الله أن يستركِ في الدنيا والاخره ويحفظكِ بحفظه وأن يملأ قلبك بحبه سبحانه وحب من يحبه ...وصلى الله على نبينا واله وصحبه وسلم
يا أختي الأمه بحاجتك فلاتخذليها.........

[‏[‏ الصمود ]]

’
نفس القصص التي نسمعها في كل مسرحيه , نفس الأعذار , نفس السيناريو
القصه تتكرر والمؤلف واحد وأنتِ شاهده على ذاك وأقسم أنك قرأت وسمعت كثيرا عن هذا
ثم تأتين لتلعبين دور البطله الساذجه في المسرحيه !!!
والنهاية : لايبقى على المسرح إلا أنتِ والعار والفضيحه !
لست بحاجه لأن يقول لك أحد أنت مخطئه لأنك تعلمين ذاك ,
وتوقنين أن تلبيتك لطلبه أكبر جريمه ,!
مشكلتك فقط أنك ضعيفه , ملأت فراغ قلبك بحب حرام فعوقبتِ
جعلت الله اهون الناظرين إليك فلم لاتهونين عليه !؟
من سعة حلم الله عليك ان ستر عليك إلى الآن فماذا تنتظريــن ؟؟

[البرآآآءة]

احذري ثم احذري ثم احذري ..
ياغالية ثقي بأن اي سعادة في معصية الرب ستنقلب الى نكد وضيق وتعاسة ..

شرح الله صدرك بالايمان وطاعة الرحمن وجنبك مزالق الهوى وخطوات الشيطان ..



بصمة ضياء :
ليش سورة يوسف بالذات؟ المعذرة بس ماعندي خلفية او معلومة .. فيه حديث؟

[بصمة ضياء]

اختي إليزابيث الكلام كثير حول هذا الموضوع وبجد موضوعك يبكي وفي ذات الوقت مدري وش اقول
احمدي ربك الف مرة انك جيتي وطرحتي مشكلتك قبل لايصير شي
يا إليزابيث انت ماتدرين حجم المصيبة اللي راح تتعلق فيك لو قبلتي وخرجتي معاه مو بس راح يتعلق العار فيك بل بأهلك
وتيقني أن نهاية حياتك راح تكون إذا وافقتي على هذي الطلعة وبعدها ابكي على ماسيحدث فلن يجدي الندم ابداً
فكري فيها : إلي صار قبل صار ...<< يعني الله رحمك بإنه ماصار اكبر من هالشي
واللحين يجي وبكل وقاحه ويطلب منك إنك تقابلينه في السوق !!
يا إليزابيث : شوفي للموضوع بعمق لا تسمحين لهذا الشاب أن يدمر حياتك
يا اليزابيث: أعلمي أن الله " يمهل ولايهمل "
يا اليزابيث: لا تبيعين جنة ربك وسعادتك في الدنيا والآخرة بهذه السهولة
والله العظيم مدري وش اقول لك
لكن الزمي سورة يوسف والاستغفار وشوفي وشلون ربك يفرجها

وفي النهاية إعلمي " أمن يجب المضطر إذا دعاه ويكشف السوء ويجعلكم خلفاء الأرض أإله مع الله "
أسأل الله العظيم رب العرش الكريم ان يصب عليك من السكينة والراحة صباً صباً
وأن يبعد عنك كل شر ويحفظك من كل سوء وأن يغنيك من فضله
وأن يهدي شباب المسلمين والمسلمات لمافيه الخير والصلاح وأن يبعد عنا وعنهم الفتن ماظهر منها ومابطن

شوفي ردود الأعضاء واقرأئيها بتمعن وتيقني أن قلوبنا معك وأن دعواتنا الصادقة لك ستنهل عليك تترا

[بصمة ضياء]

المشاركة الأصلية كتبت بواسطة البرآآآءة [COLOR="magenta" بصمة ضياء : ليش سورة يوسف بالذات؟ المعذرة بس ماعندي خلفية او معلومة .. فيه حديث؟

القرآن كله آيات عجيبة في مفعولها
لكن سورة يوسف لها طابع خاص والبقرة بالنسبة لي
سورة يوسف:<<< راح اقول لك عن تجربة ومن تجارب ناس سمعت عنهم
يعني ماعندي دليل شرعي لكن أنا شخصياً اجربة ويجيب مفعول قوي << فالهدف الأول التقرب إلى الله بطاعة وقراءة القرآن طاعة والهدف الثاني : التفكر بالآيات التي فيها
مثل: (( إنما أشكو بثي وحزني إلى الله ))
وفي الحقيقة في كل آية فيها فائدة ممكن للإنسان أن يستخرجها وآيات القرآن كلها كذلك
لكن هذه السورة سهله في قراءتها
وعن تجربة : ذات مرة كنت اعاني من ضيق شديد بسبب مشكلة خاصة
المشكلة كانت عادية لكن هول الخبر كان كبير نوعاً ما
فلزمت سورة يوسف 7 مرات ورا بعض
والحمد لله الهم والضيق راح والرزق جاء من حيث لا احتسب
وهنالك نساء يعانون من مصائب او عدم انجاب قرأن السورة 7 مرات وتيسرت امورهن

<< أنا مااقول لكم اعملوا هالشي واطلع طريقة من عندي
لكن الشيء الأساسي في الموضوع ان القرآن كله شفاء ورحمه للقلوب والعباد وتيسير للرزق وتقرب وطاعة لله

(": حياك الله

[ajmn]

إذا وراك رجال تثقين فيه ( عم أو خال )

خليه يتولى موضوعه . .

أو بلغي الهيئة . . يتولون أمره . .