الزواج في المرحلة الجامعية

[العيطـــموس]

المشاركة الأصلية كتبت بواسطة مشاعر مبتسمة . . ^^^^ لكن أحياناً إذا كانت البنت مترفهة في بيت أهلها ،، تقنع بالقليل من زوجها .. وعلى غير أحياناً الأهل يساعدون بنتهم وزوجها لين تستقر أوضاعهم ،، وكثير أعرفهم بنات أحوالهم ممتازة مع أهلهم ،، وأزواجهم على قد حالهم .. فـ الأهل للبنت يساعدونهم ، يعني أوقات السفر مثلاً من أبو البنت وكذا .. يعني الآباء يقولون بنتنا تعودت تترفه ، نرفهها هي وزوجها .. المهم بعد إن الزوج ما يعتمد على كذا ، ويعرف إنه شيء مؤقت والمفروض يكون من عنده .. . .

قلتيها أحيييييانا
طيب ماأحس إنه حلوه بحق زوجي يتمشى على حسابي؟أو قصدي حساب أبوي؟؟
مره صعبه وأعرف وحده كذا بس إحرااج شديد لزوجها وغير كذا تعود مع الزمن إن أهله يصرفووون عليها وعلى عياله؟؟
يعني يتزوج موظفه معقوله فلوسهم واحد بس أهلي يصرفون علي
مقولة إنه تعودت تترفه نرفها هي وزوجها مادخلت مزاجي!!!!

[(((منصور)))]

المشاركة الأصلية كتبت بواسطة غداً أجمل~ زميلتي بثاني متزوجة واحد بثالث جامعة.. <مبزرة ذذ.. لكن زواجهم لحاجة .. كلهم دواااااااافييير الله يحفظهم وكلهم يبغون يكملون دراستهم بالخارج ..والبنت تبي محرم واهل الولد مشترطين يتزوج بعدين يسافر ،،لذلك تزوجو بهذا السن ذذ.. من ناحية الصرف فابو الولد هو اللي يصرف عليهم .. اي وبعد واحد من قرايبي بسنة ثالث ومتزوج وحدة اصغر بسنه اتوقع وللأسف ماكملو اربع شهور الا وينفصلون والبنت حامل بالنسبة لي اشوف انو الزواج يحتاج نضج خصوصاً من ناحية الزوج لأن بيده العصمةالأكيد انو بتواجهم مشاكل ومسؤليات وتحتاج صبر وتحمل ناااااااااااادر نلقاه برجل بهذا السن برأيي يصبر صاحبك اقل شي لسن 25 الا اذا كان واثق من قدرته على تحمل المسؤليه والصبر على المشاكل اللي بتواجهم وحلها بحكمة ..فيتوكل ويتذكر ان الزواج مو كله عسسل أضيفت عن طريق ma3aliMobile

استفدت من ردك بارك الله فيك أختي أنت أقرب رد للموضوع تقريبا

[(الفارس الملثم)]

يافاضل
يعتمد الزواج بالمرحله الجامعيه على الامور الماديه بشكل كبير
ان كان لديه دخل ثابت فليقدم عليه ونحن من المشجعين والا فلا
وليكن بين عينيه ان الزواج ليس فقط قضاء وطر
وانما مسؤليه واطفال وانسانه مسؤله منه وحياه اخرى مختلفه عن "حياة العزوبيه"
زواجه في بداية المرحله الجامعيه قد يسبب له حرج او لطرفين ان صح التعبير
سيرزق بأطفال باذن الله وتكبر المسؤليه وتتفاقم وهو لازال يعاني مرارة الجامعه ومحاظراتها
اقول لك هذا وانا خضت هذه التجربه "بأخر ترم من اخر سنه "
ومع هذا عانيت انا وزوجتي بسبب اننا لازلنا طلاب
وكانت حياه اخرى ومسؤليه بكل ماتحمله الكلمه من معنى
فليستخير صاحبك قبل ان يقدم على اي خطوه
والله يوفقه الى كل خير

[[ мεссди ῟ ]-]

السلام عليكم ورحمة الله وبركاته


وناسة الموضوع يطير النوم شوي < سهران الأخ

لو بيدي تزوجت أيام الثانوية هع !!
بس تعرف الأوضاع في السعودية كيف متدهورة
ولما دخلت الكلية -سحبت عليها منذو مبطي- على بالي إني باستقر وأضبط وضعي، لكن الواقع يفرض نفسه دائماً محاضرات متشتته ساعتين الصبح وساعة الظهر وساعة العصر وكل يوم له ترتيب يختلف عن الثاني يعني لا أقدر أضبط وضعي ولا أقدر استقر .. باختصار الطالب الجامعي يالله يلحق يرتب وضعه كيف لو كان متزوج

لو قلنا إن الجامعة نظامها مختلف وانحلت مشكلة نظام الساعات المبعثرة فأكبر ايجابيات زواج الطالب الجامعي أو الطالبة الاستقرار نفسياً من بدري وراح يلقى من يسانده في دراسته ويدعمه نفسياً وعاطفياً

اعتبره زواج ناجح إذا لم يواجه مشاكل مادية ، والله يستر من المشاكل المادية بالنسبة للمصاريف الشهرية أتوقع راح تكون بحدود معقولة ما تتجاوز 2500 لأنه كطالب جامعي أو طالبة ما أعتقد بيستعجلوا على الأطفال ويزيدوا على مسؤولياتهم أكثر من احتمالهم


أصحاب التجربة العملية يا ليت يدعمونا بخبرتهم وتجاربهم

[مُستنيرة ~]

^
2500 !!
حاسب فواتير الموبايلات ..؟
حاسب دخلات الزوجة للسوق؟
حاسب واجباتكم الاجتماعيه "هدايا العروسات والمواليد هدايا لأهلك واهلها
من فتره لفترة ....الخ.؟!
حاسب لو تتضرر لاقدر الله سيارتك مبلغ تصليحها؟
حاسب انو مفروض اقل شي يكون في بوكك انت وياها 400 ريال؟
هذا غير انو المواد الغذائيه اغلبها مرتفع سعرها ..
والاهم "المفرحات" اللي بتملى الثلاجه ؟^^

مستحييل تكفي 2500 بهذا الوقت كل شي غاااالي ..
هذي يالله تكفيها لوحدها :/
اذا احد بيتزوج بهذا السن لازم يصرف عليه ابوه .!!!
عاد هذا شي راجع لشخص نفسه ..
من برضى ان ابوه يصرف عليه ؟..
ومن ترضى وتخاطر وتتزوج واحد بهذا السن
وزياده ماعنده دخل كااافي وثاابت ..() ؟؟
الزواج ماهو خبط لزق !!ضروري التخطيط فيه
كل واحد اعرف بنفسه يكتب الاجابيات والسلبيات في اقدامه على الزواج
بهذا السن ويشوف !!
وفقكم المولى واعانكم  


أضيفت عن طريق ma3aliMobile

[مـشــاعل]

^
صدقيني المفرحات بالقلب مو بالثلاجة !
أتوقع أنه هذي مشكلتنا , لا يمكن نتنازل عن بعض الأمور أو لنقول بعبارة أصح نعيش بمستوانا الحقيقي !
أتوقع أنه أهم شي علشان ينجح زواج طالب جامعي هو انه يفهم زوجته كيف بتكون حياتهم
و انه وضعهم مختلف لفترة معينة و بعدها بتتيسر , مهما كان مصروفهم الشهري .
لكن السؤال هل بنات هالوقت يوافقن على طالب ؟!
طبعا هنا تجي مسؤولية الأهل .
فالمشكلة ليست مادة فقط , المسألة ثقافة و قناعات محتمع لازم مواجهتها و نغييرها .

[مُستنيرة ~]

^
تبين الصراحة بالنسبة لي
ما اقتنعت بتاتاً بالزواج بهذا السن ..!!
احس توه ماركد ..بمعنى اصح مانضج
بهذا السن يكون متهور بمشاعره بقراراته ولا عنده خبره بالحياة
ممكن تعينه على دف حياتهم الزوجيه!!
واللي زاد الطين بلّه وزادني اقتناع برأيي..
هو طلاق واحد من جماعتي وهو متزوج بهذا السن ..
مع انو معروف بعقله ويعتمد عليه في اشياء كبيره ..!
اما زواج صديقتي صحيح نجح لكن اتوقع السبب في ذلك
هو حبهم لبعض من الأزل ذذ"من ثاني متوسط الله لا يشقينا"
<<اجتمعت فيهم صفة الدفارة وتعذرو بالدراسة بالخارج عشان يعجلون به ذذ
الزبدة اني ما اشوف نجاح زواجهم مقياس لنجاح اي زواج بهذا السن ..
وكماناا عندي نموذج ثالث بما اني قريييييبه لهم عارفه تفاصيل بتفيدكم إن شاء الله
لكن يبي له رد لوحده لأن تفاصيله طوييييله ^^
فالعذر والسموحة ()
 
>>
عفواً مشاعل ..وش تقصدين ب " نعيش بمستوانا الحقيقي " !!؟
ممكن توضيح ؟


أضيفت عن طريق ma3aliMobile

[مـشــاعل]

^
أقصد مستواهم المادي الفعلي , و يصرفونه بأمور أساسية مو ثانوية .

[(الفارس الملثم)]

المشاركة الأصلية كتبت بواسطة غداً أجمل~ ^ تبين الصراحة بالنسبة لي ما اقتنعت بتاتاً بالزواج بهذا السن ..!! احس توه ماركد ..بمعنى اصح مانضج بهذا السن يكون متهور بمشاعره بقراراته ولا عنده خبره بالحياة ممكن تعينه على دف حياتهم الزوجيه!! واللي زاد الطين بلّه وزادني اقتناع برأيي.. هو طلاق واحد من جماعتي وهو متزوج بهذا السن .. مع انو معروف بعقله ويعتمد عليه في اشياء كبيره ..! اما زواج صديقتي صحيح نجح لكن اتوقع السبب في ذلك هو حبهم لبعض من الأزل ذذ"من ثاني متوسط الله لا يشقينا" <<اجتمعت فيهم صفة الدفارة وتعذرو بالدراسة بالخارج عشان يعجلون به ذذ الزبدة اني ما اشوف نجاح زواجهم مقياس لنجاح اي زواج بهذا السن .. وكماناا عندي نموذج ثالث بما اني قريييييبه لهم عارفه تفاصيل بتفيدكم إن شاء الله لكن يبي له رد لوحده لأن تفاصيله طوييييله ^^ فالعذر والسموحة ()   >> عفواً مشاعل ..وش تقصدين ب " نعيش بمستوانا الحقيقي " !!؟ ممكن توضيح ؟ أضيفت عن طريق ma3aliMobile

الزواج بهذا السن لايحكم عليه هكذا
هنالك من تزوج بالثلاثين من العمر ومستقر مادياً ولكن حصل طلاق بعد مشيئه الله
لاتقاس الأمور هكذا البته تقاس على مدى اصرار الشاب على بناء بيت متزن متماسك فهنا تستمر الحياه باذن الله ومدى تقبل الفتاه هذه الفكره وبناء اسره صغيره على حسب امكانيات الزوج
بالنسبه للأمور الماديه والرفاهيه كثير من تزوج بالمرحله الجامعيه واقتصر على الأساسيات وكانت زوجته خير معين له
فالزوجه ان رغبت زوجها ورأت منه مايعجبها واحبته ستتنازل عن الكثير
لانحجر واسعاً ونقول اتفق اثنان فقط لأشتراكهم بهذا الامر او ذلك
ماهي الا ارزاق من رب العباد وتوفيق من الله
وبالنهايه الاستخاره هي المهمه والتوكل على الله اولاً واخيراً
ولانحكم على الأمور لطلاق فلان او لـ أستمرار زواج فلان

[مُستنيرة ~]

^
فاهمة هذا الشي ..
انا اقصد اني إلى الآن ما شفت زواج بهذا السن ناجح ..!
ممكن انه يغير الفكرة اللي ماخذتها ..ولاّ انا عارفه انو حالة
وحدة طلاق ماهي مقياس !!!
وتبقى السالفة انها رأي مو ضروري تكون حقيقة !
بداية انا تكلمت عن واقع وحقائق لكن لما علقت
مشاعل وقالت ان المفرحات في القلب^^ ولازم تنازل
ابديت رأيي بالموضوع ..


أضيفت عن طريق ma3aliMobile

[مُستنيرة ~]

النموج الثالث والاخير ذذ..
تقدم لأختي طالب جامعي من معارفنا عمره 21..
اخوي ماكان مقتنع يقول صغييير وغير كذا هو يبي يحجزها ليما يتخرج !! يعني بعد سنتين ونصف !! فقال انا مو مقتنع وانتم بكيفكم ..
من جهة ثانية الرجال تبارك الرحمن حاسبها صح ..
هو مدرك انو ماديته بهذا الوقت ما تسمح بالزواج .. فخطب  من الآن عشان يخليه دافع له انو يجتهد في دراسته فبالتالي يتوظف ويتزوج بأقرب وقت وانسب وقت ..
وفعلاً.. تخرج، وبالنفس الشهر توظف ثم تملك وبعد 3 شهور تزوج ..
بالمقابل ..
الاهل ايقنوا انهم فعلاً ما اخطئوا بالموافقه بعتبار انه صغير في السن .. وانه يستاهل فعلاً صبرهم عليه سنتين ونصف ..
فكانو له عون بأنهم شالو عنه زواج الحريم بأكمله واكتفو بأربعين الف فقط كمهر "وعوضو اختي طبعاً لانه مايكفي ابد لتجهيز "..


ما يستفاد من القصة ..<<نقلب فصحى ذذ
1- فطنة الزوج في جعل هدفه الاكبر"الزواج" دافعاً لتحقيق بقية اهدافه "الاجتهاد ومن ثم الوظيفة المناااسبه " في اقرب وقت(مناااسب)..^^
2-عدم اقتصار نظرة الزوج على رغبته(الزواج مبكراً ) فقط بل نظر لمصلحة الجميع ( له ولزوجته  ولأبنائه) بأن يعيشو حياة كريمة 
3-اثبت "لنسباه ذذ" احترامه وتقديره لدرتهم المصونة ..^^
4-~>خاص للبنات ..>>تخيلو انو يبي يظلل ذذ
" انتبهو تشرهون او بمعنى آخر تتحمدون على حال اي بنت متزوجة كانت او مخطوبة ..
اختي شرهه على وحده مدة خطبتها 7شهور ورجعت لها طنزتها بسنتين ونصصف" ()()
وعذراً عذراً عذراً على التأخير في الرد 
والاطاله ..
واتمنى اني افدتكم فعلاً ولو بشي بسييط ^^


أضيفت عن طريق ma3aliMobile

[داج بخيالي !]

شكرا لكم من اعماق القلب ,,

[ضياء البدر]

اثنتين من صديقاتي تزوجوا طلاب في الجامعة

مدة زواجهم 3 سنوات تقريبًا

الحمد لله كانوا ولا زالوا في ستر وعافية ، أسأل الله أن يديم عليهم ذلك

إن كانت هناك مشكلة ، فهي أن كلاهما لم يتوظف وظيفة ثابتة بعدالتخرج

وصرفياتهم في الغالب من أهاليهم ، أو من الوظائف المؤقتة.


لكني أرى حقيقة أن الأهل إذا كانوا مقتدرين ماديًا ، والشاب ناضج وراشد ، فلا يوجد مانع من الزواج !

[حكآية قلب]

.. صعب جداً ..

الجامعة تأخذ وقت كبير من اليوم ، محاضرات متفرقة حتى صلاة المغرب !
يعني راح يومي كله ، ما بقى شي .. بالكثير الساعة 10 ونص وأنا نايـم

يعني آخذ بنت الناس وأشقيها معي بدل ما أسعدها
هي مرحلة كفاح وبناء وتكوين شخصية وتحديد مستقبل

.. تجاوزها لوحدك ..

[وآنـا أخت راشد]

صراحةً مافضل
لان الزواج إستقرار .. فـ وين نلاقي الاستقرار دام الزوج مشغول بجامعته
والزوجه مشغوله بالجامعه !
ماراح يكون في استقرار .. ألا اذا احد الطرفين يكون عاطل عن الجامعه .

آعرف وحده جامعيه قبل الزواج اشترطت ان تكمل دراستها
وفعلاً تزوجت وفي بداية زواجها آخذت اسبوعين إجازه ، وبعدها واصلت مشاويرها في الجامعه
والزوج موظف ..
صراحةً ماعجبتني الفكره آبداً .. حسيت حياتهم عمليه اكثر ماتكون استقرار

يعني لو الزوج جامعي وهي في البيت يكون آحلى
لان الزوجه هي ملكة البيت .


وآساساً بغض النظر في الجامعه او موب في الجامعه
اساساً العمر صغيير ع الزواج
يعني عندنا اللي يتخرج من الجامعه عمره 24 وبالكثير 25 ، هذا العمر مناسب للزواج
آما انه مازال يدرس راح يتراوح عمره مابين 19 - 24 يعني صغير ع الزواج
^^^
تحسون مسأله رياضيه :P


وصراحةً هذا الموضوع يسبب لي ربكه وتوتر .. آخاف يجي نصيبي وانا مابعد تخرجت !
لاني ارفض بشده البنت تتزوج وتدرس بنفس الوقت .. لانها راح تعوّد زوجها على غيابها في البيت
ويمكن ماتقوم بواجباتها كزوجه ، وبنفس الوقت الشهاده الجامعيه للبنت مهمه
يعني المسأله صعبه ، وحلّها الوحيد الزواج بعد التخرج .




الله يوفق الجميع
وكل الشكر لصاحب الموضوع

[سليل الحرف]

أنا تزوجت وأنا في الجامعة
لكن إجابتي لن تنفعك
لأن الظروف تختلف
أمنياتي لك بالتوفيق والتيسير

[نقاء ~]

الزواج شراكة طول العمر
يعني وجود أطفال ..
يعمي تنازلات وتضحيات
يعني ..
:
:
:


حياة سعيدة بإذن الله

لذا ينبغي ألا ي/ت قدم عليه إلا بعد نضج من كافة الجوانب ..
وذلك لمصلحة الأولاد أولا وأخيرًا..
وكما يقال "العود من أول ركزه"
كانت السنة الأولى من سنيّ الزواج هي سنة حجر الأساس ولاشك أن الانشغال أو عدم النضج في هذه المرحلة سؤثر كثيرًا في حياتهما المستقبلية..


بالنسبة لي يهمني شيئين :

اعتماد الزوج على نفسه، أما كونه يأخذ مصروفه من والده لينفق عليّ لا تروق لي أبدًا !
ليس لأنني أريد حياة مرفهة كلا والله - مع أني ولله الحمد أعيشها في بيت والدي - لكن لأني أحب الرجل العصامي الذي يبني بيته لبنة لبنة بما يرضي الله عزوجل ..
حينها سأكون خير عون له بإذن الله ..
الشيء الآخر :
تفرغ الفتاة لمملكتها " زوجها - وأطفالها " .
لاتعجبني الفتاة التي تعتمد على أمها في كل شيء أو بالأصح على خادمة أمها ،تأتيها لتنظف بيتها وتغسل وتكوي ثيابها وثياب زوجها ووووو...
مع أني أجزم أنها تستطيع القيام بذلك بنفسها !

حقيقة أشفق عليها لأنها لو علمت مقدار اللذة حينما تخدم زوجها وترعى مملكتها بنفسها لما فعلت ذلك ..

وفق الله الجميع لحياة زوجية سعيدة ..