سجن في بيتك وعذاب نفسي من اخوك !!!

[AboKhalid]

السلام عليكم


كل عام وانتم بخير

اعذروني لأني اخذت منتدى المعالي فضفضة ومشاكل ويعلم الله كل ذلك انه بسبب ثقتي باعضاءه ورواده

قبل كل شي ... اكبر مشكلة ممكن تواجهك انك تكون مكبوت ومحبوس في بيتك
والاسوأ يكون بيتك مقر تعذيب نفسي تتمنى تطلع منه وترتاح

كنت العام الماضي في بيتنا بالديرة بشئ من هذا الحال لكن شيء بسيط واعتبره عادي لكن ولى والحين انتقلت للجامعة بجدة واعيش في بيتنا بجدة مع اثنين من اخواني
اعتقدت ان الحين اقدر اخذ راحتي بما اني لوحدي اغلب الوقت وعالاقل اخواني شباب ويتفهمون حالتي

لكن اللي صار شي عكس تماماً ....
والله صرت اتمنى الطلعة وافتك من البيت .... اخوي جنني والله كرهني نفسي وحياتي والله كرهت ديني والله
انا مو صغير تراقبني وتراقب صلاتي وكل شي اسويه ... مو صغير تقولي اشتر عصير ولبن واشربها ... مو صغير تعلمني متى انام وكيف انام وكيف انظم نفسي
ممكن بعضكم يقول شي عادي مجرد نصيحة . صح نصيحة ... بس مو لدرجة كأني بزززر وما اعرف شي وجاهل .. اسلوبه يقهر
واذا تكلمت معاه وقلت له يقول انت عصبي وما تتحمل ...

وش اسوي حتى اثبت له اني اقدر اعتمد على نفسي واعرف مصلحتي ... غرفتي بالبيت واثثتها وركبتها بنفسي ومن مالي خاص - فلوسي صرت اكسبها بنفسي بدون ما اطلب احد ولا انتظر مكافأة - جالس اعمل في كتابة كتاب - والله ما اقولها مفاخرة لكن اعلمت بصعوبة حالته ،،،،، يعني مثلاً ادمن مخدرات حتى تعرف اني كبير ؟؟ ادخن ؟؟ اطلع برا البيت اسبوع ما تشوفني ؟؟؟ وش اسوي معه ؟؟؟؟

قسم بالله كرهت الصلاة ... والله من سنين هذي اول فترة اتساهل فيها من شدة زنته فوق راسي ليل نهار ..... اول كنت اصليها لربي واصليها بقلب مو الحين اصليها عشانه وعشان ارتاح منه - وحتى طاعاتي اللي قصرت فيها بسببه

لعلمكم هذا الكلام االي مكتوب فوق سبق وقلتله بوجهه لكن ولا كأنه يفهم ولا كأن اللي يكلمه انسان ... ويقولي هذا عشانك ، طب شوف نفسك اللي مو فالح بشي


امي تعبت معاه تنصحه ،،، ابوي لو اقوله والله اظن بتجيه جلطة بعيد الشر لانه اساسا طفشان منه


وش اسوي معاه ... اطنشه ؟؟ بس ما ينفع لأنه 24 ساعة فوقك
ما ودي اخرب العلاقة معه في بداية سكني معه مع اني اعتقد ان هذا الشي اللي راح يصير مثلي مثل اخواني
أضيفت عن طريق ma3aliMobile

[** قــطــز **]

حياك الله أخوي أبو خالد,
استشعر المشكلة التي أنت فيها بكل معنى الكلمة, تخيلت كيف لو أني مثلاً مكانك, بصراحة شئ متعب جداً !

فيه فكرة بس أحس أنها (بايخة) وفي نفس الوقت طريفة ! .. حاول تقلب المرآة تجاه أخيك, بمعنى حاول تسوي فيه مثل إيقاظ لعاطفته ولمدة شهر مثلاً بأن تتقمص الدور تجاهه بحكمة وروية, وحاول تكون جاد فيها وما تحسسه أنها سخرية وإذا وجدت منه أي اعتراض كن بارد الأعصاب ورد عليه بلطف وقل له "هذا من مصلحتك ليش انت كذا معصب؟! " وأنا أحب لك ذلك ومن هالكلام, ممكن يستشعر المشكلة ويتفهم, ويصحى من غفوته وعدم شعوره بما يجري لك بسببه.. ويبقى أنه أخوك والصبر عليه لك به الأجر والثواب عند الله, وكلها كم سنة وتمشي أمورك, لأن هناك أشخاص لا يمكن أن يغيروا من طباعهم بشكل عادي !

أذكرك أن أي قرار مصيري قد يكون منبعه سوء تفاهم وربما قد يكلفك خسائر كثيرة, لذلك حاول أن تضبط نفسك, وتصبر وتفكر في حل مناسب إلى جانب الذي اقترحته عليك إن وجدته مناسب الجدير بالذكر أنك قد تساعد أخوك في حل مشكلة ربما تسببت له مشاكل في علاقاته العائلية, والذي أقصده أنك بقدر ما تبقى عنده في البيت.. ربما يكون هذا دافع لأن تحل مشكلته وتجعله يصحو من غفوته.. وبكذا أنت سويت فيه معروف وهذا أخوك ويستاهل ! بقدر ما تجلس معه وتقترب منه لفترة أطول, بقدر ما تقترب أكثر لأن تساعده في حل هذه المشكلة.. صدقني, ستنبهر من جحم المحبة التي يكنها لك في قلبه, لكنه لم يحسن ترجمتها لك.. اعتبر هذه مهمة إنسانية وبطولية من قبلك !

الله يوفقك ويسدد دربك, بوركت أخي

[(الفارس الملثم)]

هذا حرص من اخيك ..ولو كان مبالغ فيه
اكسبه بالكلمه الحسنه
اذا قال لك قم للصلاه قل له ابشر ياطويل العمر < وقم للصلاه
الاسلوب الحسن طريق جيد للقلوب وامتلاكها
موفق

[[روح..[ح ـالمة..]

ليس كل الأخوة هكذا


فقط الأخ الحريص هو من يفعل ذلك


أوافقك أن كل شئ زاد عن حده سينقلب لضده ولكن بيدك أنت التقرب منه وجعل العلاقة بينكما كصيديقين وأخذ النصائح بأريحية فأنت في النهاية أخوه الصغير فعلاً


لي رجاء أن لا تجعل الشيطان يدخل بينكما


مسدد

[السندريلا رجاء]

كل العالم عندهم دبابيس زيك

يعني عيش حياتك ياسيدي ولاتزعل حالك

ادعي ربك ان يبدل احوالكم بخير منها

ولاتنسى اذكار الصباح والمساء

ودائما ادعي اللهم ياجامع الناس لليوم لاريب فية اجمعنا دائما على الخير والكلمة الحلوة

ويبقى اخوك الكبير يعني كلهم حركاتهم كدا

يعني بجد كل العالم زيك يعني انبسط

حاول تقول ان شاءالله طيب حاول تستشيروا بامورك عشان يحل عن سماك

قولوا خلينا اخوان احسن من نصير رئيس ومرؤس

بعدين تعالا ايش الهرجة هاذي مخدرات ودخان بجد تقهر وتقول الهرجة هاذي وتبغاة يحل عنك

اقول روق لا اقلب انا كمان هاذي حياتك انت مو مجبور تعمل حركات غلط عشان تبين انك كبير

انت كبير غصب عن الكل بس براحة على اخوك بجد والله معاة كل الحق يخاف عليك يااخويا

والله الدنيا تخوف واكبر شباب اتغيرت اخلاقهم يعني من سن الجامعة وياما سمعنا واكيد اخوك سامع

عشان كدا متخوف عليك اعذروا ولو فيلوا تضييق عليك يعني اتحملوا

وانت بتعيش العمر كلوا مع اخوانك يعني كلها كم سنة وكل واحد يصير باسرتة وبيتوا يعني

اصبر ومابعد الصبر الا الفرج

[AboKhalid]

** قــطــز **
يعطيك العافية سيدي .. طريقك راح اجربها رغم اني غير مأمل في نجاحها صراحة


(الفارس الملثم)
يعطيك العافية ... لكن ما اعتقد حلك فعال لانه بيزيده على اساس انه شافني اسمع لكلامه وما اسوي الشي الا بامره


[روح..[ح ـالمة..
يعطيك العافية ... كلامك صحيح واخواني كلهم والله فيهم الخير والبركة وفضلهم علي ما انساه لكن هذا بالذات عكس التيار مو بالنسبة لي بس الا لكل العائلة باختصار المشكلة مو مشكلتي بس ،،،، الله يهديه بس


أضيفت عن طريق ma3aliMobile

[AboKhalid]

السندريلا رجاء
يعطيك العافية ...ما ادري صراحة اش اقولك انا فاهم وضعه انه خايف علي لكن خوفه ويمكن حب لنفسه ( حسب ما فهمت من معايشته ) بتخلي الوضع يقلب بدل ما ينتبه يصير هو السبب - مرة طالع من البيت طفشان منه اخذت السيارة مو سيارتي طبعاً - وأشغل الاغاني على اعلى صوت - اول مرة اسويها وما كنت اتوقع اسويها ----- يعني الواحد اذا زهقان ممكن يسوي اي شي ينسيه

بخصوص الجزئية الاخيرة الرجال متزوج وعنده ولد  


أضيفت عن طريق ma3aliMobile

[السندريلا رجاء]

اولا اشكرك على صراحتك وتشخيصك لمشكلتك بدون لف وتعب

يااخويا لية تغضب ربك يعني انت لو سمعت اغاني وتاخرت بالصلاة

بتقهر اخوك لا انت بكدا ضيعت نفسك واغضبت ربك

شوف الاشياء والمعاملات الي بينك وبين ربك اديها باخلاص وبطاعة تامة

لكن لو اخوك طفشك حاول تفهموا بهدوء وبدون ماتتعصب وتفضل تقول كلام ويصير يشك فيك بزيادة

انا بقولك حاجة يااخويا بجد والله واتمنى لك كل خير

يعني من يتقى الله يجعل لة مخرجا ويرزقة من حيث لايحتسب

والله كان عندنا ابن جيراننا كان اخوة معذبة عذاب ضرب واهانة وكل حاجة ببالك

تتزعل وتكدر الخاطر كان اخوة يعملها والله ماكان يقول زيك مخدرات ودخان وكدا

لا بالعكس كان دائما يقول كلها كم سنة واتخلص وصابر ماشاءالله

والان ماشاءالله علية والله لو تشوفوا تقول هاذا عمرة بحياتة ماتكدر او حصلت لية ضائقة وامام مسجد

ويشتغل بارقى الاماكن

يعني اتمسك بصلاتة وحفاظة على امور دينة وصبر وربي عوضة ماشاءالله ربنا يزيدوا

وانت ماعمل معاك اشياء زي ابن جارنا بالعكس انت من خوفة عليك مو من طفشة منك

والله ابن خالة يقول ياريت عندي اخ كبير ينصحني واستشيروا رغم انوا ماشاءالله

عندة والدة والدتة بس الاخ الكبير نعمة مهما قسى

الله يسر امرك ويجعلك ربي من الذين اذا اصابتهم ضراء صبر واحتسب اللهم امين

بالله يااخويا لا تعتقد كل العالم مرتاحة

الي ماعندوا اخ دبوس عندوا اخرين اي نوع من الاقارب

عيش حياتك ولا تجعل اوامر اخوك موضوع كبير بحياتك ادي المشكلة وقتها وبس

يعني ادي الموقف حقة وبعدين انسى ولا كانوا هرجك من قبل

تعلم تضع لكل موقف حد بتفكيرك ولاتشغل بالك بموضوع واحد انت موفاضي

تقوقع حياتك لقضية واحدة وشخص واحد

خلاص ابغى توعدني انك ماتتعب حالك بالتفكير بمشكلة وحدة والله بنظري تافهة

خلية يقول الي يبغى وانت اعمل الي ربنا يبغاة وبعدين الي انت تشوفوا صح ومفيد ليك

دنيا واخرة...

[ميمْ]

عصير الليمون مع النعناع مفيد لكليكما ..

[.: الإمبراطورة :.]

حياك الله أخي ابو خالد
شكلك من النوع اللي بسرعه يتنرفز ويعصب
صحيح الأهتمام الزائد يطفش بس حاول تهدي اعصابك وكل ما قالك اخوك شيء قوله تم ، ابشر ، الله لا يحرمني من نصايحك وشوف كيف بيخف عليك وبيشوفك قد المسئولية وفاهم ~
احمد ربك على ان فيه احد يوجهك وينصحك استغل وقت النصايح ببلاش قبل مايجي وقت ودك بأحد ينصحك وصدقني اخوك مو حريص عليك هالقد الا لأنه يمكن كان بفتره يتمنى احد ينصحه ويرشده وما لقي فما يبغاك تحس بنفس الشيئ ~

الحين انت تشوف اخوك عليه بعض الملاحظات اللي المفروض يشوف نفسه ليش ماتصارحه فيها وتكلمه ترا مافيه احد يسوي الغلط ويكون راضي عن نفسه شوف هو يبغاك احسن الناس ويمكن مايبغاك تصير زيه فأنت سو معه نفس الشيء ،،
الله يسخركم لبعض ويحفظكم من كل سوء ~


أضيفت عن طريق ma3aliMobile

[’مرح’]

أعانكم الله

أنا اعرف مثل هذه الشخصية تماماً ..
واعرف أن التعامل معها متعب وصعب جداً ..
..

و في الحقيقة أن شخصية اخوك تعتبر شخصية قلقة ..
صحيح ما ينفع إنك تجاريه كل ما قال شي قلت طيب
بيصير من قلقه وخوفه لااااازم يحرص عليكم في كل شي بزيادة ..

اللي ينفع معاه من وجهة نظر شخصية ..
إنك تكسب ثقته ..
و لا تترك له مجال يحس فيه انك تحتاج نصيحه
يعني كلمك على نظام وقتك ..
لا تقول طيب إن شاء الله وأنت مو مقتنع بكلامه ..
قوله لا نظامي مناسب لي لأن ......
بكذا تريح نفسك وتريح أخوك ,,

حط في اعتبارك إن شخصيته قلقة
لازم توضح له موقفك عشان يرتاح ..

شي أخير لا تصلي إلا لله ..
و لا تترك صلاتك و إنت تسمع النداء

[الدختورة]

اشتري كتاب بوصله الشخصيه وان شاء الله تعرف تتعامل معه 000


اهم شئ علاقتك وعبادتك وصلاح النيه مع ربك لاتنحاس مهما انزعجت منه 00000

انت لما تفعل معاصي رده فعل منك من القهر ماراح تقهر اخوك ولاتريح نفسك انت مجرد فتحت الباب لشيطان يدمر دينك بنقطه ضعفك والنتيجه انك تضيع يمكن رضا الله عنك وهو الاهم 000

با التوفيق 0000

[بــ الصمت ــوح]

ياخوي جرب الإستغفاااااااااااااااار والله من جد علاج لكل شيء

كفايه إن الله قال: ((فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا

وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًاوَيُمْدِدْكُمْ بِأَمْوَالٍ وَبَنِين ))

والدعاااااااااااااء في الثلث الأخير من الليل وممكن تستعين بأحد الكتب مثل ما قالت أختنا *بوصلة الشخصية *

وأهم شيء اللي بينك وبين ربك أصلحه وربي حيصلح لك دنياك مو بس اللي بينك وبين أخوك

واعرف انو كل شيء يضايقك جاء بسبب خلل في صلاتك أياً كان هذا الخلل ..

والله يوفقكم ويثبتكم ويصلح قلوبكم ويسعدكم وإيانا دنيا وآخرة ..

* تحياتيـ..

[طير حوران]

كلن له مشاكل ...

انا تقريبا مثلك بس الفرق ان اهلي صاروا يتدخلون فيني لاتروح عند عيال عمك ولاتروح عند عيال خوالك تراهم يخربونك
ولاتطلع مع ربعك ايام الدراسه تراهم يبون ينزلون مستواك

المشكلة اني اكون مواعد لكن ابوي يجي يكسر كلمتي ويقول ان رحت لا ترجع !

ما ادري اهلي مايحسون اني سنة ثانيه في الجامعة ! احاول اني اطيعهم كل مره لكن ابقى متكدر الخاطر لكن بعض المرات تكون صكة فيني لدنيا فا اسحب عليهم لكن بعد ما تطلع مع ربعك تكون متدكر بسبب المرمطة التي حدثت قبل لا اخرج

فقل الحمدلله كلن له همه

[من حائل]

المشاركة الأصلية كتبت بواسطة (الفارس الملثم) هذا حرص من اخيك ..ولو كان مبالغ فيه اكسبه بالكلمه الحسنه اذا قال لك قم للصلاه قل له ابشر ياطويل العمر < وقم للصلاه الاسلوب الحسن طريق جيد للقلوب وامتلاكها موفق

كلامك رائع كروعتك فارسنا

معك بكل حرف كتبته

[ينابيع الوفاء]

[COLOR="

DimGray"]ممكن حلي يساعدكـ[/COLOR]:

قبل الأذان خلك في المسجد
صلي ركعتين قبل الصلاة
بعد الصلاة لاتطلع أقراء صفحتين من القراءن
قـل لأخوك شرايك في وقت فراغي وفراغك

نجلس نحفظ القراءن ونسمع لبعض
قم بجميع واجباتك قبل لايطلبها منك

وبما أن هو أخوك الأكبر أحترمه وقدرة

وأصبر ..

فلابد من يوم تتمنى الجلسة معاه

وتذكر أن هناااك موت يفرق بين الأحباب

بعيد الشر عنكم

أحسن له تنقى أجمل وأرق العبارات لترد عليه بها

إذا قابلك بالأسأة قابله بالأحسان

تذكر أن الله سبحانه

مع الصابرين مع المحسنين

حافظ على صلاتك أخي

حافظ على صلاتك

حافظ على صلاتك

ولا تترك الشيطااان يلعب بك

فو الله الصلاة هي سعادة الدنيا والأخرة

أكثر من النوافل والتهجد لليلاً

أكثر من الدعاء

أكثر من حمد الله وشكره

اسأل الله العلي القدير

أن يسخركم لبعض
ويوفقكم ويسعد أيامكم بطاااعته وذكرة