][ .. من أرض " أوباما " وعنـهــا أُحدّثكُم ..! .. ][

[إيـــلان]

رعاكَ الله يازمن الوفاقِ--------------
و يا وطناً تركتُ بهِ رفاقي
أشُـمُّ شذاكَ عطراً كلَّ فجرٍ--------------
و أسألُ خالقي قربَ التلاقي
و أعلمُ أنني لو كنتُ صخراً-------------
فدمعُ العين يؤذنُ بانشقاقِ

[إيـــلان]

بسم الله ؛


بعد أن عفّنت وعشّشت في أرض ذلك الـ ### يسرّني إهداؤكم هذا الموضوع ..
أرجو أن تتقبلوه بصدر رحب وتُقدّروا إنسانة اليوم فاضية وتبي تسولف ..
احمدوا ربّكم بعد تراه إجازة والا كان ما شفتوا شيء ..



قبل أبدا شوفوا هذا الإيميل :

الفرق بين لقافة الغرب والعرب السلام عليكم ورحمة الله وبركاته هذي مقارنه بين اسألت الناس في الغرب وبين اسألت العرب ,, أسئلة يسألها الناس في الغرب: ماعملك؟ هل يعودعليك بدخل جيد؟ هل يتماشى مع خططك الاقتصادية في الحياة؟ هل قرأت كتاب جون جف؟ أسئلة يسألها الناس (العرب) : وش يقالكم (عائلتكم)؟ يقربون لكم عيال فلان؟ وش يقرب لكم فلان اللي مع الملك؟ وين بتسافرون بالصيف؟ ليه زوجه ولدكم طلعت عنكم؟ بنتكم ماحملت إلى الحين

أنا بس أتكلّم عن نقطة بتوضّح قصدي ,
ما أقصد هذا الإيميل بالذات مثله مثل غيره من مسببات الضغط والسكر والحمّى ..

ليش هذي النظرة المثاليّة للغرب ؟!
مو بس اللي كاتب الرسالة , يقهرني إن مجتمعنا أيييي عيب فيه يقولون عنه حنا عندنا وعندنا والغرب ماعندهم !
ولو أحلف إنهم ما يعرفون منهم غير كلمة [ الغرب ] , والا شايفين فلم فيلمين يقيسون عليهن !

عرق اللقافة متأصّل ومزروع ومغروس في فطرة المرأة أيًا كانت .. ثث
مع شديد الاعتذار للمرأة اللي مب ملقوفة ..

صح إني أنا ما أسمّيها لقافة بس هذي سواليف الحريم عاد وش نسوي ..
جرّبت حريم من الغرب والشرق .. كلّهم كذا .. لا بعد بحلّ يا حريمنا ..
هذولي ماعندهن تسألك بالتفصيل وماعندها مشكلة ..
والخبر يووووووه ياحليلهم حريمنا ينقلن الأخبار من تحت لتحت وعلى شوي شوي ..
ذولي مافيه تفاهم مبااااشرة يُنقل الخبر .. عاد أنتي موجودة والا مب موجودة ,, دريتي والا مادريتي بكيفك !
أهمممم شيء ينتقل الخبر بأسرع ما يمكن ..
وليته أخبار تسوى ! أييي شيء !
بالصيف اللي راح سافرنا لمدينة حولنا , كبيرة ومشهورة ..
بعدما رجعنا بدت وحدة تسألني وش سويتي الأيام اللي راحت ومدري ايش ..
قلت لها بكل هدوء إني سافرت .. انهبببلت وقعدت تسأل وش سويتي ووش شفتي ووين رحتي ..
كبّيت كل شيء وقلت لها كل اللي سوينا هناك !
بعد عشر دقايق جتني وحدة ثانية وأووول ما شافتني قالت :
صدق سافرتووووا ؟!
فلانة تقول وتقول وتقول .. قولي لي شسويتي بعد ؟ ورحتي للمدري ايش ؟ وشفتي المدري كيف ؟
ههههههههههه بسم الله ما أممممدى طيب !

ويكون بعلمكم هذولي أستاذاتي ترى .. ثث
وذاك مو الموقف الوحيد !

يعني [ أمريكيات ] يعني غرررب مو عرب ..

برضو من اللقافة , مرة كنت رايحة مع وحدة من الأكوادور ( من أمريكا الجنوبية ) ودقّ زوجي ,
ردّيت عليه وسكّرتها طبعًا هي مافهمت شيء عشان كذا لازم تسأل مو معقولة ماتدري وش قلت ..
قالت : هذا شسمه ؟
قلت : إيه .
قالت : وش يبي ؟
قلت لها وش يبي وتسأل آهااا قلتي كذا ؟ وقال كذا ؟
متحمسة من قلب المرة ..

هي نفسها , مرّة دقّ منبّه جوالي ..
قالت وش هذا ؟
قلت المنبة , قالت ليش يدقّ الحين وش عندك ؟

طيب خلّوا من هالثنتين ,
مرة لبست نظّارة , وكانت ذيك أول مرة ألبسها ,
من بكرى مالبستها .. فـ جتني كوريّة كانت غايبة أمس تسألني :
صددددق أمس لبستي نظااااارة ؟؟؟؟

والمواقف كثييييييير ,, غير الأسئلة المتكررة مع كللل وحدة أول مرة أشوفها :
أنتِ من وين ؟ كم عمرك ؟ متزوجة ؟ عندك أطفال ؟ زوجك وش يسوي ؟ وش تخصصه ؟ بأي جامعة ؟
من متى جايين ؟ متى ناوين ترجعون ؟ .... الخ

المهم , الشيء اللي أبي أوصل له :
ليش شايفين أنفسنا بالحضيض وأي عيب عندنا نقول حنا وحنا .. مب مثل الغرب !
ملائكة هم يعني ؟


خوذوا مثال ثاني لهذي النقطة ,
مرة وحدة كاتبة : حنا نخاف من العين والغرب ما يعرفونها مع إنهم أحلى منا !
نسيت من اللي كانت كاتبته لعلها تسمح لي أعلّق على كلامها من هالناحية بس ..


عشان ما تقولون إني أخربط بجيب لكم المعلومة من عمّي ويكيبديا ()

Belief in the evil eye is strongest in the Middle East, East and West Africa, Central America, South Asia, Central Asia, and Europe, especially the Mediterranean region

يعني مب بس عندنا !
واللي تحتهم خط أهم شيء ..
صحيح إنه في أمريكا الاعتقاد فيها قليل مرة ..
لكن الغرب مو بس أمريكا !
يعني عشان حنا نؤمن بالعين نعدّه عيب عندنا والغرب اللي مليانين اعتقادات - من ضمنها العين - وخرابيط فاضية أحسن منا !

يا ناس أصييح أنا والا شسوووي بعمري ؟
لييييش كذا ليييش ...
<- تحمّست سكتووووها

[إيـــلان]

ما أنكر إن للأمريكان خصوصًا مميّزات خياليّة ..
من جددد ما ألوم اللي يُعجب بهم ويحبّهم !
أخلاااق عسسل ما تخيّلونها لو مهما وصفت ..

طبعًا وشيء أكيييد مو كلّهم .. فيه أقلية منهم يشوفون أنفسهم أحسن شيء ,
ويحتقرون الناس ومافيه أحد زين مثلهم ..
هذا وهم في الغالب فاشلين وهمّهم الأكل ,.

أنا ما أتكلّم عن هذي الأقليّة كونها أقليّة , أو يمكن مب أقلية بس محصورة بولايات معينة وناس لهم تفكير معين , وما أحكم فيها على كل المجتمع ,
ومااا أتكلّم عن الدولة أو السّياسيّين كلنا عارفين بلاويهم ..
أتكلّم أنا عن عامّة الشعب .. " عشان لا يجيني شي ثث "


أذكر أول ماجيت من الأصل متلخببطة وحوووسة , فـ مستحيل أفهم إلا بسبّورة ..
رحت لمحلّ , وهو بيحاسب لي مدري وش يقول لأنه يحكي وهو ملتفت وإلا وهو يشتغل وبسرررعة ما يمدي أفكّك كلامه !
كل ماقال شيء خليته يعيد ..
تفشّلت قلت بيقول وش ذي ما تسمع ,,
فـ اعتذرت وقلت ما افهم بالمرّة عشان كذا خليتك بس تعيد لي !
تقلللللللب وجهه وحسّ نفسه غلطااان .. وبدأ يعتذذذر ..
ما تخيّلت أبدًا بيكون هذا موقفه .. ع بالي أنا الغلطانة أصلاً ..

بعدها صارت تتكرّر هذي المواقف كثييير ..
لو هندي عندنا كان كلّن يضحك عليه !
وياويله لو قال كلمة غلط أو نطق شيء غلط !

والله ولا بمرّة أحد ضحك على كلامي , أو ع الأقل وضّح لي إنه كلامي يضحّك !
مع اني دارية إن كله أخطااء ولهجتي نفشّل بس لو ايش ما يقولون شيء ولا بنظرة ..!!
حتى مايجي ببالهم شيء يعرفون إن هذي مب لغتك الأصلية .. كثّر خيرك يوم صرت تحكي بس !
<- أحس بتقولون وين الهواش اللي توّ على اللي يقارنون ويقولون هم أحسن منا ! ثث
اللهم إني قلت وسأظل أقول إنهم أحسن منا ببعض الأشياء وهذي يحق لنا نقارن فيها لعل وضعنا يتعدّل ,
لكن مب كل عيب بنا نقول هم مب عندهم !
يعني مب العرب أسود والغرب أبيض .. أي شيء عكس بعض ..!

برضو البحلقة أوقح شيء بالحيااااة !
أحيانًا أستغرب أقول مع إن شكلي غريب شلون ما يلفت إنتباههم ..
أحس لو أنا غصب عليّ ألتفت .. أو أناظر باستغراب ..
هم عااادي عندهم .. ما أتضايق معهم أبد !
ما أقول مافيه ناس مستغربة مني أو تناظرني لكن مب الأمريكان ,
هذيك الأشكال أشوفها بالمطارات , أو بالمدن السياحية ..
والأماكن اللي يكون فيها ناس كثير وبعضهم ما تعودوا على الناس اللي غيرهم ..
وبالذات الهنود >< والمكسيكيين !

مرّتين بس اللي بحلقوا بي أمريكان ,
مرّة وحدة وشكلها عجزت تتحكّم بأعصابها تحط عينها علييي وإذا ناظرتها التفتت ,
شوي وترجع لي .. وعلى هالحال قعدنا شوي ..
هي تفششششلت يوم طلعنا قالت حجابك مرررررة حلووو .. حبيييت ألوانه !
واضح إنها تصريفة .. بس قبلتها , يكفيني إنها حاسّة بالغلط واعتذرت بأسلوب غير مباشر .,


أما الحررررية عندهم شيء ثااني ..
كنت أحسبه الحرية اللي على كيفهم ,
زيّ الناس اللي عندنا فاهمين الحريّة غلط !
يجونك - الليبراليين مثلاً - ينشششب الواحد إلا سووا كذا .. وإذا جادلوه قال حرية ما تعرفون الحرية أنتم !
طيب بما إنها حرية أنت يا## خلنا بحالنا ! مو هي حريّة ؟!

المهم , هنا أنتِ حرة سوي اللي تبين اللي تبين , محد بيقول شيء ولا بينكر عليك ..
سواء خير أو شر .. طبعًا أنا ما أأيّد هذا انه يكون في بلد مسلم ,
لكن بمثل أمريكا ميزة كبيييرة لنا كمسلمين عالأقل !

عادي الواحد ينسدح بأي مكان , يغنّي بأي مكان , يصيح يسوي اللي يبي ..


الشيء اللي يقهرررر صدق ,
الموسيقى !

بكللل مكااان , أحس الدنيا كلها شياطين أعوذ بالله !
<- اللي بالفيس بوك بيقولون أنتي وهالشياطين يوم بيجون مع الكلاب ويوم مع الموسيقى ..

صدق يعني مكان كلّه موسيقى وكلاب .. وش باقي غير الشياطين ..؟

[إيـــلان]

الحين حسّيت ب [ بدأ الإسلام غريبًا وسيعود غريبًا كما بدأ ] .. أو فيما معناه ,
من جد ناس مااا تدري وش الإسلام , ومو قادرة تستوعبه أصلاً ..

برمضان , كان فيه كثير عارفين إننا نصوم , المهم جت كوريّة تسألني عن الصيام ووش لون نصوم ومدري ايش ..
قعدت أقول لها إنو ما نأكل شيء بالنهار , نصوم قبل طلوع الشمس إلى الغروب ..
قالت : يعني الشمس ربّكم ؟
تأكلون وتشربون إذا راحت عشان ما تدري بكم ؟

هههههههههههههههههه قلت اييييييييييش لااااا ..
عاد هي نصرانيّة وعارفة خطورة اللي هي قالت لأنهم يؤمنون بوجود إله ,
قعدت تعتذر ومدري ايش قلت ما ألومك كونك ما تعرفين شيء عن الصيام أو الإسلام , أنا اللي قاعدة أقول لك شروق وغروب وهي مجرّد توقيت مالها علاقة بالعبادة نفسها ..

كورية ثانية تشوفني بالحجاب ومرة سألتني قالت هذي تقاليدكم باللباس قلت لها لأ مو تقاليد هذا شيء ديني ومدري ايش ..
جيت مرّة وقبل الكلاس جتني مسسستغربة قالت شفتك أنتي وزوجك الصبح .. زوجك مو مسلم ؟ والا ليش ما لبس حجاب ؟
لا شعوري ضحككت .. بس أنا الغلطانة ما فهمتها صح , ولا علّمتها وش الحكمة منه عشان تعرف إن المرأة تتستر فيه عن الرجل ..

الحجاب مسوي سالفة عندهم , مرة يابانية تسألني تقول :
إذا جيتي تنامين تشيلين حجابك ؟
مسيكينة ضايق صدرها علي تحسبني أربع وعشرين ساعة لابسته ..
قلت أنا من يوم أدخل بيتي يد أسكّر فيها الباب ويد أشيل فيها الحجاب ولا يبقى عليّ ولا لحظة بداخل البيت ..

ومرة تكلّمنا بالإكسسوار , قالت لي وحدة , أنتم تلبسون اكسسوار ؟
تحسبني ما أعرفه ..
هنا بغيت أصيح عييييوا يفهمون علي .. قلت يانااااس ألبس كللل شيء بس هذا لحجاب ألبسه بالأماكن العامة أما بالبيوت بالمناسبات ماا نلبسه نلبس أحسن لبس وأحلى اكسسوار وكلّ شيء !


من هالحجاب صرت كلما أشوف دورات مياه أدخلهن ,,
ليش ؟ بس عشان أسوي يقال اني أعدل حجابي وأنا أبي الناس تشوف إني طبيعية ومب نقص ولا عيب بي أتحجب عشانه ..
عاد مرّة دخلت وكان فيه يابانية تغسّل وقفت عند المراية جنبها وشلت شالي بعدّله ,
يوم خلصت الفتت عليّ وهي مستحية قالت : ممكن أشوفك ؟
قلت ايه طبعًا , ناظرتني ولازم طبعا تعلق انك حلوة ومدري ايش ..
<- من باب الأدب يعني مب عشان خشتي الجميلة ..
هههههههههه طيب شوفي محد قال لا أنا ليش شايلته أصلا ..
بعدين فهمت موقفها إنه يمكن تحسبنا نستحي أحد يشوفنا مثل اللي طالع شي من عورته ,
صح طااالع بس عيب أحد يشوفه .. عشان كذا غضّت البصر عني ..




تذكرت موقف صار العام , قبل يوم الإيستر للنصارى والباس أوفر لليهود ,
صارت الأستاذة تشرح لنا عن تاريخ هذي اليومين وقصّة موسى وعيسى - عليهم السلام - ..
بالبداية الباس أوفر وقصة موسى ماكن فيها اختلاف عن اللي عندنا إلا شيء بسيط ,
- مدري عن القصة كاملة عند اليهود يمكن تختلف بالمرة , بس موجز القصة فيه اختلاف بسيط -
بعدها بدت بقصة عيسى والخرابيط والأشياء اللي يقولونها !
انتهت منهم تركتنا نتناقش مع بعض عنها ,. وذاك الكلاس كان أغلبــه يابانيات ,
واليابانيين بالغالب مالهم دين , أو عندهم دين بس اسم عشان تمشي أمور زواجاتهم ومدري ايش ..
أنا هنا عجزت أصبر , مستحيل أناقش الموضوع مع طاولتي وأنسى القصّة اللي عندي ومصدّقتها وأقول خرابيطهم ,
قلت للي بطاولتي إنها عند المسلمين تختلف شوي , لأن عيسى ما صُلب و و و ,
سمعتني المدرسة , وسكّتت الكلاس وقالت لهم إنو الإسلام واليهودية والنصرانية لها نفس الأصول ,
وهذي القصص عندنا كلنا لكن مع مرور الزمن والروايات اختلفت القصة من مكان لمكان , خلّونا نسمع منها - يعني انا ثث - ايش القصة عند المسلمين ,
قلت لها الفرق في قصة موسى بحكم إنها أسهل , أما قصة عيسى كانت أصعب ولغتي ما تساعد فـ قلت بأبحث وأقول لكم .. لأني مو قادرة أشرحها بلغة ثانية ..

قبل نطلع قالت لي لا تنسين تجيبينها !!
وببداية الكلاس اللي بعده قالت جبتيها ؟ وخلتني أقول اللي عندي وكل الكلاس يسمع ..
وش أقول لكم بس عنها .. من جددددد أعجبني موقفها وتركها لي مجال أتكلم والكل يستمع لي ..
أصرّت إلا إني أقول اللي عندنا مع إنه مخالف للي عندهم ..!!



ما قلت لكم أمريكان ..

[إيـــلان]

هالسّعوديين من جد يقهرون ..
أول ما جينا وحنا بالمطار جالسين ننتظر , فـ جوا يسألوننا اللي عنده رحلة يمشّونه أوّل عشان يلحق ..
كانت الأمريكية تدور عليهم وتسألهم وفيه مجموعة شباب بالموت فهموا وش تبي .. وجاوبوا جواب مدري وش يبي ..
أصلا مو فاهمين عليها ولا قدروا يفهمونها اللي يبون ..
يوم تعدّهم للي بعدهم قالوا : [ والله شكلك ماعندك سالفة ] وقعدوا يضحكووووون ..
ههههههههههههه الحين حاسّين انهم شيييي يوم انهم ضحكوا عليها من وراها دامها ما تفهم عربي ..
إذا صرت ماعندك سالفة ياخي ابلع لسانك ع الأقل ..

من جد بعض السعوديين هنا ودي أتبرّأ منهم .. :s
الواحد يحسّ بغربة وهو بينهم .. فاهمين التطور غلط .. وهذي أكثرها تكون باللي يجون كم شهر ويرجعون ,
أو جايين اصلاً منهبلين على أمريكا ..
أو بعض الحريم اللي ما تدرس ولا خالطت الناس اللي هنا عشان تعرفهم صح ,
بس تشوفهم من بعيد وتحسّهم أطور شي !!

قلييييل مررة قليييل يكون فيه أحد جلس مدة ولا شاف عيوبهم ,
حنا نجيهم حاسّين بنقص , أو بالأصح عندنا عيوووب متضايقين منها .. فـ إذا جينا وما شفناهم يسوون مثلنا خلاااااص حسيناهم ملائكة ..
عشان كذا أقول غالبًا اللي يجي كم شهر ما يمديه إلا إنه يشوف المميزات ,, لأنه متعطّش وفاااقدها ..
لكن ماراح ينتبه إن عنده مميزات مب عندهم , والإسلام أكيد أكبببر نعمة ..



مع إن الأمريكان جدددددا يقدرون اللي يتمسّك بمبادئه ,
والفئة الأمريكية الشينة أصلاً ما يعجبها العجب , ولا يسوى إنا نلاحقهم !

وحدة من صديقاتي تقول كنا ننقل من بيت لبيت , وجاء صديق زوجها ( أمريكي ) يساعدهم ,
تقول وحنا نحوس بالبيت وأنا معهم بس ما نزلت حجابي أبد بما إنه فيه ,

بعدما خلصوا وقبل يطلع تقول التفت علي وقال لي :
أنتِ ثابتة !
ومتمسّكة بمبادئك حتى داخل بيتك !
أهنئك على هذا , وأشجّعك عليه ..... و و من هالكلام طبعا مب هذا اللي قاله بالضبط لكن كلام مثل كذا !
تقول أعطاااني قوووة وشجاااعة واعتزاز بشكل ..

في وقت المسلمات يقنعونك تخففين حجابك .. وتتنازلين عن بعضه إذا ماكان معظمه !


وهذي وحدة أمريكية , كنت معها ذاك اليوم , وجاء كوري تعرفه ..
صار الكوري مغيّر اسمه لـ جوش ..
فشششششلته تفشيييل عاد هي صرييييحة وراعية تعليييق ما تخلي أحد ..
قالت له كم لك بأمريكا ؟
قال شهر !
قالت : يخ! - هذيك حقتهم اللي يقولونها إذا حامت كبودهم مدري شلون تنكتب .. ثث -
وتبدأ تردد جوش جوش جوش :مكشّشّشّر: ..

اسسستحقرته , وقعدت تقول له لا أشوفك المرة الجايّة بشعر أشقر !!
بعذرها والله ., شيء مقرف ماله إلا يومين وغيّر اسمه !

[إيـــلان]

أهم شيء لهجتنا الانجليزية التحفة ..
يا أنا أضحك ضحك كلما تذكرت شلون كنت أنطق بعض الكلمات ..

مثل الـ p هذا بالموت عرفته بعدما نشبوا لي نشبة وعدّلوه لي ..
مرّة جت وحدة اللي أقول لكم خبلة وما تتراك أحد بحاله ,
قالت أنتم يالعرب بتتعشون تقولون : بيتزا اند ببسي بليز !
وقالتهن كلهن بالباء القويّة حقّتنا .. متتت من الضحك عليها والله كنها وحدة منا اللي تحكي !
ومن ذاك اليوم حسييت بفرقها وأهميتها ..

من مميزات لهجتنا إنه لو عندنا كلمة فيها حرفين مدّ ,
حنا نمدّ الـ قبل الأخير بما إنه عارض للسكون ..
لكن هم بالعكس يمدّون الأول ..

وحدة من الأستاذات اسمها ( كاثريــن ) .. مرة مدري وش أقول لأستاذة ثانية وتكلّمت عن كاثرين .. بس قهرتني عيييت تعرف من هي !
مطيرة عيونها وتقول لي مين كاثرين ؟
بالموت فهمت .. قالت آهاااااا تقصدين ( كـاثرِن )
انتبهت اني من عمري وأنا أسمّيها غلط بس ماقد سمعه مني غير السعوديات فـ ما انتبهت أصلاً ..

المشكلة حنا هذا الشيء بلغتنا الأصلية وهم أحيانًا ما يفهمون عليها !
مرّة ثانية ,
وعند أستاذة ثانية , مدري وش قلت أنا قلت ( روبوت ) ومافهمت وش أقصد !
إنا لله عاد مابقى إلا الروبوت ما يدرون وشو !

أنا سكت ومشيت السالفة ما يحتاج نضيع وقتنا عليها .. بعد شوي هي مدري وش قالت ( روبُت )
انتبهههت وكأن أحد معطيني كفّ يقول نسيتي كاثرين ! انسي لهجتك تكفييين !


على طاري كاثرين , هي أستاذة الرايتنق ,
كانت كل كلاس تعطينا شيء نكتب عنه بنفس الكلاس ,
مواضيع بسيطة يعني مو واجبات .. أهم شيء نكتب ..
فـ جت مرة قالت اكتبوا عن المدينة اللي حنا فيها .. أنا بكل حماااس مدحت الطبيييعة اللي هنا من ضمن الكلام اللي كتبت ..
مرّة ثانية وبموضوع ثاني كتبت أنا عن الرياض .. وشرشحتها شرشحة ..
الجو زفت والطبيعة زفت وأصلاً أنا أحبها بس عشان الناس اللي فيها لكن كمدينة سياحة أبدا ما تنفع ..
ومن هالكلام ..
قرت اللي أنا كاتبة وقعدت تضحححك قالت عشان كذاااا ذاااك اليوم تمدحين مدينتنا ..
طبعا هم ما شافوا مدينتنا شي , يبون طبيعة صدق ما يكفيهم الخضرة والأشجار !
حسّيتني مسكيييينة ما صدّقت أشوف شجرتين ونهر واستانست بهن ..

<- بيجيني أحد يقول ليش سبيتي وش يضرّك لو مدحتي ؟
أقول هم مب أغبياء ولا عميان ولا صم ولا بكم , والشمس لا تغطى بغربال !


عاد هم شيييي عندهم التراب ,
لو اني دارية وقتها كان تكلّمت بالنفد والثمامة بينهبلون بس ماجت على بالي ..

بولايتنا فيه نتفة نفودين مستانسين بهن المساكين ,
كانت وحدة أمريكية يوم شفنا صورة رمل - مثل ذيك اللي على دليل الهاتف منوّل ما أعرف غيره - قالت لي : تخييييلي مثل هذي الصورة موجودة عندنا !
بس ساعتين من هنا ..
قعدت أقول في نفسي : أنّى اتجهت في السعودية فهذه الصورة في وجهي ..


بالصيف كنا رايحين حولها قلت يلا خل نشوف نفود أمريكا .. يا حياااتي نتفة وسالفة بس عشان تفرجين وكان ودك تنزلين تلعبين بالتراب وارجعي .. ههههههههه
لا يفوتكم بس مواقف وبوّوابة قبلها وحركات




أما النفود الثاني مب للعب محطّين مطلّ عليه توقفين وتتفرجين عليه من بعيد وإذا تبين تصورين عنده ..

بعذر كاثرين لو ضحكت علي يوم اني استانست بشجرتين ,, أثره هذا الحال عندنا !

[إيـــلان]

تبون زيادة ؟

قد يكون فيه جزء بسيط لصور توضح فصول السنة ,
الحين ملّيت وتعبت .. :s

أدري طويل ويبي له ساعتين قراءة بس ما حبيت أحطه أجزاء ما تسوى عليّ هالخرابيط أقطّعهن ..
مع العلم إن بعض الأشياء تمّ حذفها تخفيفًا عليكم .. فشكرًا لي ..

[إيـــلان]

[poem font='Traditional Arabic,4,,' type=0 align=left bkcolor='' bkimage='' border='none,4,' num='0,']رقصَ التذكـّـُر والنـّوى ناداني=حَنَّ الفؤاد لموطنِ آواني
الأهل فيه وصُحبتي وأحبتي=والدارُ لا أنسى مَعَ الجيرانِ
في كـُلّ يومٍ موطني في خاطري=والقلبُ يَخفـِقُ دائمَ التَّحْنانِ
لا المالُ يُنسي أنـَّني متغربٌ=كُلُّ النعيم فلا أرى أنـْساني
مُتـَغَرِّب ٌبالجسم أحيا غـُرْبتي=وهناك في وطنِ الجدودِ جَناني
في كـُلِّ رُكْنٍ لي هنالك قصةٌ=في مسجدي في حَلْقةِ القرآنِ
في سَهْرةٍ مَعَ أسْرتي وأقاربي=في مجلسٍ للصَحْب والخلانِ
في سَفـْرَةٍ مُتجولٌ في موطني=وزيارةٌ للبحر والشُـْطآنِ
أين الْـتـَفـَتُّ ولو لحبةِ رملة=مهما ذكرتُ تَهَيَّجتْ أشجاني
لا بُدَّ من بَعْدِ الغيابِ لعودةٍ=وترى التعانقَ طاب بالأحضانِ
ويقولُ بعضُ الصَّحْبِ مالـَكَ شاردٌ=في الذهن أنْت بغالبِ الأحيانِ
فأجبْتـُهُمْ وطني بكلِّ دقيقةِ=أحياهُ حتى في المنام أتاني
إني لـَمُشْتاقٌ ولكن صابرٌ=لولا التـَّصبّرُ بُعْدُهُ أذواني
يا أيها الوطن العزيز الا اصْطبرْ=لا بُدَّ أن ألقاكَ أوْ تلقاني
لا شئَ في هذا الوجود بخالدٍ=إلا الإله وما له مِنْ ثانِ
فالنفسُ آمِلَةٌ وإني ناظرٌ=لليوم ِ فيه أعودُ للأوطانِ
وَيْحَ ابنُ آدم َ أيْنَ حـَلَّ بـِغـُرْبَةٍ=لا دارَ الا جنة الرِّضْوانِ
فهناك موطننا الأصيلُ حقيقةً=قـَدْ عاش فيها قـَبْلـَنا الأبوان[/poem]

[ثمة ثرثرة..!]

نسيت نفسي وأنا أقرأ
ما شاء الله عليك ..
حجز ولي عودة - بإذن الله - =)

_______________

عدنـا ..

نقطة ائتلاف : لكل مجتمع إيجابيات وسلبيات ، والكمال لله وحده .

بعد عشر دقايق جتني وحدة ثانية وأووول ما شافتني قالت : صدق سافرتووووا ؟! فلانة تقول وتقول وتقول .. قولي لي شسويتي بعد ؟ ورحتي للمدري ايش ؟ وشفتي المدري كيف ؟ ههههههههههه بسم الله ما أممممدى طيب !

ههههههههههه من جد .. وكالة أنباء ما شاء الله لا إله إلا الله ..

هي نفسها , مرّة دقّ منبّه جوالي .. قالت وش هذا ؟ قلت المنبة , قالت ليش يدقّ الحين وش عندك ؟

يا لييييييل
الله ياجرك

***
موقف المحاسب ..
يا حيّه .. ، لو عندنا ..[ ونتكلم نفس اللغة ] بيكون إحدى حالتين : إما بينفخ عليك
أو بيمشي ويتركك تكلمين نفسك

اللهم إني قلت وسأظل أقول إنهم أحسن منا ببعض الأشياء وهذي يحق لنا نقارن فيها لعل وضعنا يتعدّل , لكن مب كل عيب بنا نقول هم مب عندهم ! يعني مب العرب أسود والغرب أبيض .. أي شيء عكس بعض ..!

أحسنتِ

شفتك أنتي وزوجك الصبح .. زوجك مو مسلم ؟ والا ليش ما لبس حجاب ؟

هههههههههههههههههههه
أتخيّل أشكالهم بالحجاب

ليش ؟ بس عشان أسوي يقال اني أعدل حجابي وأنا أبي الناس تشوف إني طبيعية ومب نقص ولا عيب بي أتحجب عشانه ..

أعجبتني الحركة

وش أقول لكم بس عنها .. من جددددد أعجبني موقفها وتركها لي مجال أتكلم والكل يستمع لي .. أصرّت إلا إني أقول اللي عندنا مع إنه مخالف للي عندهم ..!!

اشكريها عني ..

كانت الأمريكية تدور عليهم وتسألهم وفيه مجموعة شباب بالموت فهموا وش تبي .. وجاوبوا جواب مدري وش يبي .. أصلا مو فاهمين عليها ولا قدروا يفهمونها اللي يبون .. يوم تعدّهم للي بعدهم قالوا : [ والله شكلك ماعندك سالفة ] وقعدوا يضحكووووون ..

الأشكال هذي تضحكين إذا شفتيها ..
مـدري هي شماتة .. ولا رحمة ولا وش

وهذي وحدة أمريكية , كنت معها ذاك اليوم , وجاء كوري تعرفه .. صار الكوري مغيّر اسمه لـ جوش .. فشششششلته تفشيييل عاد هي صرييييحة وراعية تعليييق ما تخلي أحد .. قالت له كم لك بأمريكا ؟ قال شهر ! قالت : يخ! - هذيك حقتهم اللي يقولونها إذا حامت كبودهم مدري شلون تنكتب .. ثث - وتبدأ تردد جوش جوش جوش :مكشّشّشّر: .. اسسستحقرته , وقعدت تقول له لا أشوفك المرة الجايّة بشعر أشقر !! بعذرها والله ., شيء مقرف ماله إلا يومين وغيّر اسمه !

ههههههههههههههه
حبيتها .. عرفت له
يا شين الانبهار اللي على غير سنع :/
الله يعافيهم ولا يبلانا .

****

قالت أنتم يالعرب بتتعشون تقولون : بيتزا اند ببسي بليز ! وقالتهن كلهن بالباء القويّة حقّتنا .. متتت من الضحك عليها والله كنها وحدة منا اللي تحكي !

الـ P دايم نغلط فيها ، بس تمرّ .. عادي ، ونقدر نتغاضى عنها ..لأنها تتكرر مرة أو اثنتين في الجملة فـ عادي
بس يوم قرأت الجملة وحرف الـ P متكرر 4 مرات حسّيت بالبشاعة :P

وحدة من الأستاذات اسمها ( كاثريــن ) .. مرة مدري وش أقول لأستاذة ثانية وتكلّمت عن كاثرين .. بس قهرتني عيييت تعرف من هي ! مطيرة عيونها وتقول لي مين كاثرين ؟ بالموت فهمت .. قالت آهاااااا تقصدين ( كـاثرِن )

ههههههههههههههه
هنا ضحكت كثيرًا ههههههههه

كانت وحدة أمريكية يوم شفنا صورة رمل - مثل ذيك اللي على دليل الهاتف منوّل ما أعرف غيره - قالت لي : تخييييلي مثل هذي الصورة موجودة عندنا !

لاحظت على كذا شخص غربي إنهم يعشقون ومهتمّين بالثقافات والعادات والتقاليد السعودية
خصوصًا لو كانوا قد زاروا السعودية أو قرؤوا عنها ..
أذكر فيه دكتورة عندنا أمريكية والثانية كندية ..
يموتون بشيء اسمه السعودية ( طبعًا هم نصارى ) لكن يحبون كل شيء له علاقة بالثقافة السعودية
يلبسون عبايات ( عن رغبة ) يعشقون القهوة العربية والتمر
حتى مرة قالوا نبي نأكل أكلاتكم الشعبية
وما قصرنا معهم .. قدّمنا لها هريس وجريش وكبسة
كانوا يسألون عن كل صغيرة وكبيرة .. يلتقطون صور وكذا
يجننون وه

الخلاصة .. عادي مثل ما إنّا منبهرين بالطبيعة والأجواء عندهم ( لأنه معدوم عندنا )
هم منبهرين بطبيعتنا وأجوائنا اللي حنا نتذمّر منها .

جزاك الله خير إيــلان ..
الله يثبتك ويجعلك سبب في هدايتهم ..
من زمان عن الردود الطويلة .. بس ولو .. موضوعك وأسلوبك يجبر الواحد يكتب ويكتب =)

[إيـــلان]

hus

.:.

حسافة تصدقون توي أنتبه إني ما حشّيت بهم كثير ..
هذا وهم كفار وعادي الحشّ ..
يلا إن شاء الله مرّة ثانية ..

استغفر الله إن شاء الله ما أتعود على هالحال ,, آخذة راحتي بما إنهم مب مسلمين ..
والبنات كذا كل السواليف حشّ , الله يغفر لنا من أصلنا نحش مع تأنيب الضمير , وهنا لا تأنيب ضمير ولا حاجة ..
لو بياخذون أجري خلّص كله على تاتيانا الزفتة .. ><

خوذوا هذي فائدة ,
قال شيخ الإسلام ابن تيمية رحمه الله تعالى (28/225) :

( فكل صنف ذمه الله ورسوله يجب ذمه ، وليس ذلك من الغيبة ، كما أن كل صنف مدحه الله ورسوله صلى الله عليه وسلم يجب مدحه ، وما لعنه الله ورسوله لعن ، وكما أن من صلى الله عليه وملائكته يصلى عليه .
فالله تعالى ذم الكافر ، والفاجر ، والفاسق والظالم ، والغاوي ، والضال ، والحاسد ، والبخيل ، والساحر ، وآكل الربا ، وموكله ، والسارق ، والزاني ، والمختال ، والفخور ، والمتكبر الجبار ، وأمثال هؤلاء ) أ.هـ

؛

ثمّة ثرثرة ,
أنتــظرك ()


نسيت أكتب مصادر الأبيات ,
الأولى لشاعر فلسطيني أظن يقال له أبو صهيب ..
والثاني مدري مين .. بس مو أنا اللي كاتبتهن ..


للأمانة بس بعلمكم خفت تحسبونها من قصائدي الجديدة ..

.:.

[مربى التُوتْ ❀]

قريته حرف حرف
ماشاء الله تبارك الله سرد راااااااااائع ووصف أروع ")


بس أكثر شي عجبني وفطست ضحك عليه

زوجك مو مسلم ؟ والا ليش ما لبس حجاب ؟

أتخيل الرجال بـ حجابات

ღţέέħღ

[البسمة الحزينه]

ليش ماكتبتي الموضوع بالانجليزي

بصراحه مادري وش اعلق عليه ومادري وش اترك

بس مهما درنا وحسنا مافيه مثل ديرتنا

[فتاةُ الرّيف]

هلا خواجة

ولي عودة

[نبضُ السّوسَن]

بلاد العرب أوطاني

لقيت نفسي هنا و التهمت الأجزاء كلها
حسيت بمشاعرك في كلّ الأحوال

و عجبتني تساؤلاتهم البريئة
لعاد الرجال يتحجبون ؟

أحيّيك على جمال الأسلوب و جاذبيّته

[فراشة الملتقى]

موضوع ممتع شكرا إيــلان
بس لوي مكانك ماسبيت في الرياض لأني أقدر أجيب مميزاتها وأترك عيوبها ما أتكلم عنها وأكون خير سفيرة لبلدي والشي الثاني أعتز بانتمائي وهذا شي يكبرك في عيونهم

حتى لو كانوا عارفين انتي مارحتي تقلبين الحقائق لكن أخذتي الجانب المشرق وخليتي المظلم
وياربي عليهم وفهمهم ياني ضحكت عليهم وخاصة يوم قالت لك ذيك ليه زوجك مالبس حجاب

[إيـــلان]

hus

.:.

تيــه ,
حيّاك الله ()
بعذرهم مساكين وش يدريهم ..!
وحدة قالت لي مب عدل بس الحريم يتغطون !! ليش الرجال وش فرقهم ؟
مو فاهمة ولا مستوعبة حكمته .. لو فهمت مباشرة عرفت إنه للنساء ..

البسمة الحزينة ,
نسخة قسم اللغة الانجليزية بالانجليزي ,
انتظريها بس ثث
حبي لديرتنا بس :"(

فتاة الريف
ههههههه أجل خواجة ؟
أنتظرك !

نبض السوسن ,
ياااه بتقطّع أنا , نبض تشيد بجمال الأسلوب .. :$
حياااكِ ()


فراشة الملتقى ,
بالله أوصفي لي جوّ وطبيعة الرياض بدون سبّ ؟
أما عن غيرها مدحتها بس جو وطبيعة مستحيل ألاقي شيء يمدح .. ثث
إلا الشمس يمكن تعجبهم .. مع انو اتوقع لو جربوها بتحرقهم ويكرهون عمرهم ..
مشكورة فراشة .. :$

.:.

[بحّارة]

الله يسعدك بس

ودي لو معي قلم أشخط على الأشياء اللي بعلق عليهن ، بعضهن يطير بالرد اللي بعده
وثلاث أرباعهن طارن يوم علق الجهاز يلا العوض ولا القطيعة

عن النظرة للغرب
صدق أحيانا أفكر يعني الغرب حالهم حال شرق آسيا حال العرب
لهم طبايع حلوة وطبايع مش مضبوطة، ممكن الطبع الغريب عندنا عادي عندهم
والعكس صحيح .

وأكيد مثل ما يعجبنا شي منهم كالانضباط بالمواعيد < من قلب
يعجبهم منا أشياء .. ياليت تقولين بعضهن ، من باب ضرب المثال يعني ..
وبسألك : اكتسبتِ شي كنتِ تحسينه صعب يوم كنتِ عندنا؟

أما الطنزة فأحس السخرية صفة للعربي الأصيل
يعني ما أتخيل عربي وما يتطنز أكيد فيه إنّ < طبعا مب كل طنزة تكون غيبة

أما الكلاب وأنتم بكرامة فـ انتبهي إذا الكلب مقطعات إذانه وذيله فهذا مسالم وإذا لا انتبهي
( واضح توه قاريه حكومة الظل وعودة الغائب) < بس ترا نسيت الوصف الصدقي


عرفت إن العين لا يختص العرب أو المسلمون بها بل هي عند غالبية الشعوب
وإن عادي نغتاب الكفار، مع إننا مقطعينهم من قبل بس اللحين بيصير له طعم

الأبيات حلوة وهي التي دخلت لأجلها
ووجدتُ الذي بعدها طيبٌ مثلها (:

هناك في وطن الجدود جَناني

طيب هذا من أي القصائد ، لأنه أعجبني (:

تسلم يدينك، وشكرا قد ما ضحكت واستفدت وكل حاجة (وردة)

[رَؤودْ ~]

زوجك مو مسلم ؟ والا ليش ما لبس حجاب ؟

هههههههههههههههههههههههههههههههههههههههه ههههههههههههههههههههههههههه
هههههههههههههههههههههههههههههههههههههههه ههههههههههههههههههههههههههه
قسم متتتتتت ضحك هنا

ياحبّي لك إيلان والله مشتاقين لك ، ليه قطعتينا يادوبا

قريت موضوعك كلللللللللله وعجزت أوقّف ، كتابتك مرة حلوة وتوسّع الصدر
نبي مواقف زيادة ما شبعنا

،

على طاري لهجتنا وتحريفنا بالإنجليزي
ألحين صرت كلما شفت دكني تذكرتك ، والله من الزحمة عندهم أجل دي كي إن واي
مشوار ياخي

شسمه ، ودي أسألك عن حجابك هناك كيف شكله ؟
وبالنسبة للحرية لازلت أحس فيه شوي مضايقات للمسلمين ، أحسّ بعض الدول ما يواطنون شيء اسمه لحية + حجاب !
فهالشيء يخليك مو مرتاحة للسفر هناك ، لابد شوي توتّر ، خصوصًا بعد سالفة الحصيّن والتركي ><"

وش بعد ياربّي !
ايه.. للفائدة يعني إنو احنا العرب الوحيدين القادرين على التحدّث باللغات الأخرى "بطلاقة"
لأننا نقدر ننطق جميع الحروف صح ، وعندنا حروف مو موجودة بأي لغة ثانية ، وأهمّها حرف الضاد !
وأكيد أنتِ لا حظتِ منهم بعض الحروف ما تنّطق بسهولة..
طبعًا كل لغة تختلف بالحروف اللي مو موجودة فيها وما تقدر تنطقها ،
مثلاً اليابانيين عندهم أزمة بحرف اللام ، ينطقونه حرف مدري كيف ، بين اللام والراء !

هـ خ ح ذ ز ض ظ ، هالحروف وغيرها بتلاقينها صعببببة عند بعض الدول ،
بس لأننا نتكلم العربية فـ قادرين نبدع بجميع اللغات

،

ياحبّي لتس لا تغيبين واجد ترى نشتاق

[رَؤودْ ~]

المشاركة الأصلية كتبت بواسطة إيـــلان hus .:. أما عن غيرها مدحتها بس جو وطبيعة مستحيل ألاقي شيء يمدح .. ثث إلا الشمس يمكن تعجبهم .. مع انو اتوقع لو جربوها بتحرقهم ويكرهون عمرهم .. مشكورة فراشة .. :$ .:.

جو وطبيعة ماراح يلاقون بس هذا في نظرنا إحنا ، لأن زي ماقلتِ يحبّون التراب الحمد لله والشكر
أما الشمس فبعضهم يبونها لأنهم يموتون عالبرونز ، ملّوا من البياض +_+
برضو الحمد لله والشكر

تم الضغط على هذا المخلوق من الأعمااااااااااااااااااق !
<- عاد لا تفرحين تحسبين موضوعك زين ، لا بس عشان الاتصال مهنّق فشدّيت بالضغط

[ثمة ثرثرة..!]

المشاركة الأصلية كتبت بواسطة رَؤودْ ~ ، على طاري لهجتنا وتحريفنا بالإنجليزي ألحين صرت كلما شفت دكني تذكرتك ، والله من الزحمة عندهم أجل دي كي إن واي مشوار ياخي

هههههههههههه
نفس الفكرة