## هياط !! ##

[الرشيق]

السلام عليكم

كيف هال كلو نفر هيه زينة ونحول والسيدة ملعقة

على طاري هيه عندنا عامل بالقسم بنقالي اسمه ابو الكلام

المضحك بأبو الكلام انه ما يعرف يتكلم عربي

يا كثر ما يجي يقرق فوق رأسي ويقول كلام بالبنقالي وانا اقوله ابشر سم طال عمرك والله انك ما تديرها اها بس الفقها اخلص علينا


اخاف انه يقول ابطلع اجازة وانا اقوله ايه وبكرة ينكبنا

على طاري ابو الكلام والقسم فيه مشروع الآن حق جزيرة الملك عبدالله مدري مدينة الملك عبدالله اللي يقولك تخيل ان عملك جنب بيتك وانك توصل لكل شي خلال دقايق

تكفون اللي يعرف احد المسؤولين يقوله ما يحتاج يتعبون نفسهم ويسوون هالشي لأن ساجر حققت هالحلم

اجل اشغل موتري 8 على ما احميه واوقع تصير 8.05

على طاري ساجر تخيلوا تفتحون طبلون كهرب تلقون داخله ديناصور اقصد بعرصي كبر ريموت التلفزيون

انا ابغى اعرف كيف كان قادر يقعد بهالمكان الضيق

نرجع للهياط وسالفة الهياط

فيه مسابقة امريكية اسمها So u think u can dance يقولون ان رايق يبي يشارك بها

ابيكم تنصحونه يا جماعة لانه بيروح امريكا والطريق كله سيول واخاف يغرق

على طاري امريكا هالحين اوباما ذا وش يحس به

هالحين اوباما يهودي وابوه مسلم وامه نصرانية

اوباما امريكي افريقي وامه امريكية وابوه كيني واخته اندونيسية

وش هالحالة اللي عايش بها

عاد يقال ان أبو حسين اللي هو أوباما يبي ينقل السفارة الأمريكية للغالة مدري هو صدق ولا لا

فعلي طاري رايق وأمريكا مرة من المراريت كنت انا والأخ الأستاذ الدكتور مهند اياه مشرف الهمسات

مهند ياخي احس انك صاير مثل اللي منب قايل كل يوم مشرف على قسم

المهم من زود الفضاوة قمنا ندور على وكالات السيارات يقالنا نبي نشري ما دروا ان ما ورانا الا الدجة


المهم بقدرة قادر وبدون تنبؤ مسبق دخلنا وكالة السيف للمحركات

السيف للمحركات ذولي ما يبيعون الا 3 مواتر

جاقوار ولاند روفر و رانج روفر

تخيلوا معي مهند داخل وعوارضه ديرتي له اسبوعين ما ضبطهن وانا داخل وشعري ما مشط والصدق ان امي دايم تهوشني على شعري تقول انت ليه ما تحط معك مشط بالسيارة بدل هالشكل تقل هيبي


والله امي مثقفة طلعت تعرف الهيبين

المهم انا ومهند بالصورة اللي ذكرتها فوق وكل واحد معه كوب دانكن دونات وداخلين يقالنا كول من حقين التحلية

شوي الا يطب بوجهنا موظف هلا هلا كيف الحال استاذ وشلون اخدمكم ومن هالكلام

طبعاً واحد مثلي حده أكورد ولا كامري وواحد مثل مهند حده ايف سان لوران وشانيل ما يعرفون الجاقوار

فجيت بكل براءة وأشرت له على موتر وقلت له وش فئاته



حسيت ان الموظف بيضربني وش اللي وش فئاته شايفنا نبيع اكسنت هنا

قلت لا ياخي اقصد وش الفرق بين ذي ام عيون وذي اللي بالصورة فوق

قال هذي سبورت مدري ايش واخر موديل منها 2008

وهذي XF موديل 2009 جديد ووو

المهم فتح الموتر وشغلناه وقام يشرح لنا مواصفاته وانا ومهند ما غير نهز روسنا ونسأله عن ميكانيكية التروس وقوة المكينة يقالنا نبي نشريها

بس والله موتر خقة القير فيها مثل عيار التلفزيونات القديمة ولا طفيت الموتر ينزل تحت والمكيف بعد يقفل مدري شلون بس يشقلب

المهم في مثل هالحالات دامك انتكبت فلازم انك تهايط علشان ما تبين ان ما عندك سالفة

بكل ثقة جيت وقلت له الصراحة يا أخ مهند واعني هنا الموظف لأن اسمه بعد مهند

قلت له ياخي انا كنت رايح الصراحة لساماكو ابشوف الاودي لانهم يقولون ان الـ R8 نزلت وان شنطتها قدام ومكينتها ورا لكن انت الآن بديت تغير رأيي خاصة ان قيمة الـ R8 800 ألف وانا قاصرة علي 750 ألف

اقصد ناقصة علي 50 ألف وبشوف هم يقسطونها علي ولا لا

الموظف قام يمدح موترهم وانهى مهند خوينا الحوار بأنه نبي نشوف الاودي ونرجع لك

مهند يقولون انك طلعت جاقوار بحرية مثل اللي شفناها هو صدق


مرة من المراريت دخلت مع واحد من العيال لمحل ساعات

خويي ذا راعي ساعات وكل 3 اشهر يشري له رادو ولا تيسو يعني معدل صرفه على الساعات سنوياً يوصل 10 آلاف بالراحة

مرة قالي فيه محل اسمه معّوض خل ندخله

دخلنا عنده قام يعرض لنا ساعات ووو

طلع ساعة قال خويي هذي حلوة ابيها هدية لأمي كم قيمتها

اللبناني : 500 ألف ريال بس طال عمرك

خويي حس انه انتكب وقام يلف ويدور ويقلبها ثم قال اممممممممممممم

ياخي المشكلة فيها رقم ورا منحوت وش هالرقم

قال الموظف استازي هالساعة ما طلع منها بالعالم كله الا 12 حبة بس وهي رقم 4 منها وهي الوحيدة بالسعودية

خويي : بس ياخي الرقم ذا بيشوهها وامي ما تحب هالشي فدبروها لي بدون رقم

الموظف : آسفين استاز هيا جاية كذا من المصنع

خويي : تعذر من الموظف وطلع

يقلع ام الهيط يا عالم


أجل الرقم مشوه الساعة


وكثير هي المرات اللي تشوف الشي فوق قدرتك وتهايط تقول لا رخيص ابغى اغلى ولا جب لي لون كذا وانت عارف انه ما عندهم

من جد يا شين الهياط على غير سنع

وختاماً

لو عزمتك مرة على فنجان قهوة ..يا ترى تقدر تجي وتلبي الدعوة

Ciao

[[ .. رايق .. ]]

ـ ـ ـ ـ ـ ـ ـ ـ ـ ـ ـ ـ ـ ـ ـ ـ



مراد تشارك معي بمسابقة الرقص على الجليد .. نكون احلى ثنين يرقصون .. عاد انا بشيلك وابدا الف لف فيك يمين ويسار همن تنبطح انت واقرب لوجهك <-- وعععع هههههههههههههههههههههههههههههههههههههههه هه

خلنا نقنع اعضاء المعالي انك فعلا رشيق

دخلت محل شانيل بـ التو تور بـ ماليزيا .. المهم كنت بشري بوك هديه لـ واحد <-- لا احدد يدقق وجع

المهم انا داخل والله على نياتي .. طبعا محل شانيل تجيك الموظفه وتفتح لك الباب وهلوووووووو هاو ار يو وات دو يو دو

وانا اهز راسي يس يس افكورس


المهم سئلت عن البوك الي ابي وطلعوه لي من تحت الارض ( لاني كنت شايفه بموقعهم على النت )

يوم قالو لي السعر وانا اقول اوه ذاتس تشيب <-- يعني رخيص وانا الي اطير للباب ومن زود الروعه انا الي فتحت الباب وهجيت

لعن بليسهم بوك بـ 2700 oO'

انا بحياتي كلها بس مره وحده شلت بـ بوكي 3 آلاف لمدة اسبوع .. هذا البوك بس لحاله 2700 خير ان شاء الله .. لو ينسرق جلست اصيح موب على الي جوا البوك على البوك نفسه

المهم فيه شيء بحدود المعقول .. يعني لو تبي تجخ هكا اليوم وتشري بوك ماركه ومدري وشو يعني حدك 400 او بالكثير 700 ريال .. لكن 2700 خير ان شاء الله

يا زين ميلانو بوك وجاني هديه منهم .. ويوم رحت وشريته ثاني مره لقيته بـ 80 ريال

مراد ما تلاحظ اسلوبك صار عربجي شوي من يوم رحت ساجر

اجل سقها

الموضوع الجاي تبي تقول تلايص وعلي الحرام

|||||| رايق ||||||

[مباري الساس]

أنت تخصصك هياط يا بن الحلال


استر إذا كديت شعرك يزين لو تطلعه من دريشة الطيارة ما تحرك من مكانه


يالله يا المدور تامر حاجة

[أبـو صـالـح]

يعني لو تبي تجخ هكا اليوم وتشري بوك ماركه ومدري وشو يعني حدك 400 او بالكثير 700 ريال

أنا مرّة بس شفت بوك بـ 200 ريال ،، المهم أني بس من يوم هوجست أني آخذه ولا يجين هاك المغص وآلآم في الرحم الأوسط :s

تخيل أشري بوك بـ 200 ..!! سكرآآآآآن ..! مير يعني سبحة نقول معقولة لأنك راح تكشخ بها بكل مكان ،،

أما بووووووك أوه بس

[متفكّر]

نقول و بالله التوفيق

اذكر مرتن رحت انا و الوالدللمعارض نبي نشري موتر
و ندور و ندخل معرض
و نلقى جيب رانج روفر
حنا ما نعرف وش اسمه
بس ناظرناه
والله شكله حلو
و ناشر للوشسمه
و نقول كم سعره
ابوي حده 70 80 الف بس
هالحتسي عام 2004 توه نازل
قال ب255الف
انا اول مره اسمع الرقم ذا في حياتي
فصرفت و قلت ما عندكم منه لون نيكلي؟؟
قال لا والله قلت اجل عمت صباحا

[مهند]

.. , ..


أما ذاك اليوم ..
المشكلة لو الموظف شايف الكسرة اللي جايين فيها -واللي يطفى المكيف إذا ما مشيت زين أو وقفت عند الإشارة واجد- كان شاتنا مع الباب ..
لا وصابين لنا قهوة بعد ..

انا يوم شفت إن ما عندك سالفة وان الموتر يسوى 220 ألف وأنت ما معك ولا 22 ريال غسلت ايدي وقلت مالها داعي نتفشل ..
فـ سويّت حركتي المعهودة وقضّبت الرجّال أقرب مخرج ..

بس خل عنك قسم بالله إنه موتر مب طبيعي ..

مهند يقولون انك طلعت جاقوار بحرية مثل اللي شفناها هو صدق

كنت أبي أطلع وحدة .. بس المشكلة باللون ..
تعرف سيارتي خضرا .. وهم ما عندهم لون أخضر ..
وقلت يا تجيبون لي أخضر والا ما أبي ..
وتهاوشت مع إدارة الجودة بـ جاقور وقلت خلو سيارتكم لكم ..

إن شاء الله إذا صرت مغتني وقروشي واجد بأشتري السيارة ..
أما هاليومين فكل خوفي على زيت الدركسون الظاهر إنّه يهرّب أو ما ادري وش سالفته ..

الله يعين بس ،


.. , ..

[محمد الحربي]

حجز حتى يتم قراءة الموضوع ..

[[ .. رايق .. ]]

المشاركة الأصلية كتبت بواسطة أبـو صـالـح أنا مرّة بس شفت بوك بـ 200 ريال ،، المهم أني بس من يوم هوجست أني آخذه ولا يجين هاك المغص وآلآم في الرحم الأوسط :s تخيل أشري بوك بـ 200 ..!! سكرآآآآآن ..! مير يعني سبحة نقول معقولة لأنك راح تكشخ بها بكل مكان ،، أما بووووووك أوه بس

ـ ـ ـ ـ ـ ـ ـ ـ ـ ـ ـ ـ ـ ـ ـ ـ



قسمن يا بو صالح ان البوك الي شفته بـ 2700 والله يا لونه لون عبيد لكن وش تسوي لا كان مطلوب منك وانت تبي تجيبه هديه

طبعا انا مطلوب مني او هديه ما تفرق دقيت على الي قال لي جبه وقلت مجنون انا اجيبه والله لو اني ميت زياده على لون العبيد سعره وخر بس لا ارفسك .. اشري من قوتشي ارخص بواجد وماركه .. لكن اسعار شانيل مبالغ فيها بقوه ما عندهم الا العطور هي الي على قدنا

على الطاري مره كنا نسولف وكان يقول لنا انه يعرف واحد شاري بوك بـ 700 ريال .. لكن من 7 سنين البوك معه .. ويقول والله انه مطلعه وان خويه ماخذه ويقول له ما شاء الله من وين شاري هالبوك الجديد :S

وهو له معه 7 سنين .. يعني شيء واضح ان البوك يستاهل


اما السيارات ما فيه مثل الروز رايز قصدي لكزس .. مراد تذكر يوم توديني للوكاله

طبعا دخلت سيارتي للوكاله ورصوني 4 ايام بدون سياره .. يوم رحت استلمها جلست اسولف مع موظف سعودي حق الاستقبال والمواعيد اقول له ياخي المفروض توفرون سياره بديله لي 4 ايام بدون سياره

قال ياخي الي يشري لكزس يكون قدها !!

قلت وش لون يعني قدها اشري لكزس ثانيه عشان لا دخلت سيارتي الصيانه اسوق الموتر الثاني علمني وش لون ؟
بالعكس المروض انا عميل لكزس اسلمها لك الصباح تطلعها لي الليل .. انا ما شريت كرسيدا ( نايف اخبارك ؟ ) ولا اكسنت

عاد رد علي يقول الكرسيدا احسن مننا الحين اسرع يطلعونها


تتوقع ان كل الي يجيبون سيارتهم للوكاله يخلونها ولا يجون ياخذونها مره ثانيه ؟

مدري حسيت من كلام الموظف اني الوحيد الي مبلشهم عشان سيارتي

|||||| رايق ||||||

[الســكـب]

المشاركة الأصلية كتبت بواسطة الرشيق الموظف قام يمدح موترهم وانهى مهند خوينا الحوار بأنه نبي نشوف الاودي ونرجع لك Ciao

..



حسيت آنكم رآيحين لـ محل ريآضة ..








..

شبكة صوت آلهدوء

[[ أبو وليد ]]

بصرآحة يآ رآيق
رد قوي

لو آني بمكآنكـ ,, قسم بالله مآ يشوفون وجهي

[abo Msa3d]

وأثرك مهايطي كبير ..

على فكرة مرة دخلنا أنا وخوي محل كميرات بالبطحا المهويم بدينا نتفلسف ..

وما أدري وش قرد خوي قال لصاحب المحل منب طالعين ألا مشترين منك إن شاء الله

وينقز راعي المحل ويجيب لنا كمرة و يشغلها لنا ويشرح لنا مواصفاتها و يسحب على الزباين

وانا وخوي نسلك له ما ندري وش السالفه .. ويوم قضى قلنا كم سعرها .. قال بـ $$$$ ..

قلنا إييييييه .. ما عندكم دورات مياه قريبة .. شوي وراجعين

وهي النحشة ..

[محمد الحربي]

والله انك صادز !!

بعض الهياط ماله سنع أبد !!

أنا مريت محل ساعات وكنت ناوي أشتري من جد ..!!

وقال الموظف في ساعة نازلة جديدة ..

وميزاتها انها على نبضات القلب !!

يعني بدون بطاريات !!

أنا قلت الحين بيجيب سعر حلو ويناسب ..!

قلت بكم ..؟

قال بـ 16000 !!

ياولد ياخي يبالغون وااجد بعض المحلات !!

يعني الواحد يشتري بهالسعر سيارة ولا يتزوج ووو الخ ..!

بس الصراحة هالكلام نقوله حنـا ولا المطنوخين ولا يسمونها شيء !!

الحمد لله على كل حال ...

أما خويك ذا اللي راح لـ معوض ,,,
أحس انه انكب من جد الضعيف !!

,,

[انا غير كلي خير]

بصراحه أحس أن حدكم أكسنت وأن زتو هندا وأن بطرتو كابرس ss2004

[أبـو صـالـح]

التعديل الأخير تم بواسطة [ .. رايق .. ] ; اليوم الساعة 09:54 PM. السبب: احلف انك انت وعشره من الشباب ما رحتوا ميلانو تتطلبونهم يجيبون لك مثله ذذ اشوى بس مير لحقت على الابواك وشريت لي واحد وعطيته خالد هديه ذذ

إي والله فكّرت أني أروح له ،، بس مهوب آخذه لي .. لا لا علشان أعطيه أخوي عبدالملك هديّة

[[ .. رايق .. ]]

ـ ـ ـ ـ ـ ـ ـ ـ ـ ـ ـ ـ ـ ـ ـ ـ


انا غير كلي خير


بصراحه احس حدك هلكبتر او طياره نفاثه وان وان صاروخ نووي ..

اقول تعرف ابو حسين ؟ تراه يحتريك على العشا .. يبي يمزمز عليك


خالد الفياض والله يا احسك مسطل وش الي رد قوي او ما يشوفون وجهي وش تقصد بالضبط


ابو صالح ما تذكر يوم تجلس بالزاويه تلعب ببوكي ؟ خلني ساتر عليك بس .. نناديك ذاك اليوم تعال سولف معنا تقول لاخولني مندمج العب ببوك مصعب

|||||| رايق ||||||

[[ أبو وليد ]]

خالد الفياض والله يا احسك مسطل وش الي رد قوي او ما يشوفون وجهي وش تقصد بالضبط

يــآ حبي لكـ يآ رآيق


آنــآ اللي فهمتهـ آنهـ يقولكـ خلك مثل عيآل العز ينزل الموتر عندهم ولا يسأل عنهـ

آمــآ آنت نآشب لهم تبي الموتر يخلص بسرعه



هذآ الي آنا فهمته كــآن قصدكـ غير
العذر والسموحة

[محمد !]

يا شيخ الباعة يعانون ..!! ---> الرد كله علشان كلمة الباعة

يا شيخ لو أنا راعي المحل كان فتحت مصنع وراي ..!!

وأنواع التحجييييييييير للعالم ..

وأعلق لوحة بعد وأكتب ( بدون هيااااااااط .. ) ..

عاد والله من زين التسويق .. أصلا المحل بكبره مفتوح للهياط ..

[مثقف]

القهوة بمحلكم ولا محلنا ؟ < تحس إنه ما قرا إلا وصف الموضوع وتذكر السالفة

مثقف

[انا غير كلي خير]

[COLOR="DarkOrange"]

(.. رايق ..)

[/أنا أحس أن الصوره الي حاطهه تشبه صورتك منى يوم ما شف هالخشم وأنا غال يدي

[جارلله]

ما شاء الله طقيت لكزس يا رايق

وين ايام الكابرس<< كنت اعيش افلام رعب لاركبت معك

الله يوفقك ويسعدك