اساليب التكفيخ على الخد تنفيخ (( من مذكراتي 4 ))

[/// الخيال ///]

اييييييييييييييييييييييييييييييييييي ((الخ))ييييييييييييييييييييييييييييييييي ييه



يا ما حلا ايام الطفوله والايام ... يوم الحلاوه كانت اكبر مناتي





والله اني مدري من وين ابدا هالذكرى ولا ادري وشلون



اوصفها لكم



تدرون ليش ...



لان هالذكرى جمعت من كل الوان الطيف ومن كل انواع الاحاسيس



بالمختصر المفيد ما خلت شيء ...



ذكرى حسيت معها بالفرح الين غصيت



وبالحزن الين مليت



وبالدموع الين تمليت (( ايه والله صحت من القهر اللي حسيته ))



بكاء تعرفت من خلاله على اصناف المراره , وصحون الحراره



ومقبلات مبهره بالفلفل انها حارررررره






لقد بكيت بكاءً لن تنساه عيني فلقد اعلنت حالة الخطر في ذلك اليوم



وارسلت عبارات التحذير فالجفاف كاد ان يصيب مغزاه



وان انتهي على قاطرته



يعني بهالذكرى ما خليت شيء بهالدنيا الا وعليه مريت



طيب طيب طيب طيب احس اني طولت بالمقدمه ....



البدايه كانت من احد استراحات السعوديه والكائنه بشكل مخصص وخصوصي بمنطقه



المزاحميه .




اتجهنا انا والعائله الكريمه لذيك الاستراحه مسلحين بكامل عده الوناسه والشطانه والتفشخر




ركزوا على التفشخر




1/ كوره الكوره طبعا قبل كل شيء ...



2/ لبس رياضه فخم (( ركز على فخم ادفع خمسميه حمراءءء ولا احد يشوفني بذاك اللبس ))



3/سروال سباحه



4/ نعال (( اظنها زبيريات ))





5/ كمبيوتر العائله (( بداء الفقش ))



6/ لستك مربع الشكل



7/ مصحف (( افلقني ))




وهنا عندي تعقيب بسيط الحين ليش طلعات العوائل دايم على خط واحد



قصدي ما فيها الا لعب ووناسه وضحك وبعدين اقلب وجهك ورح لبيتكم



مع قليل من الاطفال اللي يبلش امه بينام ببيت فلان او فلانه



الشاهد من هالتعقيب الصغيرون اللي يقول



ليش ما يصير بطلعات العوائل شيء مفيد يستفيد منه الجميع



اطفال وكبار بنات وعيال يعني قليل من العوائل



اللي تلقاه يحط بطلعته فتره قصيره يستفيد منها افراد العائله



يعني احضار المصحف شيء غريب بطلعات العوائل



حتى لو كانت طويله



وهالشي موب زين طبعا .... ويكفي كذا علشان ما اطول .. ))




طيب وين وصلنا ايه وصلنا لدخلتنا الاستراحه ... (( يبي يختصر ))




واول شيء عيني حطت عليه الملعب لان الملعب عنصر



اساسي في نجاح الاستراحه وكل ما




كبر الملعب كل ما كانت الاستراحه انفس واجمل واحلى واقوى ووووو وترى هالنظريه تلقاها



في اغلب عقول الشعب السعودي المعاصر



كبار وصغار كل تفكيرهم في الاستراحه اللي بيستاجرونها



فيها ملعب او لا



واذا فيها ملعب



كبير ولا صغير



واذا كبير مزروع ولا لا



وانا هنا عندي لفته على اللي يسويلك في استراحته ملعب طائره



صغيررررررر ويحط عليه مرامي لكره القدم يعني ترى غصب استراحتي فيها ملعب كره قدم



واذا جيت تلعب بهالملعب تشوف اللعب من الحارس الى الحارس تقول يلعبون بلنتيات وما




ينلامون





الملعب صغيررررررررر ....



ما علينا ما علينا وندخل بالقصه مره ثانيه من بابها الجنوبي




ونقولكم اننا ولله الحمد والمنه وصلنا الى الاستراحه وعلطول عيون التفحص اتجهت



الى الملعب اللي الى بكرا ما انساه ولن انساه



والسبب راح تعرفونه بعدين عموما



لقيت الملعب وبديت اتفحصه واشوف قصته



وبينما عيني تدور بارجاء الملعب لفت نظري شيء غريب



شيء ما توقعت يكون باستراحه لنا لا ولنا لحالنا



وهالشي علشان ما نطول دباب ازرق كبير ودباب اصغر شوي نسيت لونه



الصراحه هالازرق اخذ عقلي وبديت افكر فيه واحط عليه العاب وتفاكير



مستقبليه تقتضي كلها اني اركب عليه (( لا احد يقول شيء تراي وقتها كنت



صغير )) J



الشاهد ان صاحب الدباب جمعنا كلنا



وبداء يصففنا ويعطينا ارقام (( لا احد يصدق )) يحب الترتيب الرجال




ويعلمنا لعبه نلعبها بالدباب




مقتضى اللعبه يقول ان كل دور يركبون اثنين بالدبابين





دباب يكون شرطي ودباب يكون حرامي



وطبعا الحرامي ينحاش والشرطي يلحقه



وطبعا كلنا اذكياء فهمنا اللعبه علطول



وعلطول ركبنا الدبابات وبدينا الملاحق




والوالد الله يحفظه من دخلنا وهو يحرص علي ويقول




العب بالدباب زين ولا تقعد تفحط وشوي شوي وما الى ذلك



وانا طبعا طفل مطيع بس مشكلتي اطيع بالعكس



فكنت افحط واحوس الدباب حوس والمشكله ما كانت هنا



المشكله ان ابوي قاعد يجمع لي



الى الفترة اللي صار الدور علي انا واخوي بلعب الدبابات



واخذت انا دباب وصرت الحرامي واخوي اخذ دباب وصار الشرطي



وانطلقي يا حبشه وفعلا انطلقت انطلاقه حاميه جالت بالدبابات



الى كل ارجاء الاستراحه الى ان وصلنا بايكة الاستراحه (( مدخل السيارات ولها ميزه



البايكه انها تكون مرتفعه شوي عن مستوى سطح الكره الارضيه ))




وانا اللي اخلي كفرين على البايكه وكفرين على الارض المستويه



والحمد لله ربك ستر وما انقلب الدباب لكن فيه واحد ملاحقني



ولازم يجي بنفس طريقي يعني لازم يحك ظهر البايكه مثلي



وهالشخص هو اخوي اللي ما كان قياده مثلي



لانه وللاسف انقلب دبابه وطاح على الارض لا لا لا تخافون الدباب ما صارله شيء



بس اخوي جته مخوش بوجهه ويده وكل الاستراحه ركضوا له بيتفقدون حالته



الا انا ما ركضت له (( حاس انه بينجلد )) كنت من بعيد لبعيد اراقب الوضع



وكنت مركز على ابوي لاني حاس انه ما راح يمشيء الموضوع كذا



وبينما انا كنت اراقب الوضع قلبي نغزني وكنت في حاله متوازيه



ما بين خوفي على اخوي وخوفي من ابوي



فكان هناك صراع دامي بين هالخوفين وكان فيه دماء وسيوف انتهت



بفوز خوفي على اخوي



فكانت النتيجه اني تركت مركزي وخليت الوضع المقتضي بالمراقبه من بعيد



وقربت الين وصلت لاخوي وجلست اشوفه واراقب وضعه وجروحه



وهنا زاد خوفي اكثر فما كان لي حيله الا اني اسال ابوي وش فيه اخوي




وكان هالسؤال طالع من خوف وترقب للاجابه الحاميه اللي جتني



ماشيه الفين لكنها ما وصلت لاذاني بس لا تعدت الى اجزاء ثانيه من جسمي



وصلت اول شيء لخدي ثم اذني ثم باقي جسمي



اظن ظفري اليمين من اصبعي اليسار كان احد المتضررين




تدرون وش كانت الاجابه




الاجابه كانت كف تلون على اثاره خدي الطاهر



وصارت من سرعته حفله باذني



كف ما استوعبته الا بعد ما رحت بعيد عن ابوي اجمع دمعاتي



وامسح خشمي الدمعات ما كانت على ما يقولون اربع اربع كانت تسع تسع



كنت ما الحق الدمعه الا وراها خويتها واللي يزيد الطين دمعه كانت فيه مسانده



لدمعاتي تدرون من هو المساند شهقاتي عاد انتم ابخص بصياح المشاهق



صياح ما تعرف تنطق الكلمه معاه صياح من صميم القلب



صياح وبكاء ينطبق عليه اسم صياح



بالمختصر اسم على مسمى



وانا الحين ما اقدر اكمل لكم اللي صار بعد الكف الحين



لاني باصيح شوي وباكمل لكم السالفه بعدين تشكراتي لكم ..




ودمتم سالمين ....

[Bo Saad]

اهم شي ماتشيل في نفسك على أبوك


ولا الكف يجي ويروح - والحمد لله على كل حال

[السمو الملكي،،،]

تصدقـ أنـ أبوكـ سريع يعطيكـ كفـ يمشي ألفينـ



¨'*·~-.¸¸,.-~*'¨'*·~-.¸¸,.-~*'



بس تصدقـ الإجابه كانتـ رائعة ودي اعطيهـ بعض النفراتـ..

[مسبب زحمه]

سبحان الله ينسى الصافع ولا ينسى المصفوع

يعني تلقى ابوك ناسي ذا السالفه من جذورها <<ياشيييخ

بس زي ما قال ابو سعد

لا تشيل على ابوك هع هع


...
تدري وش احلى شي بالسالفه

حفلة اذنك ياخي احسك جبتها صح

..

[فخامة الرئيس]

ياما اكلنا كفوف .. بس الحمد لله للحين عايشين ..

يارجل كف من هنا وكف من هناك تضبطك وتخليك رجال ..!

بس مهما يكون .. لاتحمل في نفسك .. ترى الكف مايستاهل ..!

[ذيب لكن حبيب]

..



والله ياما راحت نظارات ونظارات من كفوف الوالد ..


تصدق إنه على أيامـ الطفاقة كد إنكسرت ي ثلاث نظّارات بأسبوع واحد وكلها من كفوف ..


والله أنا أحس إن الكف رسالة ولا أبلغ من الوالد لإبنه لأنه إن صار ذيب يبي يصير يفهمـ لأبوهـ وش يحب ووش مايحب وإلا يتحمل اللي يجيه ..





أخوي والله بيجي يومـ تتمنى إن عندكـ أبو يسطركـ ..

[باعث أمل]

يا الله لاتذكرنا بس

صابني العنقز من الكفوف

لكن الحمد لله إنا كبرنا ولا رحنا فيها






تقبل مروري

[خيال الروسا]

كم من يوم قعدت تكتب الموضوع
























المهم اللي سواه ابوك شي طبيعي

[فيصل المرشدي]

؛




حزنني وصف الكف اللي جاك والدموع ايضاً




؛

[بردان]

هههههههههههههه

والله ياعليك وصف ولا وصف كلورادو الصراحه ابدااع

وان شاء الله نشوفك في كف اقصد موضوع ثاني

[/// الخيال ///]

لي عودة وارجعلكم حبايبي



الله يرحم حال اللي عنده صيفي