][][ .. ونرجع الى الخلف قليلا وعلى اليسار [ شحنة تراب ] ذذ .. ][][

[[ .. رايق .. ]]

ـ ـ ـ ـ ـ ـ ـ ـ ـ ـ ـ ـ ـ ـ ـ ـ



سلام عليكم ، مرحباً بعودتي (^_^) ،

كنت بزقتاً نعم ، كنت بزقتاً جداً ( لم أولد بشنب ولم أولد وشعر رجليني طالعات <-- متعقد ) كنت تلميذا نجيباً كنت زهرة متفتحة على الآخر كما قالت لي امي يوماً من الأيام ( ولدي مصيعيب كلما اراك تذكرني بـ زهره الأثل <-- لا بارك الله بالأثل ) .
[وهـ تعبت من الفصحى ]
تذكرت أبله أمل تذكرت الأبله الشريره الدبيه ، تذكرت مدرستي التمهيدي دار الذكر ، ( في مدرستي دارُ الذكرِ*** نسموا بالعلمِ وبالأدبِ ) <-- المشكله اني ما طلعت مؤدب ، يا الله تذكرت يوم ادرس بلوس انجلوس ولاس فيقاس إيييه أيام ، تركت يوم اصرقع بكندوليزا رايس يوم هي تبيع بالمقصف يا ربيه تذكرت بوش يوم كان مهكة المدرسه كان اكبر مني وكان كل من يمر ينغزه من مكانٍ ما ويقولون له اجل حلمك تصير رئيس امريكا .. ان كانك رجال وتبي تصير رئيس امريكا اتحداك ما تخلين انغزك ( وينغزه من نفس المكان السابق ) والسبهه ما يقول شيء ..

ذكريات كانت حلوه يوم وصلت لـ رابع ابتدائي اهلي اشتاقوا لي وكانوا ساكنين بقريه جمب شقراء وقالوا لي تعال ما نقدر نصبر عنك يا مصيعيب الحبيب ( طبعا التسميه قديمه ، الحين ما ينادونن الا مصيعيب الحبيب منوّل ) ، وش اسوي ظفيت عفشي واقرب تكسي ورجعت لـ مطار شقراء ( <-- تكسي ومطار شقراء ؟؟؟؟ ) ، رجعت لاهلي واستقبلوني اهلي بالمطار وامي انواع التمطيخ سعابيل سعابيل اعوذ بالله الى حد ان اخوي الصغير طارق يشوف امي تقرب وتسعبل على خدي وتوخر ، صار وش يسوي هماه ما يطولن صار يتفل بيده ويقول لي مصعب دنق شوي همن يسطرن كف ويطلع صوت جغ همن يقول لي الحمد لله على السلامه ( <-- الزلابه طارق يحسبه الحين حبّن وسلم علي ) ..
دخلت المدرسه الحكوميه الي بالقريه ويوم شفت الوجيه الودره الي معي مير اسوي اضراب عن المدرسه وارفع لافتات بالبيت كاتب عليهن ( اطالب بالوجيه الحسان اطالب بناس مملوحين معي بالفصل لا للشيون لا للشيون لا للأولاد <-- مندلق انا وخشتي هذا وانا برابع ابتدائي ) طبعاً مغرّر بأخواني ومخليهم يشيلون لافتات وشيء بديهي ما يدرون وش مكتوب لاني كاتبهن بالانقليزي ( راجع من لوس انجلوس ولاس فيقاس ) كان وقت الاضراب يوم الاربعاء لسوء الحظ راح علي يوم الخميس نووم ويوم الجمعه بعد ، صحيت على رفسه السبت الصبح قم يا ورع رح المدرسه ( <-- بالله ذا اسلوب أب تربوي ناجح في حياته ؟ لكن بعذره ما درس بلاس فيقاس ) طبعا حاولت اذكره عن الاضراب لكن شينة ابوي اذا طق حوله تحاول تاشر تناقز تنغز ولا كأنك جمبه حتى لو تهدده انك تفصخ سروالك قدامه ما يلتفت لك ( طبعا مره فسرت شوي منه يعني مثل طيحني الحين مير يجين بوز نشبت بدربزين الدرج ) كملت رابع ابتدائي ونجحت بـ 3 ، 3 ، 3 ، 3 ، رأي المعلم ينقل للصف التالي مع اخذ الحيطه والحذر لان الولد تفكيره بصبع رجله الصغير ..

الحمد لله عديت السنه ذي بخير ، وجيت لخامس / ج .. خامس / ج سنه تفجر الابداع .. خامس / ج سنه غطيت على كل العالم فيها ، سنه وصلت الانتاج عندي مستوى 15 ( <-- احد جاب طاري ترافيان ) .. دخل الانتر نت يوم انا بـ خامس / ج .. خامس / ج ولدت امي ولد خامس / ج ( <-- طيب وش دخل الولد ؟ )


نجي للزبده يا عالم تعبت من المقدمه وادزت على امي قبل امس وقالت مصيعيب تتوقع وش ذا الدفتر ؟
يمّه وش ذا الدفتر من سادس ابتدائي وانا استخدم دفتر سلك وذا دفتر مدبس لا تقولين ذا دفتر التعبير يوم انا بـ خامس ابتدائي هههههههههههههههههههههههههههههههههههههههه ههههههه
أمي وهي فاقتن خشته اجل رحلتنا الى البر هههههههههههههههههههههههههههههه
يمّه وش رحلته ؟
دوك اقرى الله يفشلك فضحتنا عند مدرس التعبير حتى المزرعه ما عرفت توصفه مسكنا وسط النخل هههههههههههه
؟؟؟؟ <-- انا قلب وجهي تسذا .. خخخخخخخخخخخخ

ناخذ فيكم جوله مع دفتر التعبير
ملاحظه :-
* اللون العنابي المدري وش لون جاي هذا تعليقي <- قل قسم :P
* الصوره وتتلوها الترجمه على أرض الواقع <- اما عاد احللللف :P



الموضوع : وصف مزرعه اليوم: السبت التاريخ 24 / 1 / 1421 هـ

بسم الله الرحمن الرحيم

والصلاة والسلام على اشرف الأنبياء والمرسلين نبينا محمد صلى الله عليه وسلم تسليما كثير( <-- طيب يحول ليه كثير ما عليه تنوين ؟ طبعا لا تسئلون ) .. !

أما بعد :

إن في القصيم مزارع كثيره جداً حدا ( نقطة الجيم وين راحت لا تسئلوني ) فىيىييى ( <-- طبعا هذي يقاله في ) الرس وبريده والبدائع ( طبعا الرس قبل بريده لان الرس فيها مزرعه حميله <-- حميله أجل كملوا انتم بس ) وفي الرس مزرعتٌ حميله ( الحين حاط تنوين وشغل وحركات طيب ليه كاتب التاء غلط لو اسوي الي اسوي ابتل دبشه وتبتل عقدة النقاط ) .. !



جداً جدا ودخلت المزرعه ( بيجيب العيد بيجيب العيد ) فإذا في ( يقطع ابو فني ، يقطع ابو لغتي يقطع ابو ابوي <-- فصخت فنيلتي وقمت ادور بالغرفه يوم قريت هالكلمتين اول مره يطلع مني شيء احس اني اتكلم عربي بشكل صحيح ) غرفت الحارس ( طول عمري معقدتي التاء المربوطه والتاء المفتوحه :/ ) على اليمين والفلاح غرفته على اليسار ( يقالي اوصف مزرعه واحد فسقان عنده فلاح وعنده حارس لو تدرون ان ان المزرعه ذي الي اوصفه ما به الا عامل واحد ويشتغل كهربائي وسباك ويطبخ ويسوي خبر وينظف سياراتنا والله يا كارفينه كرف ) وتقدمت قليلاً ( تخيل معي اخي القارئ :bz1 ) فذا النخيل على اليسار حوالي مئه نخله ( يا عيني علي يا عيني علي فذّ فذّ ) وعلى اليسار بيت جميل جدا جدا ( الحين يا زلابه يا دبشه النخل ولا البيت الي على اليسار هههههههه ) وتقدمت ليس طويلا ( وخر عني اجل ليس طويلا ما قلت لي أخ مصعب تقريبا كم متر ؟ ) موجدت على اليسار المسجد ( موجدت هذي الظاهر اني كنت مستعجل ونسيت احط نقطة الـ ف .. الله ياخذ جهة اليسار استغفر الله الظاهر يوم انا صغير كل الاتجاهات عندي يسار النخل والحارس والبيت والفلاح لعن بو بليسي ) وعلى اليمين حليه نحل ( خليه بس الظاهر اني ماسكه معي اما احط النقاط فوق الحروف او اني كنت ما انطقه غلط ) وعلى الأمام الأثاث القديم ( هههههههههههههههههههههههههههههههههههههههه اجل على الأمام يخرب بيتي هذي ضريبه الي يدرس انقليزي ويترك العربي <-- ههههههههههههههههههه ) ونرجع الى الخلف قليلا ( لا لا لا موب معقول اسلوب الاستدراك هذا خخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخ ) وعلا اليسار [ شحنة تراب ] ( حركة الأقواس شيء موب معقول اثري من يوم انا بـ خامس ابتدائي وانا انسق بس لاحظوا شحنه تراب موب شحنة رمل هههههههه ) ثم رجعنا الى البيت الذي في المزرعه ثم الصلاة والسلام على النبي الكريم وعلى آله وصحبه وسلم . ( موب معقوله الخاتمه بعدين من متى وحنا برا البيت ؟ اجل و ثم رجعنا الله يخلف على اميمتي بس ) .. !


يقهرررررررررررررررررررررر من ذولاك الي ما يعطون الدرجه كامله كل هالابداع واخرتها 3.5 ههههههههههههههههههههه

إن شفت فيه حماس بالموضوع ، نزلت تعبيري الثاني رحلتنا البريه هههههههههههههههههههههههههههههههههههههههه ههههههههههههههههههههههههههههههه يوم حنا طالعين بـ ددسن 85 وجدي طالع بسياره جديده <-- قصة معاناة ههههههههههههههههههههه

نشوفكم على خير (^_^) .. !

نسيت اقولكم خوذوا راحتكم بالطنازه :D

|||||| رايق ||||||

[برج 10]

ههههههههههه
أثرك منتهي من يومك صغير !
ماشاء الله عليك ..
بس شكلك قتلت موهبة في الخط العربي ,, أحس ودك تحط كل كلمة بصفحة لحالها << عع , مدري ليه !
,
بالتوفيق اخوي ..

[مسبب زحمه]

خخخخخخخخخخخخخخخخخخخخخخخخخخخخخخخخخخخخخخخخ خخخخخخخ
خخخخخخخخخخخخخخخخخخخخخخخخخخخخخخخخخخخخخخخ
خخخخخخخخخخخخخخخخخخخخخخخخخ
خخخخخخخخخخخخخخ
خخخخخخ
خخخ
خ




رهيييييييييييييييييييييييييييييييييب



ياخي شكل الاستاذ طالب منكم ان التعبير مايقل عن صفحتين<<متعقد

وانت متورط ماعندك افكار

قمت تطمر سبعين صطر قبل التعبير



الله يصلحك

خخخخخخخخخخخخخ

بصرررعه حط موهبتك الثانيه

قصدي تعبيرك الثاني

..

[سبته]

ياويلي ويلااااااااااااااااااااه !


بس بقراه !








SBTAH

[سلطان بن محمد ..]

اطلق شي الشحنه وعلى الامام

شكل نص عيال العبج الكريم معنا اتجاهات اجل سلطان اقدام اخر شي

وانت على الامام الله يخلف بس

[[ ماضي ]]

؛

شكراً

[::متفاءل::]

فيه سؤال أنت لحقت على التقويم المستمر؟

[الليل الطويل]

الصدق انك غطيت على وشسمه بالمواضيع الطويله

[أسد الحرب]

أجل منيومك صغير كذا

[أشقراني]

لا بأس من الحجز حتى تتم القراية




لك منّي ود و ورد وحبة هيل !

[البَراء]

اشوفك ما ذكرت .. كور الطين


يلوموني على التعبييييير .. غريبه ما اخذوك .. جريدة الرياض ..

[الليل الطويل]

الصدق انك غطيت على وشسمه بطول المواضيع!

[ô¤ سـمـو الأحـاسـيـسـ ¤ô]

يا إنك بعد منتب صاحي على ذا التعبير

بس شحنة تراب حلوة وكثر منها بعد

من أول وإنت كذا ,,

ما أقول الله الله يعظم أجر اللي درسوك

تقول جيت بتكسي من لاس فيقاس لشقراء ؟؟ ,, وينها فيه لاس فيقاس لا تكون بعيدة بس

[قـاهـرالـروس]

أقول لا عمرك تطول المواضيع لامردغك

,,

[أبوفهد]

ياخي أنت تعرف تعبّر جدا جدا ..

وأنت أحسن واحد جدا جدا ..

ونزل لنا التعبير الثاني جدا جدا ..

[ذيب تميم]

موضوع جميل جداً جداً ..


على الأمام يارايق !

[برعم]

رايق هل هذا كان خطك وأنت في خامس إبتدائي


أجل مزرعتٌ جميلة

[بو سلمان القاضي]

خلصت ولا فيه تكمله



ايييييييييه راحوا الطيبين


؛؛؛

[أشقراني]

قسم بربي انك منسّم

ما فيه أي أساس للترتيب والتنظيم لا بالتلوين والخط .. ولا بالتعبير !

بس واضح ان الحياة في لاس فيقاس أثّرت على أسلوبك في التعبير .. عشان كذا ما عرفت تصيغه كويس

ومن قوّة الوجه تقول ليش منقص علي نص درجة

الظاهر اني بأحوس الإرشيف وأطلع لك دفتر التعبير حق رابع , قسم بالله تقول دفتر شسمه

أنواع الرسمات والألوان والتسطير والحركتات

والكلام المصفصف .. يا ويلي أنا على نفسي بس




لك منّي ود و ورد وحبة هيل !

[سلطان بن محمد ..]

المشاركة الأصلية كتبت بواسطة أشقراني قسم بربي انك منسّم ما فيه أي أساس للترتيب والتنظيم لا بالتلوين والخط .. ولا بالتعبير ! بس واضح ان الحياة في لاس فيقاس أثّرت على أسلوبك في التعبير .. عشان كذا ما عرفت تصيغه كويس ومن قوّة الوجه تقول ليش منقص علي نص درجة الظاهر اني بأحوس الإرشيف وأطلع لك دفتر التعبير حق رابع , قسم بالله تقول دفتر شسمه أنواع الرسمات والألوان والتسطير والحركتات والكلام المصفصف .. يا ويلي أنا على نفسي بس لك منّي ود و ورد وحبة هيل !

يا شين الرسمات اكرها

مرة كتبت تعبير بسوي حرقة احرق اطرافة مير يروح نص التعبير


ومرة رسمت وحطيت لصقة المدرس يقول لا عمرك ترسم