هنا استفسارات القطع + اللابتوبات !

[بــدر]

السلام عليكم .. =)


كيفكم ..؟



الموضوع هذا بإذن الله راح يكون شامل كافة الإستفسارات عن اللابتوبات أو قطع الكمبيوتر أو أي شي له علاقة فيها ..


رجاءً عدم وضع مشاكلكم هنا .. !


الموضوع هذا راح يكون مفتوح للأسئلة أو طلبات التجميع للأجهزة أو الإستفسارات عن اللابتوبات ..


مثال على السؤال :



أبغى لابتوب استعمالي تصميم ونت مسن وتحميل و ميزانيتي 2500 ريال وش تنصحوني .. ؟


الرد :


حياكم الله في لابتوب من LG اسمه LG RD410 قيمته تقريباً 2100 او 2200 ريال ممتاز جداً لأستعمالك ..



مثال ثاني للإستفسارت :


ابي أشتري لابتوب Dell Inspiron 1525 وحاب استفسر عن الرامات حقته كم ..؟


الرد :


حياكم الله اللابتوب هذا راماته 2GB ..



مثال لطلبات التجميع :


ابغى اجمّع جهاز مكتبي مخصص للألعاب وميزانيتي 3500



الرد :


حياك الله ..



معالج : Core2Duo E8400 3.0 6MB 133MHz
مذربورد : Gigabyte GA EP-45 UD3R
 رامات : 4GB Kingston 1066Mhz
كرت شاشة : ATi 4870 1GB GDDR5
هارديسك : WD 1TB Black Edition
باورسبلاي : Cool MAX 800Wat
كيس : Gigabyte Sumo 5115


التكلفة النهائية : 3450 تقريباً ..


الأسعار غير مضمونة ..



طبعاً جميع الأسعار المذكورة تقريبية ..


مانقدر نضمن شي ..



المساعدة مرحب بها بشرط أنه يكون يدري وش هو يسوي مو كذا مع الخيل ياشقرا ..



الي بيجي وبيكتب سعر يكون هو المسؤل عنه ..


نحن فريق الحاسب الألي نخلي مسؤوليتنا عن أي شخص يجمّع وهو مايدري وش السالفة ..


لاتعتمد التجميعة إلا من الأشخاص الموثوق بهم ..


إذا بتسأل عن قطعة محددة ..


مثلا : معالج i7 920 كم هي سرعته ..؟


نجاوب حنا ونقول : حياك الله المعالج المذكور سرعته 2.66 ..


يجي واحد يسأل عن قطعتين ويبي يعرف وش الأفضل هذا مسموح ..



ممنوع المقارنة بين الشركات .. !


يعني يجي واحد يقول وش احسن توشيبا ولا ديل ..؟


ماراح ياخذ أي اجابة ..


يجي واحد ويقول وش أحسن nVIDIA ولا ATi .. ؟


ممنوع ..


يعني بإختصار الشروط هي :


1- عدم المقارنة بين الشركات خصوصاً اللابتوبات .

2- عدم طرح معلومة بدون التأكد منها 100% .

3- الأسعار غير أكيدة 100% .

4- المقارنات مسموحة .

5- يمنع وضع روابط لمنتديات عربية أو مواقع تطلب التسجيل مهما كانت أهمية الرابط إلا بعد أخذ الإذن من مشرفي القسم .

6- تحديد الميزانية + الإستعمال .

7 - عند طلب قطعة معينة يجب تحمل تكاليف القطع الأخرى اللازمة لها .

8- وضع ميوانية معقولة يعني لايجي واحد مدرعم معه 1200ريال ويقول ابغى جهاز يصبر لي 10 سنوات .

9-هذا الموضوع وضع لخدمتكم فالرجاء التنظيم .

10- إذا كان قبلك 5 طلبات فالرجاء الإنتظار .

11 - عدم إعادة الطلب مثل واحد يبغى يعرف وش الأحسن بين لابتوبين والمقارنة موجودة في الصفحة السابقة .

12- عدم وضع طلبات من باب اللكاعة او الإستهبال .



نتمنى الإلتزام بالشروط .. =)



فريق الحاسب الألي / بــدر ..

[Abdulrazaq]

حياكم الله جميعًا رواد قسم الحاسب ، و أتمنى أن تجدوا ما يَسركم و ما يُلبي رغباتكم ..


فريق الحاسب;

[البراء الرشود]

بأستفتح أنا بسؤال ..

معالج جهاازي :

Core 2 Deo 2.66

والمذربورد قيقا بايت يبدو لي الرمز P45

ودي أوسع الرام لأكبر حجم ممكن ..

فإيش نصيحتك اوستاز ؟

[غٍـنى]

السلام عليكم


مع ثورة التكنولوجيا.. وكثرة الشركات ..وإغراء والمميزات ..

يحتــار كثير منَـا على اختيار الآب توب ..

فمن خلال موضوعي ..

الله لايهنكم

مميزات لاب توب من شركة .. سوني ..

ومميزات لاب توب من شركة .. ماكنتوش ..
طبعا المبلغ يتراوح بين 4000 و4300

لي أني محتــارة بين الشركتين ..
لاتحقررون أي معلومة ..

شاكرة تعاونكم ..والله يجزاكم الجنة ..

[بــدر]

يالله ان تحيي اول شباب ..


اعذروني اول شي طول اليل بأستراحة مع الأهل ..

بأستفتح أنا بسؤال .. معالج جهاازي : Core 2 Deo 2.66 والمذربورد قيقا بايت يبدو لي الرمز P45 ودي أوسع الرام لأكبر حجم ممكن .. فإيش نصيحتك اوستاز ؟

ياطويل الشنبات ياتوب انت ..


وش عنده ابو رامات .. ؟


لا امزح معك ياعزيزي ..


الـ P45 هذا ياطويل العمر اسمه شيبست ..


يجي في المذربوردات كلها ..


لو تقدر تعطيني اسم المذربورد عن طريق برنامج مثل EVERST او CPU-z تصير احسن واحد عشان اقدر احددلك ..


بس اغلب الـP45 تدعم 16 قيقا ..


وللمعلومية ..


اذا بتركب 16 قيقا لازم تغير نظامك إلى Vista Home Pre 64Bit لأنه هو الي يدعم الـ 16 قيقا ..


بس ترى بتكلفك الـ 16 قيقا جداًَ + ماراح تستفيد منها ..


6 قيقا حتى ماراح تحللها ..


ركب 6 قيقا افضل شي ..

السلام عليكم مع ثورة التكنولوجيا.. وكثرة الشركات ..وإغراء والمميزات .. يحتــار كثير منَـا على اختيار الآب توب .. فمن خلال موضوعي .. الله لايهنكم مميزات لاب توب من شركة .. سوني .. ومميزات لاب توب من شركة .. ماكنتوش .. طبعا المبلغ يتراوح بين 4000 و4300 لي أني محتــارة بين الشركتين .. لاتحقررون أي معلومة .. شاكرة تعاونكم ..والله يجزاكم الجنة ..

يالله حيها ..


ياخوك دام معك مبلغ حلو ماشاءالله ..



فخذي لك سوني فايو ..



بالتحديد الإصدار FW ..


افضل شي من سوني فايو اسمه AW بس انه غالي .. :/


ايام 2007 كان يجي مع الـ AW كافة برامج ادوبي CS3 + Vista Ultimate ..


بس ذيك الأيام وصلت قيمته بالسعودية إلى 8000 ريال .. :/


المهم خذي لك فايو FW قيمته من 4000 إلى 4400 ..


لاتدورين بديل ..


بــدر ..

[البراء الرشود]

كم السعر التقريبي لو بغيت اركب 4 قيقا رام مثلا ؟

أحس 6 قيقا واجد

[بــدر]

إذا انت في الرياض فرح لحراج العليا ..


القيقا هناك بحوالي 45 ريال او 50 ..


الكلام طبعاً على رامات Kingston بتردد 800 ..


تقدر تاخذ وحدة ترددها 1066 بس ان القيقا منها بحوالي 75 ريال او 80 ..


بس ماراح تستفيد من التردد العالي الا لما تكسر السرعة يعني ماراح تستفيد واجد ,,


خذلك قطعتين 2 قيقا وركبهم عشان تتفعل عندك خاصية الـ Dual Chanel وهذي الخاصية لما تستعملها راح تستفيد من معالجك بشكل اكبر + إذا عطلت وحدة فالثانية شغالة ..


4 قيقا تقريباً حوالي 230 او 250 ريال إذا بتاخذ مرة وحدة وبتاخذ حبتين خوات يعني من علبة وحدة ..


رح سعّر وشف بكم ..


ايه صح ..


لما تركب 4GB يفضّل تركب نظام 64 بت ..


لأن الـ 32 العادية ماتتعرف على اكثر من 3.25 ,,


يلا بالتوفيق ..

[البراء الرشود]

يعني النصيحة الختامية قطعتين 2 قيقا 64 بت ؟

جاري التفكير بجدية أوي

[Mr.AlSmAwi]

السلام عليكم
أستاذي بدر أستخدامي للحاسب تخريبي يعني تعلم هكر وحاجات زي كذا وأبيلي لاب توب على قد حالي يعني بعشرت ألاف ولا حولها << وش عنده أبو عشرة هههه


لا حوالي الـ 4000

فما رأي سماحتكم

[أرطبون]

أخي الكريم بدر

متابع ومستفيد من خبراتك

وفقك الله ...

[بــدر]

السلام عليكم أستاذي بدر أستخدامي للحاسب تخريبي يعني تعلم هكر وحاجات زي كذا وأبيلي لاب توب على قد حالي يعني بعشرت ألاف ولا حولها << وش عنده أبو عشرة هههه لا حوالي الـ 4000 فما رأي سماحتكم

مايحتاج محيسن معروف ..


Toshiba Satellite A355-S6943 ..


قيمته على النت 4250 ريال ..


إذا تقدر تطلبه من توشيبا مباشرة يكون ممتازد عشان ماينلعب عليك في الملحقات مع الجهاز ..


صفحة اللابتوب : http://explore.toshiba.com/laptops/s...350/A355-S6943

أخي الكريم بدر متابع ومستفيد من خبراتك وفقك الله ...

الله يحييك ويجزاك كل خير ومشكور على المجاملة ..

[إدراك]

السلام عليكم ..

ابي اشتري لاب توب .. استخدامي برمجه اكثر شي + تصميم + نت ..

ميزانيتي بحدود 5000 ..

..

[بــدر]

يالله حيها ..


التصميم له عنوان واحد ..


SONY Vaio ..


طالما ميزانيتك حلوة ماشاءالله فخذي لك Vaio AW ..


بالتحديد هذا الإصدار ..


VGN-AW17GU/Q


صفحة اللابتوب : http://www.sony-mea.com/product/vgn-...ite=hp_ar_ME_i


بالتوفيق ..


ماشاءالله كلكم ميزانيتكم عالية ..

[الــمــهــاجــرة]

سلام عليكم =) !
جايين من طرف ذا توب
ابي اشتري لآب توب احترت بين ثلاثه :s
ماك و ديل و توشيبآ :/ !

المواصفات متشابهه بس الاختلاف بالسعر :/
ماك 3900 ريال .
توشيبا 3499 ريال .
ديل 3299 ريال .

استخداماتي له برامج تصميم فوتوشوب فلاش و كذا !
و تصفح نت !

مابي اطق للـ 4000 !

[بــدر]

بس لو تعطيني اساميها او على الأقل اساميها ..


لأن في لابتوبات ماك قيمته 4000 وماتسوى مقارنة بالأجهزة الثانية ..


ولو عندك حد معيّن يكون افضل وافضل ..


عشان من 3300 إلى 3900 فرق كبير ..


إذا تبين مكتبي فتريه هو الأفضل للأعمال الجرافيكسية ..


وخذي لك لابتوب بعدين للأستعمال الشخصي ..


لأن اللابتوبات صحيح انها ممتازة لكنها ماتوصل مستوى المكتبي ابداً ..


وبـ 3500 تجيبين لك جهاز خارق .. !


مو خارق خارق لكن ممتاز ..


يلا انتظرك ..


بــدر ..

[البراء الرشود]

بدر بأتليقف وبأرد بالنيابة عن اختي ..

هي حدها 4000 ريال ..

وعندها مكتبي تستخدمه للتصميم يعني ذا بيكون للأعمال السريعة والنت والحوسة ذي ..

[الــمــهــاجــرة]

المشاركة الأصلية كتبت بواسطة بــدر بس لو تعطيني اساميها او على الأقل اساميها .. لأن في لابتوبات ماك قيمته 4000 وماتسوى مقارنة بالأجهزة الثانية .. ولو عندك حد معيّن يكون افضل وافضل .. عشان من 3300 إلى 3900 فرق كبير .. إذا تبين مكتبي فتريه هو الأفضل للأعمال الجرافيكسية .. وخذي لك لابتوب بعدين للأستعمال الشخصي .. لأن اللابتوبات صحيح انها ممتازة لكنها ماتوصل مستوى المكتبي ابداً .. وبـ 3500 تجيبين لك جهاز خارق .. ! مو خارق خارق لكن ممتاز .. يلا انتظرك .. بــدر ..

مآك ماشفته اخوي كلم محل وقال له المواصفات و السعر ^^ !
يقول ان مديله قديم !

لا مابي مكتبي ..
معليه نصمم ع اللابتوب و ع المكتبي !
انا سالت قالوا لي يناسب لك الرام 2 قيقا واكثر !

توشيبا : satellite A300-20A
ديل : INSPIRON 1525

تبغون المواصفات بعد ؟

[أبوهيثم]

عذرا بطب مع الاخ بدر رغم اني ما استاذنت منه

في اعتقادي هناك موديل من توشيبا اراه مناسب لكم وزود ايضا

هو يتميز بكرت الشاشة حيث انه ATI 512 وهالنوعية من الكروت تنفع لمحبي الالعاب والتصاميم

السرعة 2.00 والهاردسك 250 جيجا والرام 2 جيجا والامور الاخرى كما هي مع الاجهزة الثانية

وسعره بالضبط 3599 , شريته قبل اسبوع تقريبا لاحد الاقرباء من جرير

صحيح ان الاجهزة الجديدة كلها سنترينو 2 وهذا الجهاز سنترينو بدون 2

ولكن يعتبر ممتاز جدا ولا يعيبه هالشي

ابوهيثم

[بــدر]

يالله ان تحييهم كلهم ..

بدر بأتليقف وبأرد بالنيابة عن اختي .. هي حدها 4000 ريال .. وعندها مكتبي تستخدمه للتصميم يعني ذا بيكون للأعمال السريعة والنت والحوسة ذي ..

ماشاءالله ميزانية ممتازة ..


كويس اهم شي التنسيق بين الأجهزة ..

مآك ماشفته اخوي كلم محل وقال له المواصفات و السعر ^^ ! يقول ان مديله قديم ! لا مابي مكتبي .. معليه نصمم ع اللابتوب و ع المكتبي ! انا سالت قالوا لي يناسب لك الرام 2 قيقا واكثر ! توشيبا : satellite A300-20A ديل : INSPIRON 1525 تبغون المواصفات بعد ؟

وش الي يحدنا على القديم والي احسن منه موجود ..؟


عشانه ماك على طول نخلي كل شي ونروح له ..


والي انتي حطيتيها مو مرة صراحة ..


خصوصاً الـ Dell ..


لأن هذا الموديل 1525 مشاكله بالهبل ..


وش رايك في Dell XPS M1530 .. ؟


ممتاز جداً ..


سعره مناسب للميزانية حوالي 3500 ريال ..


مواصفاته " مطاطة " ..


يعني عندك فيها خيارات مثلاً المعالج 2.53 او 2.4 او 2.2 والرام 2 او 4 او 8 بتردد 667 او 800 او 1067 ..


نظام التشغيل على حسب مواصفاتك طبعاً بس تقدرين ترفعيهنا يعني فيستا هوم بريميوم او اولتيمت بالإصدارين 32 او 64 ..


كرت شاشة nVIDIA® GeForce® 9400M G او 9500M بذاكرة 265 ..


الام يبدا من 2 قيقا و اربعة قيقا واعلى شي 8 قيقا ..


هارديسك فيه 128 قيقا بالتقنية الجديدة SSD الي تسرّع ابو ابو ابو الجهاز وتعطيك امكانية ملىء الهارديسك لأخر ميقا ونفس الأداء والجودة لو عندك 80 بارتيشن وتقدرين تاخذين الهارديسك 320 قيقا + 500 قيقا بس انها زي الهارديسكات العادية من ناحية السرعة وكل شي ..


مقارنة ..

http://www.youtube.com/watch?v=rjCmLJtITK4


تشغيل 17 برنامج على معالج بتردد 3.0 ..


http://www.youtube.com/watch?v=bj86TKHTo_8



الشاشة 13.3 يجي منها وايد سكرين وعادية ..


اقولك ..


بقعد اكتب مواصفات الين تعورني يدي وهاللابتوب كل ماله يزيد ويزيد ..


http://www1.euro.dell.com/content/pr...=dhs&cs=aedhs1


هذي صفحة اللابتوب واسأليني عن اي شي فيها ..


تلميح :


التعديل الأخير تم بواسطة عبد الله العرادي ; يوم أمس الساعة 09:49 PM. السبب: =) .. التنسيق منتهي P: ! < - انت احلى واحد يالمنتهي ..


بــدر ..

[بــدر]

عذرا بطب مع الاخ بدر رغم اني ما استاذنت منه في اعتقادي هناك موديل من توشيبا اراه مناسب لكم وزود ايضا هو يتميز بكرت الشاشة حيث انه ATI 512 وهالنوعية من الكروت تنفع لمحبي الالعاب والتصاميم السرعة 2.00 والهاردسك 250 جيجا والرام 2 جيجا والامور الاخرى كما هي مع الاجهزة الثانية وسعره بالضبط 3599 , شريته قبل اسبوع تقريبا لاحد الاقرباء من جرير صحيح ان الاجهزة الجديدة كلها سنترينو 2 وهذا الجهاز سنترينو بدون 2 ولكن يعتبر ممتاز جدا ولا يعيبه هالشي ابوهيثم

يالله ان تحييه ..


ابركها من ساعة يوم انك تطب ..


ياخي ابو هيثم انت ماتستاذن لو تبي عيوني ياشيخ ..


(F) على هالطبة الحلوة ..


بــدر ..