وش أزين جلسة للمذاكرة !!

[abu_anas_h]

يا عيااااااااااااااااااااااال ,, ألحقواااااااااااااااااا صاحب المقاصد الحسنة ,,

أروح لها

لا ما أروح لها

الا بروح لها والي يصير يصير

<<_ يهوجس بمسرحية أبو سحلب

يا عيااااااااااااااااااااااااااااااال ,, الحقواااااااااااااااااااااااااا صاحب النوايا الونسة ,,

أحبها

لا ما أحبها

الا أحبها

بس هي ما تحبني

<<_ يهوجس بسيارته


يا عيااااااااااااااااااااااااااااااال ,, الحقواااااااااااااااااااااااا حبيب الكل أبو أنسه ,,

جميع أنواع الهواجيس مرت علي , تصدقون أمس هوجست اني جد

كل ما يخطر على بالك , قد يكون خطر على بالي , إلا المخل والباذنجان

طبعا يا عيااال الخير , أصحاب الخشش الكريمة , والكشرات الطاهرة , والوجيه المنزهة حبيت أشاوركم في أنواع وطرق ووضعيات المذاكرة

يعني على سبيل التمثيل لا الحصر كنت مع واحد أمس المغرب , وكان يقول أذاكر في غرفة فاضية وأحيانا أصارخ

يالله انك تعافيه ولا تبلانا , قولوا آمين

واليوم أختي تقول اجلس كأنك تحظر تبي تشرح لمبزرة وتفهم , يا الله لك الحمد فعلا العقل نعمة

ومنذ مبطي وأنا أمشي على طريقة مذاكرة معجبتني بالحيل

وهي تعتمد على أمرين :-

<<_ ملاحظة : كل شي في حياتي إما أمرين أو عدة أمور لاحظتوها علي أو لا ؟ !!

- الأمر الأول تفرغ الكَور<<_ بفتح الكاف وتفخيم الواو المعجمة ( الذهن ) من جميع البتاعات الي حولك وتنعزل في مكان ما فيه الا أنت , وأما بشكات المساجد الي خبري خبركم هذي يسمونها مجموعات السواليف والتنكيت وياخذون المغرب نصه قهوة والباقي مذاكرة

- النقطة الثانية : ابدأ بالمنهج تصور عام يعني مثلا أن تبي تذاكر مثلي فقه الحين , وأغلب مواضيعك قتل وذبح وقصاص نسأل الله أن يبعدها عنا وعنكم , تبدأ تتخيل المادة كاملة وتقسمها تقسيم شجري للموضوعات المتفرعة عنها
ومن ثم تفرع عن المادة أكثر من فرع يمكن عشرة أنت يخصك من العشرة واحد الباقي اسحب عليه واجلص فصل في هالواحد هذا تقسيم شجري برؤوس أقلام ما يحتاج تفصيل بس من شان تفهم شكل الشجرة للمادة ومن ثم تجي وتفصل جزئية جزئية كذا يسهل عليك المذاكرة لأنك متخيل المنهج الي أنت فيه

طبعا الطريقة هذي يقول لنا الدكتور عبدالرحمن العايد أن الشيخ محمد بن عثيمين رحمه الله كان يحفظ المسائل الفقهية والأصولية بشكل شجري

وأما الجلسة فأنا أنبسط لا جلست على جنبي الأيسر منضجعا ثاني للركبتين وكفي الأيسر تحت خدي ومرفقي في زاوية حادة

أحس براحة وأنا منجضع على تلك الوضعية ولكن لظروف صحية ما أقدر أجلسها الآن - ضروف آخر عملية - ولهذا طرحت هالموضوع طالبا منكم المشورة في الشسمة , ووشلون نذاكر

فيه نقظة أخيرة وأدري طولت عليكم بس عارف أنكم دايم تصبرون علي وتعرفوننن كلامي كثير وهذا دأبنا نحن العلماء ولا أزكي نفسي

النقطة هذي الي هي وأنت تذاكر حاول أن تربط كل معلومة بالي قبلها بأي طريقة , تذكرون بالاختبارات يجيك سؤال ما تذكر إجابته ولكن تذكر أحيانا من القهر مكانه من الصفحة تذكر الكلام الي قبله أو الي بعده بس هو بالذات ما تدري شنو , ولكن لو أنك ربطت كل معلومة بالي قبلها لو بعلك كان جبتها


وتكفى أنت واياه بيضوا وجيهنا قدام أبو تركي تراى بدينا نشوفه بالديوانية من أمس

ويبي يجي ناس يبي يقول أحسن طريقة مذاكر والا طريقة حل واجب من الحين أقول لهم بايخة

[[ .. رايق .. ]]

ـ ـ ـ ـ ـ ـ ـ ـ ـ ـ ـ ـ ـ ـ ـ ـ



ميو ميو .. (='_'=) .. !


قبل التحرير
ـ ـ ـ ـ ـ ـ ـ ـ ـ ـ ـ ـ ـ ـ ـ ـ

بعد التحرير :P

شف يا ابو انسه .. انا امس خلصت مذاكره اخر ماده لي يعني ما بقى عندي الامادتين [ ريدنق "قرآءة" ولسننق "استماع" ] يعني كلها ما تتذاكر .. فانا بعطيك جميع الوضعيات الي ذاكرت فيها يوم الخميس والجمعه والسبت والاحد .. وكل يوم كان له وضعيه نسئل الله السلامه والعافيه .. !

الصراحه مذاكره يوم الخميس كانت من اورع المذاكرات بس كانت للاسف بدون وضعيه محدده يعني تصلح لك كنت اذاكر رياضيات وكنت الي اذاكره فاااااهمه زين فـ وانا اذاكره بس جالس اراجع معلومات يعني جالس اقلب اوراق واشوف المسائل ووش لون الحل .. <-- هذا مراجعه وطنيه موب مراجعة رياضيات .. ايوه عشان كذا كان جمبي اللاب توب .. اول الشي اللاب توب كان عندي لامرين <-- ابو انسه كيف الحال .. الامر الاول كنت اطور ترافيان واشيك عالمعالي ويمين يسار اهجول .. طبعا اهجول اوقات الاستراحه بين اوقات المذاكره والامر الثاني كان لترجمه الكلمات ويا الوافي ما تقصر يا الوااااافي .. !

مذاكره يوم الجمعه كان فيها كثير من التركيز وايضا بدون وضعيه لاني كنت مره اترجم ومره احل مسئله ومره اجيب دفتر ومره ادور قلم ومره ادور جوالي يعني حوسه .. !
وضعيه يوم السبت كانت هائله جدا جدا وذكرتني بـ ايام ثالث ثانوي الله ياخذ منب قايل بسس (>_<) .. كان عندي اختبار [ فوكابلري "كلمات" واختبار حاسب ] فكان الوضع متئزم شوي .. نزلت تحت للمقلط الي كنت اذاكر فيه ايام ثالث ثانوي لان ايام ثالث كنت اذا شفت الفراش اخق واثولث وعلى طول تقطر سعبوله ونوووووم حتى من زود الشفقه على النوم يطلع فوق راسي البالونه ذيك الي بالافلام كرتون لكن انا تفقع البلونه ولا ما تنفقع البلونه نايم نايم ايام واووووووتس والله ياهي تحوم التسبد .. المهم تقولون لي ليه المقلط .. اقولكم اول شيء كانت جلساته مريحه والأهم بالنسبه لي انواره قويه .. يعني الورق تغدي وااااااضحه مره مره .. عيونك ما تعورك ولا تفقد تركيزك بسرعه .. وبعد المقلط الوانه مريحه نوعا ما للعين .. فـ منااسب جدا للمذاكره الصدقيه .. !

مذاكره يوم الاحد الي هي امس كنت جدا جدا خوقاق .. لاني ما بديت اذاكر الا الساعه 11 ونمت الساعه 12 هي تقريبا نفس وضعية ابو انس لكن انا اطبق السنه انسدح عـ جنبي الايمن واحط يدي على خدي وكوعي عالسرير .. ويا حبذا مخده ولا مخددتين تحت ايدي عشان ما اتعب واقرب الابجوره للسرير عشان يصير الكتاب اوضح وخذ يا مذاكره طبعا الوضعيه هذي دايم دايم اخلص المذاكره بسرعه واقوم اراجع الفجر قصدي انام وانا ما خلصت نص المنهج واقوم الفجر مرتااااااع الانوار مفتوحه والكتاب نصّه سعابيل حتى الكمبيوتر مفتوح وانواع المحادثات .. !

اليوم الوضعيه تبي تكون انسيابيه جدا جدا جدا .. !

ابو انس حبيتك .. !

|||||| رايق ||||||

[أسد الحرب]

والله إني تعبت ابي اعرف اذكر لكن ما قدرت

[abu_anas_h]

المشاركة الأصلية كتبت بواسطة أسد الحرب والله إني تعبت ابي اعرف اذكر لكن ما قدرت

يبو أنا ما فتحت عيادة نفسية تجيني تشتكي

أنت وش تسوي إذا بغيت تصير دافور

[خوبال]

يمدحون المذاكرة على رجل وحدة

[فـاتـك]

أنا اجلس بالغرفه واقعد اصارخ على روحي ..
































أجل ابو انس الحمدلله على العافيه ؟؟ انا وابو صالح نعرف نذاكر وانت ......ذذ

[شُـــعـــيـــب]

المشاركة الأصلية كتبت بواسطة abu_anas_h يبو أنا ما فتحت عيادة نفسية تجيني تشتكي أنت وش تسوي إذا بغيت تصير دافور

والله شكلك حمق ... ماخبرناك كذا يابو انسه ... والله انك متغير ... يبيلك تجلس معي جلسة ايمانية نعيد فيها تأليف قلبك











اما الجلسة الصحيحة للمذاكرة والله اعلم .. انا اتكلم عن نفسي

تجلس ياحبيبي على كرسي وقدامك طاولة .. وتصير الطاولة موازية لصدرك ... يعني ماتصير طمينه توجع ظهرك .. ولا رفيعه توجع ايدينك ... عرفت


والجو يصير هادي ... يعني مهب تجلس تذاكر بالغرفه والبزارين بالصاله مشغلين قناة الكرتون ومطولينه على اخر شي ..


وشغل مذاكرة المسجد ذي ما دخلت مخي ... يتسذبون على انفسهم ... نص الوقت قهوة وشاهي والنص الباقي يتلاحقون بمصلى الحريم ..


.

[₪•غـطـريـف•₪]

*


*

انبطح على بطنك وارفع رجيلاتك وخذ لك كل شوي رشفه من ذا العصير




مجربه >> ما تعوق معه


*


*





**غـ . ــطــريــ . ــف**

[EXIT]

.. بالنسبة لي ما أعرف أذاكر إلا عند التلفزيون و الصوت على آخر شيء ..

و اللمبات حقت الغرفة كلها على عيوني ..

<< تراي صادز

..

و بالنسبة لوضعية الجلوس فهي .. مبنطح على البطن و الرجول تقول كأنها أناتل أريل ..

[أسد الحرب]

المشاركة الأصلية كتبت بواسطة abu_anas_h يبو أنا ما فتحت عيادة نفسية تجيني تشتكي أنت وش تسوي إذا بغيت تصير دافور

والله إني كنت دافور أيام الثانوية

[Bo Saad]

تخيل تذاكر والملائكة تدعو لك !




قال رسول الله صلي الله عليه وسلم ((
... والملائكة يصلون على أحدكم ما دام في مجلسه الذي صلي فيه يقولون: اللهم ارحمه، اللهم اغفر له، اللهم تب عليه، ما لم يؤذ فيه، ما لم يحدث فيه)) (42)( متفق عليه)


الطريقة والله اعلم توضا وصل ركعتين في مكان مذاكرتك وابدأ المذاكرة
وكل لحظه تمر عليك في مكانك وانت تذاكر تدعو لك الملائكة ( والله اعلم )


والله يوفقنا ويوفقكم جميعا في الدنيا والآخرة

..
...الحديث كامل :

عن أبي هريرة - رضي الله عنه - قال: قال رسول الله صلي الله عليه وسلم (( صلاة الرجل في جماعة تزيد على صلاته في بيته وصلاته في سوقه بضعاً وعشرين درجة، وذلك أن أحدهم إذا توضأ فأحسن الوضوء، ثم أتي المسجد لا ينهزه إلا الصلاة، لا يريد إلا الصلاة، فلم يخط خطوة إلارفع له بها درجة، وحط عنه بها خطيئة حتى يدخل المسجد، فإذا دخل المسجد كان في الصلاة، ما كانت الصلاة هي تحبسه، والملائكة يصلون على أحدكم ما دام في مجلسه الذي صلي فيه يقولون: اللهم ارحمه، اللهم اغفر له، اللهم تب عليه، ما لم يؤذ فيه، ما لم يحدث فيه)) (42)( متفق عليه)...

[abu_anas_h]

المشاركة الأصلية كتبت بواسطة [ .. رايق .. ] ابو انس حبيتك .. !

يكفيني هالكلمة

[البراء الرشود]

أنا ما اعرف اذاكر وإلا إلا متربع على الفراش ولحالي بالغرفة !



طبعا المذكرة احد حالتين بيصير لها :


1- تمتلي شخابيط

2- ما تمتلي شخابيط يعني على حسب


يله بس بروح أدرس نحو فاضي لكم انتو !




The Top

[abu_anas_h]

المشاركة الأصلية كتبت بواسطة شُـــعـــيـــب والله شكلك حمق ... ماخبرناك كذا يابو انسه ... والله انك متغير ... يبيلك تجلس معي جلسة ايمانية نعيد فيها تأليف قلبك seko:

أما عن تأليف القلب ما أتوقع فيه تأليف قلب زود على حق البارحه



وتصدق فكرة الكرسي والطاولة جازت لي لأني تخيلت شكلك أنت والطاولة وخشت مزاجي :seko:

[abu_anas_h]

المشاركة الأصلية كتبت بواسطة The Top طبعا المذكرة احد حالتين بيصير لها : The Top

والله أثرت فيكم وأنا ما أدري

[abu_anas_h]

المشاركة الأصلية كتبت بواسطة خوبال يمدحون المذاكرة على رجل وحدة

تدل المركاز ؟

أنصحك تمسك خطك ولا تلف قبل العاير

[عبـــggد]

انا اجلس بغرفه لحالي واصارخ واشرح لنفسي


أخوك عبـــــــــــggد

[[ .. رايق .. ]]

المشاركة الأصلية كتبت بواسطة abu_anas_h يكفيني هالكلمة

ـ ـ ـ ـ ـ ـ ـ ـ ـ ـ ـ ـ ـ ـ ـ ـ



شف هي احد حالتين :-
1- يا انك ما قريت ردي .. !
2- يا انك غايرن من ردي لانه اطول من الموضوع .. !

|||||| رايق ||||||

[طايف]

ابو انسه كيف حالك.. مشتاء لك كتير كتير

[ياسر الاسمري]

يا طول ردود رايق