يوميات مُطَبَّق

[ليل هادئ]

بسم الله الرحمن الرحيم

سلام الله عليكم ورحمة منه وبركاته

يالله حيهم ومسهم بالخير

تتوقعون كذا من عنوان الموضوع إني بجيب شخصية وبسميها مُطَبَّق وبكتب عليها قصة ؟

طبعا هذي عيارتنا بين الطلاب اللي كنا ندرسهم تخيلوا حتى الابتدائي عارفين التطبيق

الموضوع وما فيه إنه بعد الضغوط اللي واجهتها من كذا واحد وبعد النقد اللاذع والضرب بيد من حديد والانبثاق من بوتقة التفكير

فكرت إني أنزل موضوع عن أيام التطبيق الله يعيدها يا هي شي خوبالي وخويالي .

الموضوع كنت ناوي أنزله بعد الاختبارات لكن قلت لعلي أنزله الحين وأكمل الباقي على فترات كل ما شفت إني فاضي نزلت مقطع بسيط < - - - هي كلها ست أيام شلون تجي بذا الطول

على العموم بكتب بعض القصص اللي صارت لي وصارت لبعض الشباب الآخرين مضحكة عجيبة غريبة .... إلخ

أبدأ وأقول

من بداية الترم وإنا نترقب تنزل الأسماء .. كل يوم نروح لم اللوحة اللي دايم يعلقون فيها الأسماء ونشوف نزل شي والا لا وطول هذي الفترة كل ما جلسنا نفطر والا بين المحاضرات نسولف عن أمنياتنا في التطبيق اللي يقول أتمنى اصير مع فلان وفلان أقل شي نسولف مع بعض وقت الفراغ والا إذا بغيت سؤال والا شي سألته

واللي يقول أتمنى أطبق في المدرسة الفلانية مديرها عمي او من من جماعتنا أو طلابها مميزين

وكل واحد له امنية تختلف عن الآخر

إلا أمنية واحدة كل الطلاب متفقين عليها

كلهم يقولون يا رب ما يصير تطبيقنا في مدرسة بشرق الرياض وبالنسيم والنظيم بالتحديد اسمع يا برعم أنت وأبو سحلب شوهتوا سمعت حواريكم

المهم إنه في يوم من الأيام وكان يوم أربعاء طالعين بدري وجالس أتمشى أنا وخويي كان وراه مشوار وانا كذلك فقلنا خل نتمشى إلين يقرب موعد أشغالنا وكل واحد يشوف سكته

ما درينا إلا جوال خويي يدق يقول أبشرك نزلت أسماء التطبيق ويتشقق من الفرحة يقول هاه وين قال ما أدري خذ جوال مشرفك ودق عليه يحدد لك مدرسة .

قبل لا يسكر السماعة قال شف مشرف سعيد كم رقمه <- - - سعيد هذا أنا لا أحد يتفلسف ويقول من سعيد

المهم عطانا رقم الجوالات دق خويي على مشرفه وكان إنسانن حبيب بس إنه نظامي يقول أهم شي الحضور الساعة 6.30 والتحضير الجيد للدروس وعطاه كذا قائمة طويلة بالمطلوب منه يسويه

يوم سكر السماعة إلا نفسيته زفت يقول هذا اولها الله يستر من تاليها .

قال دق على مشرفك وشف دقيت على مشرفي طلع حبيب زي العسل وأطلق يقول تعال أنت ونتفاهم بعدين موب لازم أسد نفسك من الحين بالمطلوب

جا اليوم المنتظر اللي هو يوم الأثنين وكل واحد متحمس يروح لمدرسته أول ما دخلنا للمدرسة ويتلقفونا مدرسين اللغة العربية كل واحد يقول خذوا مادتي وطلابي أسهل

لدرجة عن مدرس رياضيات شايب منتهي يقول خذوا رياضيات مع اللغة العربية تراهي سهلة أسهل من القواعد

بعد الطابور رحنا لغرفة المدرسين وكل واحد يحرج على فصوله يقول خذوها اللي يبي أولى متوسط واللي يبي ثاني ومن اللي يبي ثالث

للمعلومية المدرسين من يوم شافوني من تحت قالوا إنا بنمسكك ثالث متوسط شكلك كبير

وعلى طاري شكلك كبير يوم فليتها مع الطلاب آخر يوم ما دريت إلا واحد يقول يا أستاذ أنت شلون تدرس شكلك شايب !

ما علينا

بدوا إخوياي يتقامزون على المدرسين ويتهاوشون على أولى متوسط كلن يبي يدرسهم يقول أسهل وأنا بطبيعني ليل هادئ أقصد هادئ

جالس أناظرهم وأقول الحمد لله على العقل

يوم خلصوا توزيع الفصول وكل واحد أخذ حصته وعرف فصله بقيت انا وكان جمبي مدرس الله يجزاه خير كان هو اللي ماسك ثالث متوسط

قال تعال انت اخذت جدول والا شي قلت لا

قال طيب تعال أعطيك فصلين من ثالث متوسط من أحسن الفصول عندي هاديييين جدا ومتفاعلين معك في الشرح

قلت على بركة الله وفعلا طلعو من أحسن الفصول واخوياي اللي أخذوا أولى وثاني متوذين منهم إلى أبعد درجة
عندهم في الفصل الواحد ثلاثين أربعين طالب وانا ما غير 25 ولا يحضرون كلهم ما قد جيتهم يوم وهم كاملين ما أحد منهم غايب

كان أول حصة لي في ذاك اليوم الثانية وكان باقي على بدايتها ربع ساعة جلس المدرس يعلمني وش طريقة تدريسه لها ووشلون أتعامل مع الطلاب وأحفزهم

كان المادتين اللي أنا ماخذهن نصوص وإملاء مادتين حليوات وسهلات يوم بدت الحصة قال يالله مشينا للفصل أعرفهم عليك وأدلك الدرب

وانا رايح جالس أتخيل كيف أشكالهم وكيف أجسامهم ووشلون يفكرون ولعلي بقابل ناس جثث وكبار وزحييييييييف خصوصا إن المدرسة اللي كنت أطبق فيها في المصيف والمصيف ما يحتاج سمعته فوق السما

دخلت عليهم تفاجئت يوم شفت أشكالهم صغار يبحلقون فيك حسيت إني داخل على ابتدائي .

فعلا ما توقعت أشكالهم إلى هالدرجة وجلست أفكر يوم كنا في ثالث متوسط أذكر إنا كنا أكبر من كذا بعض وأذكر كان اكثر الفصل طول الأستاذ يعني واحد ثنين قصار

لكن هذولي كلهم قصار وصغار

المهم كانت حصة تسميع نصوص

فلان ! حافظ

ايه يا أستاذ حافظ

طيب تعال سمع

يجيك وهو طاقه الحيا مدرس جديد ولا عرفتهم بنفسي ولا شي على طول طبينا في التدريس

تجي عند واحد ثاني <--- علة طاري و1حد ثاني تراه امس جاي للرياض ولا علم أحد <--- فضيحة ذا

فلان حافظ

لا يا أستاذ

يالله قم واقف

يا أستاذ آخر مرة إن شاء الله أحفظه الأسبوع الجاي

يالله قم واقف بس

صراحة تحس بمتعة كذا ذذ

بس ما كان قلبي يطاوعني أخلي أحد يوقف أقول له قم واقف يوقف له دقيقتين كذا ثم أرحمه أقول له اجلس ولا عاد تكررها وفي الأخير ما عاد صرت أوقف أحد

حسيت إنهم مظلومين من جد صرت إذا دخلت عليهم بعد الفسحة اللي معه فطور يفطر اللي جايب ترمس شاهي يشرب هو واخوياه أهم شي لا يزعجني أحد وأنا أشرح ولقيت هالطريقة تنفع معهم لقيت منهم احترام إذا كلمت أحد منهم سمعك لأنك عطيته اهتمام واحترام فعلا التدريس إذا كان قائم على علاقة احترام من المدرس للطالب يكون نافع ومثمر

ولله الحمد جيتهم وطلعت منهم ما طقيت أحدهم ولا طلعته من الفصل إلا ثنين أزعجوني آخر يوم جلسوا ورى يضحكون طلعتهم للوكيل وطقهم وصراحة إني تندمت بعدين يوم جو رحمتهم يوم شفت أشكالهم

لعلي أكتفي بهالجزء على أن أعدكم بالتكملة في أجزاء أخرى باقي مواقف أحسن من ذي بكثير بس انتظرونا

[[ .. رايق .. ]]

ميو (='_'=)

[أبوعزّام]

وعليكم السلام ورحمة الله ..


القهر بالتطبيق إنك ساكن بالشمال ويعطونك مدرسة بالجنوب
وإلا اللي ساكن بالجنوب يعطونه مدرسة بالشمال :s
تخبط مابعده تخبط

؛

ننتظر الديك العزوبي ينزل مواقفه بعد

التدريس إذا كان قائم على علاقة احترام من المدرس للطالب يكون نافع ومثمر

تربوي ماشااء الله عليك

^

تحس إنه ماقرأ إلا هالسطر ذذ

[abo adnan]

جــمــيــل..!

بانتظار الأجزاء الأخرى..!

[مثقف]

على طاري هالمدرسة والطول والقصر
أذكر أول ما دخلتها كنا نشوف عمااااااااااااااااااااالقة .. عمالقة جدا
لكن ما أمدانا وصلنا ثالث إلا وكلهم أقزام .. بعدين لا تسب في المصيف .. تراي تخرجت منه وعشت فيه أحلى أيام عمري
ترى هالمدرسة صفقوا مدرس وكسروا قزاز سيارته عشر طعش مرة
ولا صح أنت طلعت ما يمدينا نروعك

مثقف

[مُتنفَس]

ههههههههههههههههههههه

أما الشايب اللي يقول تعال درس رياضيات !
قلت السالفة لأمي قعدت تضحك ضحك



صدز والله يا شكلك أنت كبير ،ـ
اذكر أول مرة شفتك قلت وش يبي الشايب عندنا

صرت إذا دخلت عليهم بعد الفسحة اللي معه فطور يفطر اللي جايب ترمس شاهي يشرب هو واخوياه أهم شي لا يزعجني أحد وأنا أشرح ولقيت هالطريقة تنفع معهم لقيت منهم احترام إذا كلمت أحد منهم سمعك لأنك عطيته اهتمام واحترام فعلا التدريس إذا كان قائم على علاقة احترام من المدرس للطالب يكون نافع ومثمر

لكن يا ليل ليتك تدرسنا يا شيخ
والله إنك رهيب ..

يا حبي لك يا شيخ

حسيت إنهم مظلومين من جد

أخيرا واحد يحس بحالة الطلاب
خلاص خلاص أنا ما أقدر اكمّل


^
^

واحد ما يعرف يختم الرد !

[قـاهـرالـروس]

شباب ما تلاحظون أن ليل بعد الكلام اللي جاء للمشرفين فوق بدا يتلحلح

بالنسبة للموضوع بأقراه بس خلني أروق قبل

[مباري الساس]

!|!|!|!

الله يعين المطبقين :/

يوه تذكرت ياما بالمغاط نبطنا المدرس

أخبر جانا مدرس بدوي يدرس إنقليزي قاعد نخف بوه عن الشعر عطنا شعر بالعربي قلنا أنت مدرس إنقليزي وتعطينا عربي

يوم جت الحصة الجاية بدا يعطينا أشعار E


أيام

mubari al-ssas

[سعداف]

ميو ميو

تصدق أكتشفت أنك ماتعرف تُدرس

أول ماقريت الموضوع أحسبه ذاك اللي يوكل

ننتظر الباقي ..

لدرجة عن مدرس رياضيات شايب منتهي يقول خذوا رياضيات مع اللغة العربية تراهي سهلة أسهل من القواعد

[أبو ناصر]

حماس والله فغرت فاي وأنا أتابع ،

بانتظار البقية ،

[ياسر الاسمري]

وه لو تجي عندنا
تلقى ناس .. محترمين ، اخلاق ، كل شي

مو زي بعض المدارس خلنا ساكتين بس - هذا السطر لا يعنى به أبو عزام ولا محمد التركي ولا فخامة الرئيس -

[أبوعزّام]

^ ^

وش به أبوعزّام ومحمد التركي

وهـ بس

[.:أبـيّ:.]

موضوع رائــع ومواقف مميزة ،،

جميلٌ حظ الطلاب أن درّستهم


ينقل للقسم المختص
التربية والتعليم

[[ .. رايق .. ]]

ـ ـ ـ ـ ـ ـ ـ ـ ـ ـ ـ ـ ـ ـ ـ ـ




8
8
8


هههههههههههههههههههههههههههههههههههههههه ههههههههههههههههههههههههههههههههههه


ابو براهيم والله انك كفو وقسمن بالله ههههههههههههههههههههههههههههههههههه


.. !

|||||| رايق ||||||

[abu_anas_h]

تبيني أساعدك في التنسيقات

[ألف باء ...]

.'.

هل أحسست بوجود عوامل متقاربة بين التطبيق / الإشراف ؟


'.'


ألف باء ...

[مؤمّل]

ليتني لحقتك وانت اللي تدرسني ..

<<< تحسه مظلوم من المدرسين

[ليل السكون]

يالله ليل نزل موضوع >>تكفى ياللي مقطعهم مواضيع

ماعلينا .. ماشاء الله ياليل .. لأول مرت أتمنى إني أصغر وآخذ محاظرة عندك ..

أجل ثالث متوسط .. بالنسبة لشكلك أقولك أنت وأبو عزام ما صدقت أن اعماركم كذا .. حتى ابو عزام يوم شافني ماصدقت طلع بطاقة الاحوال يوريني .. ::

أما أخوي .. والله ياهو شديد .. بابتدائية بالمصيف بعد .. والمشرف عليه توه جديد ومسوي نظامي والحضور 6 ونص .. واحضر الطابور .. وهيك حركات

شكلي باكتب موضوع عن قصص اخوي

ياحليلكم يالمطبقين .. مسوين قلق .. بكل مكان تعطونا قصصكم .. كن مابه احد درس الا انتم ..

اشوى ان المهندسين ما عندهم تطبيق

[أسد الحرب]

حلو حلو


واحد من أخوياي طبق هالترم في إبتدائية في الشرقية

حضر الحصة الخامسة عند صف 3 إبتدائي إنتظار

عيال الذينا طلاب 3 ضحكوا عليه وقالوا له إحنا نطلع بعد الخامسة على طول

ومسكين طلعهم واكلها مع المشرف حقه

[البراء الرشود]

ترقبوا إن الله يسر السنة الجاية ذكريات مطبق اثنين ..






أقول ليل يمدي ننزل التطبيق بالصيفي ؟






The Top