الملياردير واحد الاستفزازي :)

[واحد منهم]

-<

بسم الله الرحمن الرحيم


صبحكم الله بالخير ياشباب .. أول شيء أبارك للمشرفين الجدد .. الله ينفع بهم !

من فترة وودي أكتب موضوع بالديوانية بس ماش مافيه لياقة تساعد .. عاد هالأيام صار لي كم من موقف و أستفدت في حياتي من كم من درس وعندي كم من شغلة حبيت أدردش معكم فيها ..

أدردش معكم فيها كـ شبابـ عاقل واعي ، فـ الدنيا إفادة و إستفادة
.. و حياة المرء محطات إن أحسن التزود منها بلغ مايريد ..

منذ أيام بسيطة كنت أسولف مع واحد من الحبايب ما أدري وش جاب الطاري ، قال أنت أصلاً مستباح العرض ..

بـ معنى كلامه طبعاً .. قلت لهالدرجة ! قال و أكثر .. لدرجة أن وصل الأمر إلى القذف .. لست هنا للدفاع عن نفسي .. لكن أحببت أن أقول أننا لن نحاسب عن أفعال الناس .. إنما نحاسب على أفعالنا نحن ..

لنعيش حياة طيبة بقلوب صافية .. إن حصل شيء من الخلاف مع شخص ما .. أتمنى ألا يتسع ويصل للغيبة و القذف ..

سئل النبي صلى الله عليه وسلم أي الناس أفضل؟

قال : " كل مخموم القلب صدوق اللسان "

قالوا: صدوق اللسان نعرفه فما مخموم القلب؟

قال:
" هو التقي النقي، لا إثم فيه ولا بغي ولا غل ولا حسد "


كلامي غير مرتب لكن حسبي بأنه من القلب للقلب ..

^
^
^

خلصنا من الدردشة الجدية .. خلونا اخرط عليكم شوي :P

مرتن من المرات .. دق علي خالي العزيز .. سألني وش عندك السبت الصباح قلت ماعندي شيء .. قال طيب ابيك تخاوين المحكمة .. رحت معه المحكمة ..

ياجماعة الخير .. دخلت المحكمة و أنا لا أكاد أملك قوت يومي << وش عنده ذذ

لا صدز دخلت و أنا مطفر مقطوعتن عن المكافأة .. وحالتي حالة .. مرتن يباشر لي برعم .. ومرة يتصدق علي أبو سحلب .. بس الصراحة عرفت الإيثار من أبو سحلب .. ياكم من مرة تعشينا فلافل .. ولا تعشينا من بيت الشواية نص حبة ..

و الصراحة ياحبي لرايق كان منتشلني من حالة الفقر تهي تهي ..

اقول لكم طلعت من المحكمة و أنا أملك أكثر من فلة وكم من أرض :S

قيمتها رقم وجمبه صفة أصفار يعني رقم من 1 إلى 100 وبجمبه ستة أصفار

طبعاً بعدها رحت سويت لخالي وكالة عامة لكل ممتلكاتي << ايه ممتلكاتك بالأسم .. أنا ماكنت مستوعب الوضع لين جاني اتصال من أحد الشركات العقارية الكبيرة و المعروفة .. كيف جابوا رقمي ما أدري ..

السلام عليكم .. وعليكم السلام .. حياك الله أبو عبدالله كيفك إن شاء الله بخير ؟ .. طال عمرك معك فلان الفلاني مدير شسمه بشركة الفلان العقارية .. الله يحيك فللكم الي بحي الحمراء .. عندنا لها زباين جاهزين .. لكن اختلفنا مع وكيلكم .. على سعر السعي .. قلنا نكلمك اغديك تنزل لنا بالسعر شوي .. وحنا والله شارينك أنت .. والفلوس تروح و تجي .. << عاد أنا دورني هههههههههههههههه ..

قلت له بكم عارض عليكم الفلل ؟ << مهب هين هالهامور ذذ

قال الله يحيك بـ 00000 # للفلة ..<< أنا غصيت بريقي .. عاد يقال لي إني مشغول ...

قلت شف يا استاذ فلان أنا والله موكل الأخ محمد وكل شيء عنده تعرف الواحد يالله يفضى هالأيام .. و أنا متفرغ لدراستي .. وما أحب أشغل بالي بهالأمور .. لكن أوعدك خير .. راح أكلمه ومايصير خاطرك إلا طيب .. <<<< أروح وطييييي

يوم صك السماعة .. وأقعد أحسبها .. و إلا الدعوة جد .. عاد رحت أهوجس .. لو أن هالفلوس لي حقيقة .. وش بسوي ..

الصراحة وجه الفقر مستحيل يفكر بشيء بعيد .. أول مافكرت .. فكرت أتخلص من الكورولا .. قلت وش بسوي ؟

بروح للثمامة .. وبشوف لي حدا هالمخيمات .. وبعطيهم الكوكو و أقول لهم إذا بغيتوا توصفون لأحد شبوا فيها وقولوا له ترانا عند السيارة الي تشتعل نار ..

ثم بروح أشتري لـ أبو سحلب كورولا جديدة .. و بشتري لـ برعم كرسيدا نظيييفة .. أما أبو صالح ياحبي له .. بشتري له حوض 2006 .. ومعه طقم جنوط لكزس مكحلة و طقم جنوط وش يسمونه مغطسة .. وبروح لم مغسلة خالد .. و أقول له شفتوا هالأطخم .. دوكم مية ألف .. صيجوا له موتره ليل نهار .. عاد بالنسبة للتغبيرة أنا الي بغبر له موتره .. صح إني يبي يهوشن لكن الشكوى لله ..

وبروح لم فافافوم ( محل عطورات ) وبشتري لمباري أنواع العطور .. ثم بشري له كم من شماغ ..

اييه وبروح لم وكالة لكزس وبشري لـ رايق جنوط 430 جي اس علشان يركبها على موتره ..

ثم بشتري المعالي من أبو عمر .. و أول شيء أسويه أحذف العاصمة .. وأحدد المشاركات في كذا قسم ومنهم جنوب أفريقيا..


علشان مو كل من طقه راسه ولا حكه ظفره نزل موضوع :P


عاد خلصت كل هالحلوم بساعة و عدت لحياتي الطبيعية ..

بعد شهرين كذا .. دق علي خالي وينك ؟ قلت والله توي طالع من الجامعة .. قال طيب تعال لي أنا في بنك الجزيرة فيه شيك باسمك وعيوا يصرفونه لي .. لازم تجي أنت ..

يوم جيت .. دخلت البنك .. وكل من يشوفني يقول وش يبي ذا شكله مضيع يحسبه بنك الراجحي ذذ

شوي و إلا مدير الفرع قامز بوجهي .. هلا وغلا .. حياك الله في بنكك طال عمرك .. تفضل من هنا.. يوم جيت لم الصراف .. قام يتعذر مني الصراف .. يقول لي .. طال عمرك معليش كلفنا عليك .. لكن هذي إجراءات أمنية .. والي مايعرفك ما يثمنك ذذ

قلت طيب وش السالفة الحين ؟ قال بس نبي توقيعك طال عمرك .. والله و أشخط لهم .. عاد ماشفت كم المبلغ ..

و أطلع من البنك .. بعدها صار يدق علي خالي .. و أجي أوقع و أمشي .. و ما اشوف كم المبالغ ..

المرة الأخيرة .. الصراحة بغيت انهبل .. إلا انهبلت .. دق علي خالي قال تعال لي في فرع بنك الرياض ..

البنك استقعد قال لازم نفتح لصاحب الشيك .. حساب عندنا .. التفت علي خالي قال خلص الإجراءات أنا ماشي عندي شغل ..

قال لي الموظف تعال معي .. ثم دخلني على مدير الفرع .. إلى الحين و الشيك ماشفته ..

يوم شفته .. الغصة الي بحلقي يوم يكلمني راعي الشركة العقارية تحركت ههههههههههههههههههه

عاد الفرع كان فرع حي النسيم ذذ

اخذت الشيك ورحت فرع الريان .. ياحبيبي معي شيك بمبلغ فيه أكثر من #### مليون ريال .. و افتح حساب بفرع النسيم ..

رحت لفرع الريان .. عاد تكشخت وتعطرت .. وسيارتي ماوقفتها عند باب الفرع ذذ لا بعدتها شوي ..

وشف الإستقبال الي وش زينه .. والكلام المعسول ذذ

والله ياني خقييييت .. نويت اسحب على خوالي وعلى الي جابهم .. الدنيا فرص .. والي يبي يعيش شريف يبي يتعب ذذ

خلنا نخربها مرة و ثم تضبط و تزين الأمور ..

وفتحت عندهم حساب ذهبي وبطاقة ذهبية وش زينها .. ايه على طاري الكلام المعسول .. قبل لا أدخل الفرع رحت للصراف العادي يقال لي متواضع قلت بفتح حساب قال لي لازم تعريف عمل .. ويوم وريته الشيك وهو ينهبل .. عاد جاني بعدين و أنا جالس عند المدير يقول لي يا ابو عبدالله نخدمك من عيوننا من يوم تدخل الفرع لين تطلع
ههههههههههههههههههههههههههههههه
ام النصب ياشيييخ ..

عاد أنا أعجبتني الشغلة .. قلت خلن افتح حسابات ذهبية بهالبنوك .. لزوم التكشخ ..

و أروح لم البنك الأهلي .. ياعيال والله إني خقيييييييييييييييييييييييييت مع تعاملهم ... فتحت عندهم حساب عادي وقلت للموظف أنا معي مبلغ كذا و كذا .. تفتحون لي وسام ذهبي ؟ وتطلعون البطاقة بنفس اليوم ؟ قال ايه وش دعوة .. << من حقي اتشرط

عاد قلت طيب تبي تجيكم اليوم حوالة على حسابي هذا .. اليوم إن شاء الله .. قال طيب ننتظر << وهو يضحك في نفسه يقول وش هالبزر ذذ

المهم وصلت الحوالة .. دقيت عليهم قلت والله ياشباب بدون اعرف باسمي ولا اقول كم رقم حسابي على طول عرفن الموظف .. قال لي حياك الله أبو عبدالله ترا الحوالة وصلت وحياك للفرع نخلص إجرائتك قلت يالله أنا جايكم ..

تخيلوا ياشباب مدير الفرع بكبره يستقبلني عند الباب اي والله ذذ

هلا هلا هلا والله وغلا .. عاد سلم علي وعرف بنفسه ثم دق جواله ورد عليه وهو ماسكني بيده اليمين و دخلت أنا وياه قسم الوسام وهو يمشي والناس كلها تطالع ذذ

وش ذا البزر المطنوووخ ..

والله ويفتحون لي حساب .. عاد إنا يقال لي متواضع قلت تراي ابي حساب ذهبي ما أبي بلاتيني طبعاً البلاتيني أفضل ..

اليوم الثاني رحت أنا و الأخ رايق لنفس الفرع و معنا جزء بسيط من المبلغ كاش .. علشان نحطه بالحساب ..

صورت لكم الفلوس و البطاقات ..


الرابط الأول

الرابط الثاني


أنتم الحين وش تشورون علي به ؟

أنحاش بالقروش مثل ماقال لي جدي ؟
و لا
أروح الصحافة أبني لي قصر و أعزم خوالي زي ماقال لي رايق ؟
ذذ

>-

[[ .. رايق .. ]]

هذا الرد محجوز لرايق

:P

ـ ـ ـ ـ ـ ـ ـ ـ ـ ـ ـ ـ ـ ـ ـ ـ



يا عيني ياللي .. يا عيني يا ترللي .. .. واحد منهم نزل موضوع يا ساتر يا ساتر .. !
والله يا عالم ما تدرون وش قد انا مبسوط انتم ما تدرون وش قد الموضوع هذا جلس بالمفكره ؟
انا اتوقع اكثر موضوع كان متواجد بالمفكره موضوعه ولا بعد اكثر واحد بالعالم يتأجل موضوعه انتم ملاحظين ان سواليفه على مستوى الاشهر يعني يقول خالي دق علي بعد شهرين ورحت للمحكمه قبل شهرين تراه من يوم راح للمحكمه وهو يكتب الموضوع .. ومن يوم طلع من المحكمه وهو داقن علي يقول عندي لك موضوع قووووي هههههههه حتى اني بالايام الماضيه قلت له عبدالكريم اذا بغيت تعلمني انك خلاص تبي تنزل الموضوع دق واقطع انا بفهمها على طول .. !

من فترة وودي أكتب موضوع بالديوانية بس ماش مافيه لياقة تساعد

الظاهر ان لياقتك مثل لياقه ماجد له شهرين يتمرن واخرتها 10 دقايق لعب وطاح مرتين .. !
ولا بعد الظاهر انك من شهرين كل يوم سطر

عاد هالأيام صار لي كم من موقف و أستفدت في حياتي من كم من درس وعندي كم من شغلة حبيت أدردش معكم فيها ..

مشكله طلاب المكتبات عبدالكريم الدرس ترى مدته نص ساعه ما نبي الشباب يملون وتكفا خل الدرس اخذ وعطا ما نبيه بس القاء .. !
واذا فيه توزيع توكس ولا مارس .. !

اقول عبدالكريم ما تلاحظ انها عدة مواقف وعده دروس واخرتها كاتب موضوع واحد يعني لازم تسوي زحمه .. !

أدردش معكم فيها كـ شبابـ عاقل واعي ، فـ الدنيا إفادة و إستفادة .. و حياة المرء محطات إن أحسن التزود منها بلغ مايريد .. منذ أيام بسيطة كنت أسولف مع واحد من الحبايب ما أدري وش جاب الطاري ، قال أنت أصلاً مستباح العرض .. بـ معنى كلامه طبعاً .. قلت لهالدرجة ! قال و أكثر .. لدرجة أن وصل الأمر إلى القذف .. لست هنا للدفاع عن نفسي .. لكن أحببت أن أقول أننا لن نحاسب عن أفعال الناس .. إنما نحاسب على أفعالنا نحن .. لنعيش حياة طيبة بقلوب صافية .. إن حصل شيء من الخلاف مع شخص ما .. أتمنى ألا يتسع ويصل للغيبة و القذف .. سئل النبي صلى الله عليه وسلم أي الناس أفضل؟ قال : " كل مخموم القلب صدوق اللسان " قالوا: صدوق اللسان نعرفه فما مخموم القلب؟ قال: " هو التقي النقي، لا إثم فيه ولا بغي ولا غل ولا حسد " كلامي غير مرتب لكن حسبي بأنه من القلب للقلب ..

عبدالكريم

[ واللبيب بالإشارة يفهم ]

و الصراحة ياحبي لرايق كان منتشلني من حالة الفقر تهي تهي ..

وش دعوى والله لو اني لاقيك مجدوع بدعسوق بين بيوت النسيم .. !
تراي طالب مثلي مثلك حتى ما معي قيمة جوال آي فون هذاي اشحذ ابوي وامي .. وامي تقول عطل واعطيك هدية النجاح جوال .. ! <-- حسيت اني بالمتوسط وطاف ابي اهلي يشرون لي جوال خخخخخخخخخخخ

السلام عليكم .. وعليكم السلام .. حياك الله أبو عبدالله كيفك إن شاء الله بخير ؟ .. طال عمرك معك فلان الفلاني مدير شسمه بشركة الفلان العقارية .. الله يحيك فللكم الي بحي الحمراء .. عندنا لها زباين جاهزين .. لكن اختلفنا مع وكيلكم .. على سعر السعي .. قلنا نكلمك اغديك تنزل لنا بالسعر شوي .. وحنا والله شارينك أنت .. والفلوس تروح و تجي .. << عاد أنا دورني هههههههههههههههه .. قلت له بكم عارض عليكم الفلل ؟ << مهب هين هالهامور ذذ قال الله يحيك بـ 00000 # للفلة ..<< أنا غصيت بريقي .. عاد يقال لي إني مشغول ... قلت شف يا استاذ فلان أنا والله موكل الأخ محمد وكل شيء عنده تعرف الواحد يالله يفضى هالأيام .. و أنا متفرغ لدراستي .. وما أحب أشغل بالي بهالأمور .. لكن أوعدك خير .. راح أكلمه ومايصير خاطرك إلا طيب .. <<<< أروح وطييييي

الحين يا وجه الفقر يا كريم ساكنين بالنسم وخوالك بالنسيم وعمانك بالنسيم وبانين فلل بالحمراء وتبيعونهن عالعالم :/
ياخي دام الفلل الحين باسمك رح بعهن على خوالك واسكنوا انت واهلك .. ولا اقول لا لا تزوج اربع حريم مره واح\ه وسكّن كل وحده ببيت ولا اقول وراه ما تزوجن بس ونسكن انا وياك جمب بعض طبعا نبي نسحب عالجامعه بلا حاسب بلا معمل بلا هم .. الصراحه نبي نفقد المعمل بس ما عليك نجيب المعمل ونحطه بين بيوتنا .. ! <-- عبدالكريم تذكر يوم نجلس نحسب لو معنا مليار كم نب نصرف بالشهر طلعت نصرف مليون بالشهر ونعيش على المليار 100 سنه آآآآخ بس والله وجيهنا فقر فقر ندرس 5 سنين واخرتها نطلع على 10 الاف راتب ولا بعد اقل :/

الصراحة وجه الفقر مستحيل يفكر بشيء بعيد .. أول مافكرت .. فكرت أتخلص من الكورولا .. قلت وش بسوي ؟ بروح للثمامة .. وبشوف لي حدا هالمخيمات .. وبعطيهم الكوكو و أقول لهم إذا بغيتوا توصفون لأحد شبوا فيها وقولوا له ترانا عند السيارة الي تشتعل نار ..

عندي لك فكره احسن يا عبدالكريم اسمعني شفت يوم تقول ليت معي كابرس تسعاوي عشان اطير السيكورتيه حقين الجامعه نسوي مثل ما سوينا ذاك اليوم نجمع السيوكرتيه كل ابوهم ونلغم السياره و و و شسمه بووووووم <-- رايق لا تشوف فلم اكشن وتجي ترد بالمعالي الله يرحم والدينك

ثم بروح أشتري لـ أبو سحلب كورولا جديدة .. و بشتري لـ برعم كرسيدا نظيييفة .. أما أبو صالح ياحبي له .. بشتري له حوض 2006 .. ومعه طقم جنوط لكزس مكحلة و طقم جنوط وش يسمونه مغطسة .. وبروح لم مغسلة خالد .. و أقول له شفتوا هالأطخم .. دوكم مية ألف .. صيجوا له موتره ليل نهار .. عاد بالنسبة للتغبيرة أنا الي بغبر له موتره .. صح إني يبي يهوشن لكن الشكوى لله .. وبروح لم فافافوم ( محل عطورات ) وبشتري لمباري أنواع العطور .. ثم بشري له كم من شماغ .. اييه وبروح لم وكالة لكزس وبشري لـ رايق جنوط 430 جي اس علشان يركبها على موتره ..

ينعن بليسك معك ملايين وتشري لي جنوط انت الظاهر ما شفت المقطع ذاك الي صرف لكل واحد vx-r .. وبعدين كلهم سيارات جديده واحسن من سياراتهم الي قبل انا ابي 460 طيب طط <-- يا شين الي طقته الغيره !
صدز ما تعرف الكرم !
اهم شيء يا عبدالكريم اذا بغيت تشري كراسيدا لـ برعم لازم تفصل مراتب تكون مفتوحه من ورا لزوم الشسمه .. !

اما ابو صالح .. انت ملاحظ انك صارفن عليه اكثر من الي صرفته علينا .. هو موتر و100 الف لـ المغسله وانا جنوط .. .. والله من جد يا عبدالكريم .. هو صح انك ما تقدر تعدل بيننا ولو حرصت بس ياخي تخيل اننا حريمك ياخي واصرف علينا بالعدل موب انا جنوط وسليمان سياره ومغسله .. (>_<) .. !

عبدالكريم عندي اقتراح لك بدال ما تعطي ابو صالح سياره عندي لك شيء يبي يونسه زياده جب له ابو بسه ذاك <-- ابو صالح اسحب كلامي والله اسحبه !

ثم بشتري المعالي من أبو عمر .. و أول شيء أسويه أحذف العاصمة .. وأحدد المشاركات في كذا قسم ومنهم جنوب أفريقيا.. علشان مو كل من طقه راسه ولا حكه ظفره نزل موضوع :P

اهم شيء يا عبدالكريم تكنسل عضويه خوينا ووش بعد ايوه تخليني المدير التنفيذي اهم شيء اهم شيء تسحب عضويات الوسام من بعض الناس لانهم غثونا بالمخفي .. ! <-- انا مدري ليه ننغث اذا درينا ان فيه واحد مخفي داخل الموضوع انا عن نفسي الظاهر لان خوالي قصمان ومعروفين باللقافه يعني بي عرق لقافه

جاني امر طارئ بالخروج فورا .. لكن يا عبدالكريم تراك ما قلت سالفة الشايب الي حبيت راسه ببنك الرياض والبطاقه الذهبيه الي تلق لللللللللق

موضوعك راقي يا واحد منهم لي عوده ان شاء الله (^_^)

|||||| رايق ||||||

وش رايكم يا مشرفين تدمجون ردي هذا لردي الاول ما ودي يضيع علي الحجز

[biomedical]

لقد إنني ممتن لك طال عمرك

[أشقراني]

موضوعك خبل ,, بأرجع ثانية أرد عليك ان شاء الله


ترقب الرد النااااااااااااااااااري : )


لك منّي ود وورد وحبة هيل : )

[آبو يآسر]

قصم أنك نفسيات أنت وإياه

أجل تسأله وش هاذي

أقول وش رأيك تصير صقيقي

إلا على فكره تصدق ما فهمت شي من سالفك



..,

[أبـو صـالـح]

هلا والله بصديقي ورفيق دربي ..

هلا باللي ياما وياما تقاسمنا السندوتشات اللي بـ الكفتيريا بآخـر الشهر قبل ما تنزل المكافآت

<<<<< عاد تخيل عبدالكريم ياكل شي من عقب أحــد .. واااااااااااااااااااااوك يموت ولا ياكله تعرفون طبعاً بدوي ولد نعمة .. ما يشتهي


إيه يا كريّم .. والله يا هالموضوع ذا مرّ بحالة مخاض يالله يالله أنولد ..


لكن بصراحــة أنه يستاهل .. أما الألوان شي ثااااااااااااااااااااااااااااااااااااااا اني .. أحس ذكرتن باللي شفناهـ قبل كم يوم ..

يوم طلعنا من المطعم اللي وشسمه ذاك اللي كله تلاوين <<<<<<

المشاركة الأصلية كتبت بواسطة واحد منهم -< بسم الله الرحمن الرحيم صبحكم الله بالخير ياشباب .. أول شيء أبارك للمشرفين الجدد .. الله ينفع بهم ! من فترة وودي أكتب موضوع بالديوانية بس ماش مافيه لياقة تساعد .. عاد هالأيام صار لي كم من موقف و أستفدت في حياتي من كم من درس وعندي كم من شغلة حبيت أدردش معكم فيها .. أدردش معكم فيها كـ شبابـ عاقل واعي ، فـ الدنيا إفادة و إستفادة .. و حياة المرء محطات إن أحسن التزود منها بلغ مايريد .. أحببت أن أقول أننا لن نحاسب عن أفعال الناس .. إنما نحاسب على أفعالنا نحن .. لنعيش حياة طيبة بقلوب صافية .. إن حصل شيء من الخلاف مع شخص ما .. أتمنى ألا يتسع ويصل للغيبة و القذف .. سئل النبي صلى الله عليه وسلم أي الناس أفضل؟ قال : " كل مخموم القلب صدوق اللسان " قالوا: صدوق اللسان نعرفه فما مخموم القلب؟ قال: " هو التقي النقي، لا إثم فيه ولا بغي ولا غل ولا حسد " كلامي غير مرتب لكن حسبي بأنه من القلب للقلب .. >-

الله الله وش الكــلام الحلو ذا ؟

والله يا عبدالكريم انا أتفق معك اننا لسنا محاسبين مع أفعال الناس .. لكننا مسؤولين أمام ربّ العالمين عن الأشياء اللي فيها خطأ ولا نحاول نعدلها .. <<< وأقصد في كلامي الأشياء التي تمس أمور الديــن ..

" كنتم خير أمة أخرجت للناس .. تأمرون بالمعروف وتنهون عن المنكر "

المشاركة الأصلية كتبت بواسطة واحد منهم -< أما أبو صالح ياحبي له .. بشتري له حوض 2006 .. ومعه طقم جنوط لكزس مكحلة و طقم جنوط وش يسمونه مغطسة .. وبروح لم مغسلة خالد .. و أقول له شفتوا هالأطخم .. دوكم مية ألف .. صيجوا له موتره ليل نهار .. عاد بالنسبة للتغبيرة أنا الي بغبر له موتره .. صح إني يبي يهوشن لكن الشكوى لله .. >-

يا أخي أنت من وين طلعت لي يا أخي


وهـ بس يا كريّم .. تسذا تخلين أسوي أشياء مهوب كويسة


يعني يمكن .. ولا يمكن ..

أو حتى يمكن ..!!!


مير والله يا أنا أستحيت يوم تقول لهم الأطخم .. حسيت أني صدزي ..




<<<<<<< لمـعرفة النص الأصلي قدّم أوراقك على الإيميل :abu_saleh_06@hotmail.com ..!



ولي عودة لكن أبروح لأمي هيلة

[برعم]

و بشتري لـ برعم كرسيدا نظيييفة

كروووم أبي فراري زي اللي بنيدفور سبيد لأني من أمنياتي بالحياة أني الأمس فراري

[برعم]

عبدالكريم خوالك مايبون واحد يجي من العصر يسولف عليهم لين العشا

ثم بعد العشا يطربهم لين الفجر وبعد الفجر يزبط لهم الفطور ويوديهم لدواماتهم وإذا ممكن يداوم عنهم داوم

ها يبون واحد زي كذا

ومن مميزاته يجيد المساج والرقص والجنمباز ..

[شُـــعـــيـــب]

اثر العمارة اللي انا سايمها باسمك ...؟؟


يالله عاد ابو عبدالله اجدعلنا شوي من قيمته تراي رجالن شراي ...

وترى سومتي اربعه مليون والسعي علي ...


وش قلت ...








حلم ابليس بالجنه



........................................ ........................................ .

ابوصالح ...

هذا النص قيل في الشيخ ماضي ... اذا بغيت تقوله لأحد غيره لازم تأخذ الاذن منه

[أشقراني]

أوّل شي ..


أسأل الله تعالى أن يجعلنا جميعاً من الذين صفت قلوبهم من كل حقد وبغضاء للمسلمين ..!


ومن الذين تحابو في جلال الله سبحانه ,.,


..................................
............................
.....................
.............


ثاني شي


على سالفة خالك ..


أنا أبي أفهم .. انت ليش مسوّي في أمّها انك بزر


قسم بالله الي يشوف خشتك يعطيك بالثلاثين


خاصة إذا استشورت لحيتك


وعلى طاري الدراهم , أنا أقول لك /


][ كلٌ يعمل بما عُرفت به قبيلته ][


فعلى هذا المثل .. افعل ما بوسعك أن تفعله من النذالة المطلقة

وانتف ما تستطيع من دراهم خالك الكاااش

وإذا أشكل عليك شي , تراي أنا بأصير مستشارك الخاص



لك منّي ود وورد وحبة هيل : )

[أبـو صـالـح]

عجبٌ عجب ..!


هالحين وشلون رايق يرد على الموضوع .. وأسمه مهوب موجود بالصندوق حق اللي قرؤوا الموضوع !!!!

مع أنه ما معه عضوية ..!!


هل هذا يعني أنّه ..!

[أشقراني]

المشاركة الأصلية كتبت بواسطة أبـو صـالـح عجبٌ عجب ..! هالحين وشلون رايق يرد على الموضوع .. وأسمه مهوب موجود بالصندوق حق اللي قرؤوا الموضوع !!!! مع أنه ما معه عضوية ..!! هل هذا يعني أنّه ..!

اي والله صدقت !


هذا من زود الإخلاص بالمحبة


يحجز لخويه من دون ما يدخل للموضوع


<<<<<<<< فصل أولى ألف



لك منّي ود وورد وحبة هيل : )