:::. احـــــــــــــــراج !! .:::

[[.. هُـ م ـام ..]]

يكفيك أن تقول في هذا أنه|((منافق))..

[أبو أســـ 9 ــامة]

بالنسبة لي
إذا واعدت احد بمكان عام مثل المقهى او الكورنيش اوغيرها
في الغالب التزم بالموعد ممكن اتاخر عشر دقائق مهب اكثر من كذا
لكن إذا وعدته امر عليه بالبيت وخاصة لاكنت امون عليه اسحب عليه
ساعة او ساعتين مهب مشكلة
يعني اقول هو بالبيت مهب مشكلة لا تأخرت عليه ولايزعل علي لأني امون عليه
اعرف واحد لو اجمع كل اللي اسمهم ابو ركبه بالدنيا
ماصاروا مثله عليه ركب مهب طبيعيه

[مليح السجايا]

المشاركة الأصلية كتبت بواسطة نبض القلم ماشاء الله .. أخونا مليح راضي علينا ..ولله الحمد مقالات في الصميم وطرح لمشاكل المجتمع .. بأسلوب مليح الذي لا يتقنه غيره .. موضوعك هذا بالذات ذو شجون .. أو شؤون .. او ما تريد .. فبعض الناس من السهل عليه أن يعطيك موعد يعلم بالتأكيد أنه لا يستطيع أن يأتي فيه .. فتلغي ارتباطاتك .. و مشاويرك .. ثم ببساطة لا يأتي .. وليته لا يعتذر لأن عذره يرفع الضغط أكثر من تطنشيه لموعدك .. لكن ما العمل مع هؤلاء ..؟؟ لا تقــدر تخسرهم عشان موعد ... ومن الصعب تتحملهم وهم بهذا الأسلوب .. فياليت تعطينا طريقة نتفاهم معهم .. من واقع خبرتك التي جعلتك تفتح هذا الموضوع ... وتطرح هذه المشكلة .. ........

اهلا وسهلا بنبض القلم ..

كيف لا ارضى وقد اضأتم لنا (( خرابيطنا )) بأنوار حروفكم الجميلة ..


اما عن الغاء بعض المواعيد من اجل اشخاص معينين .. فهذه كثير جدا ..

منذ فترة قريبة .. صرت اذا نبي نتقابل اخلص جميع اعمالي الخاصه .. اذا كان هناك اعمال ..

وليس لدي اي استعداد ان اعطل شي من اجل (( جلسه ))

الجلسه لاحقين عليها .. رغم اشتياقي الكبير للقائهم ..

وفي الوقت الحاضر .. صرت اذا متواعد مع واحدن من هالثلاثة اواعد معه اثني والا ثلاثة .. لأني في الغالب ضامن عدم حضورهم .. هق هق ترا الذهانه بعضات المرات .. تشتغل صح .

هذه بعض الحلول .. المؤقته ..

والا فهو مرض عضال لا ولا يتشافى منه المريض الا اذا اخذت لك عجرا وتمردغت في حوض بطنه

[مليح السجايا]

حتى تعرفون مرادي بالضبط ...

في مجمل كلامي .. لا الومهم على انهم لم يأتوا ..مثلا


يتعرض الشخص في بعض الاحيان لضروف لا يستطيع الافلات منها ..

ولكن ان يدعك بدون علم او خبر .. فهذا هو الغير مقبول ..

مثلا ..

واحد كنت انت واياه متواعدين تبي تروحون لمكان ما ..

وهو في الطريق اليك (( بنشر )) عليه الكفر ..

بعض الناس .. يوسع صدره ويمكن ياخذ له ربع ساعة او اكثر في تغيير الكفر ..

ولا يعطيك خبر انه تعطل ..

يعنى انا احيانا اذا صرت مواعد لي واحد .. وتأخرت مثلا في الطريق لسبب ما .. اتصل عليه واخبره ان المشكلة كذا وكذا ربما اتأخر عليك ..

[مليح السجايا]

المشاركة الأصلية كتبت بواسطة عاصمة المعالي **** أدام الله رضاكم على العاصمه لتخصوها بمواضيعكم. إدارة العاصمة ****

اشكر لكم ختمكم ..

شرف لي ..


ختم الله لنا ولكم بالأعمال الصالحة ..

[بُحـور]

هؤلاء يؤمنون بـ ( اللامبالاة )

تلك قاعدة أساسية عندهم . . .

لكن بالنسبة لي .. إذا اعطيت أحداً موعداً فإني اتواجد في المكان المحدد قبل الموعد بفترة وجيزة ..

لأكفيه عناء الإنتظار ..

شكراً لكم .. طرح رائع ..

[دريم ويب]

حتى تعرفون مرادي بالضبط ... في مجمل كلامي .. لا الومهم على انهم لم يأتوا ..مثلا يتعرض الشخص في بعض الاحيان لضروف لا يستطيع الافلات منها .. ولكن ان يدعك بدون علم او خبر .. فهذا هو الغير مقبول ..

المعذرة اخونا مليح السجايا

الموضوع هذا كما يقال ذو شجون

والكل مرت عليه مو اقف متفرعة من قضية عدم الوفاء بالواعيد ((((سواء بقصد ولا من غير قصد )))))

اما من غير قصد فهذا كما ذكرت لا لوم عليه (((((أتوقع خارج عن الموضوع )))))

لكن المصيبة اللي بقصد وعن ومع سبق الأصرار والترصد

يعني انسان كما نطلق عليه عاميا

مهين وعديم الأحساس

وبعدين بعض الناس الله يهديهم خلاص ترسخ في الذهن هذي الصفة عنهم من كثر مايسوونها

يعني متعود الله يجزاه خير ....


وصفة عدم الحرص وعدم الدقة في المواعيد اعتقد انها ماراح تزول منا مترسخه فينا مهما قلنا

وأتذكر كلام أستاذه لنا عن الغربيين تقول عن أمرأه عاشت في بلادهم ((احترامهم للوقت عجيب ودقتهم متناهية

اذا أعطاك موعد فاجزم انه بيجي الا اذا ((( مات )))))عاد عذره معه ......

عموما ....أكرر شكري موضوع قيم وله تفرعات

[مليح السجايا]

المشاركة الأصلية كتبت بواسطة Bluetooth King °°°°°° هذي يسمونها بالمصطلح العربي .. (( الطقرة )) .. --- عموما .. يقال أن الإلتزام بالمواعيد من شيم العرب .. كما قال عليه الصلاة والسلام في نبذ صفات المنافقين .. لكني اعتقد أن المواعيد الأوروبية .. أصبحت هي المصطلح أو الجملة التي تطلق للشخص لكي يأتي في موعده المحدد بالدقيقة .. لا بل بالثانية .. يؤسفني كثيرا كعربي أن مواعيدنا تكون عار علينا .. أخيرا .. أشكرك ع.أبوفهد على ماتفضلتم به .. وجعله الله لنفع الناس .. وفي ميزان حسناتك .. وربي لايحرمني منك .. °°°°°°

(( الطقرة )) اي السهجه ..

صحيح .. مشهور عن العرب في وقتنا الحاضر عدم الالتزام بالمواعيد ..

الاوربيون ايضا .. نفس الكلام ..

الفرق بيننا وبينهم ان رجال الاعمال والشخصيات المهمه عندهم في الغالب انهم انضباطيين من ناحية المواعيد اكثر من ربعنا .. وبمراحل ..


تحياتي لك يابرقركنق

[مليح السجايا]

المشاركة الأصلية كتبت بواسطة ريتاج الصراحة بعض الناس طبعهم غريب يعني انا مثلا من النوع اللي مايرتاح قلبي اذا مواعدة احد خصوصا اذا في السالفه طلوع من البيت يعني احسها عيب وقلة ذوق اني أفوت الموعد لكن سبحان الله فعلا أواجة ناس من هالنوعيات انواع البرود (( الله يهدي الجميع )) ياليت لو امتلك ربعه عشان اعرف كيف اتصرف معهم وسبحان الله اعتبره عدم تقدير للمسؤليه خلاص منتب موفي بوعدك لا تواعد من اصله ليش تشق بخلق الله ولا انسا وحدة من زميلاتي واعدته اني بزورهم وداني اخوي لقيت الباب مفتوح توقعت انها فاتحه الباب ( الله من قل ماسوته ) تطمن اخوي وراح دخلت واثر مافيه احد بالحوش طلعت الشارع اخوي راح (( ورطة )) رجعت مره ثانيه المشكلة خفت لا يطلع لي رجال من بيتهم طقيت الباب حق البيت الداخلي اشوا فتحوا ماتسوا علي هالزيارة طاح قلبي ومت من الخوف يوم فتحت الله يجزاه خير وتهلي وترحب سالته وينتس مالقيت احد قالت والله ماتوقعت انتس بتسوينه وتجين ......لا والله انواع القهر عاد الله المستعان مواقف ماود الواحد يتذكرة لكن الصراحة موضوع بالصميم وجزاك الله خير

خخخخخخخخخخخخخ تصورت الموقف


انا من الناس اللى (( ولله الحمد )) اذا كنت متواعد مع احد .. اشتب الين اوصل قبل الموعد اقل شي بخمس دقايق .. هذا في الغالب طبعا ..

اذكر مرتن من الايام كان فيه حريمات من اقارب زوجتي اتصلوا عليها .. يبي يتقهوون عندها .. >> والا الرجال مسحوبن عليهم

جا الموعد وهم ما جوا ..!!

وتأخروا كثيرا ..

دقينا عليهم .. وينكم يا ام فلان ..

قالت ابد والله بس جانا ضيوف بيسلمون على امنا ويطلعون ..

طيب في هالحالة وش يضرهم لو اتصلوا وقالوا ترا صار كذا وكذا ..
على الاقل نرتاح نفسيا ..

[مليح السجايا]

المشاركة الأصلية كتبت بواسطة المصمم فرحان موضوع رااائع تسلم لنا يامليخخخ بس وش العلاااج؟؟!!

مليخن يملخ العدو


الرائع وجودك يامصمم فرحان ..

انا قلت لنبض القلم الحل ..

راجع ردي عليه

[طالب الحور]

المشاركة الأصلية كتبت بواسطة مليح السجايا اثناء ما كنا نتكلم .. سمعت صوت (( طنطن )) طلع صوت اللفت (( الأصنصير )) اللى في فلة الفيصلية .. قلت : والله ياخي مشكلة اذا صار الطريق زحمة والاصنصير توه ينفتح .. لالا ملهم حق ..

يا حليله خوينا ذا .. سلم عليه بالله

[/color]

[مليح السجايا]

المشاركة الأصلية كتبت بواسطة حبيبة امها اليوم اليوم كلمت خالتي وقلت لها بكلمك بالمغرب علشان اعطيك الماسنجر وتكلميني ضروووووووووووري قالت: خلاص كلمتها بالمغرب مافيه فايده ماترد مشغوله طيب ليش تقول انها بتكلمني وهي داريه ان عندها اشغال بالمغرب بس تمون هالمره لكن غيرها مافيه هم عارفين انفسهم اوريهم اقتراح بسيط : اذا تبي تادب الي يخلف مواعيده عطه موعد واذا قال خلاص جاهز للمكالمه ...................الخ طنش تعش تنتعش قله مشغول جايك 5 دقايق بس وخله يموت قهر علشان يتادب ويعرف غيره كيف يعانون اذا ما ضبطت الموعد ه وسلام

الحين تكلمين خالتك بالتلفون وتقولين لها تعالى للمسنجر ابيك ضروري

طيب وراك ما قلتي لها بالتلفون

على العموم .. انا قلت : ابوطبيع ما يغير طبعه حتى لو طنشته اكثر من مره ..

لأنه في الغالب .. باااااااااااااااااااارد

[مليح السجايا]

المشاركة الأصلية كتبت بواسطة m__3 مواقف مضحكة والناس اصحاب المواقف توهقوا فيك , غسلة شراعهم الكثير تعلم وهو صغير هذه المقولة ( ان حبل الكذب قصير ) وللمعلومية الكذب هو الكذب لا يتغير بتغير الاشخاص ولا (السي تشي ويشن) ! والكثير تعلم ان الكذاب سينفر عنه كثير ممن حوله ولو بعد حين شكرا على الكلام الحلو

كل شي فهمته بردك الا هذي (السي تشي ويشن)


شين يوكل ذا والا يشرب

[الرشيق]

بالنسبة لي شخصياً ونقلاً عن نفسي

في مواعيدي احاول قدر الإمكان مراعاة الوقت

موعد الساعة 6.30

يعني 6.29.59 اكون مطفي سيارتي

في حالة قدر الله علي بظرف

ادق اعتذر من اللي انا مواعده انه والله صار لي كذا

ممكن ترا اتاخر عليك

وممكن والله ما اقدر اجي

حسب الحالة

واحياناً اسوي العكس

اكون مثلاً معتذر عن اجتماع او استراحة

شوي اطب عليهم

بالنسبة لمواقف الجحدات فيه بعض المواقف ادت اني اقطع الشخص نهائياً ولا عاد اواعده

اذكر مرة واعدت ولد عمتي الساعة 4 العصر

ما جاني الا 8 العشا

[::واثق::]

موضوع جميل وعلى الوتر الحساس حقيقة ..

شكرا لك ..

[نبض ساخر]

والله منت سهل يا مليح

تعرف تختار مواضيع


والله موضوع على الجرح والكلام فيه طويل

أذكر أني دقيت على أحد المشائخ أسئله عن الي يسحبون في مواعيدهم

وكان جوابه :

هؤلاء على خطر عظيم ويتصفون بصفة المنافقين فعليهم التوبة من فعلهم

جزاك الله حير خبيبي

[لظى الأشواق]

المشاركة الأصلية كتبت بواسطة مليح السجايا سأعود اليكم بأذن الله تعالى ..

يا سلام يشتكي من ذي الحركات ويسويها

[مليح السجايا]

المشاركة الأصلية كتبت بواسطة هوجاس يالبيه يابو فهد على هالمواضيع.. ياخي صدقت بعض الناس يرفع ضغط بمواعيده... هذا غير مايسببه من مفاسد لايعلمها الا الله.. لكن انا قبل فترة بالرياض بصراحة وشهادة لله .... المبدع فقط هو من يعرف حق المواعيد... ويعرف كيف يتعامل معها.. اذكر لكم هذا الموقف البسيط.. وصلت للرياض واتصلت على المبدع عشان نتقابل في مكان ونروح نجتمع مع بعض الشباب.. احد الشباب قال مامعي صيارة (عفوا اقصد سيارة) قلنا نمر عليك... قال خلاص ربع ساعة وتعالوا دقينا عليه بالموعد وقال خلاص مروا علي ... المهم اللي صار الحبيب وصلنا لباب بيتهم ودقينا عليه جوال مرة وثنتين وبالرحمة دق المبدع عليه بعد ماجلست اطلبه ساعة يدق عليه.. ودق الثالثة مارد علينا.. وعلطول وبكل حزم مشا... تربية على الاصول... الداهية ان الاخ اتصل علينا يوم مسكنا الطريق العام... قريب من بيتهم والله.. والله قريب ماابعدنا يعني يمكن ثلاث دقايق بس.. ولكن ابى المبدع ان يرد .. وبعد الحاح ان يرجع قال والله ماارجع ... لازم نتعلم المواعيد.. وبعد مطالبات دق عليه وقال له حنا بالمكان الفلاني شف احد يجيبك.. لله درك يالمبدع... فن من فنون التربية.. ولعل المبدع يذكر لكم مواقف اكثر من هالقبيل... ........... اكرر شكري لك ابو فهد...

هلا وغلا ياهوجاس ..

حقيقة .. ما اجعجبني بالمبدع الا الدقة في مواعيده .. والا الباقي مافيه شي زين

قد يعود لعدة اسباب .. ان المبدع في الغالب ماعنده ارتباطات ..

ولكن ..

اذا واعدك وصار عنده شغل .. يدق عليك ويقولك .. ما يخليك مربوط معه ..

وهو من الناس اللى يعجبوني من هالناحيه ..

يعنى اذا بغى يمرني بالبيت .. اذا صار عند الباب يتصل ويقول : تراني عند الباب ..

مهب مثل بعض الناس اول ما يطلع من بيتهم يقول تراني عند الباب همن انطق بالشارع وانا انتظره

[مليح السجايا]

المشاركة الأصلية كتبت بواسطة عابد الحرم صدقت والله

المشاركة الأصلية كتبت بواسطة أبو البراء المكي لا تعليق !!!

المشاركة الأصلية كتبت بواسطة الفتى الوديــ؟ــع الله يخلف.. .

اشكر لكما تواصلكما ..

ابوالبراء .. اصلا ما عندك شي تعلق عليه

[مليح السجايا]

المشاركة الأصلية كتبت بواسطة الرشيق كأني عرفت خوينا اللي بالسالفة الأولى الله يهديك بس يا ...ـــ ..ـــ ما يحتاج ذكر اسماء ذكرني يبو فهد اوريك جوالي عندي واحد مسميه ابو ركبة سماحة ابو ركبة يعطيك موعد عقب المغرب ويعطيني موعد ويعطي 10 اشخاص موعد بعد المغرب ثم يا يتنقى الوعد اللي يبيه يا يصفط كل المواعيد لي عودة مع بعض الجحدات لكن الآن مشغول شوي

اخويانا واجدين يالرشيق .. خصوصا راعي الفورد الذهبي

وواحد راعي اودي بعد هق هق هق ..

اجل نص اللى معي بالجوال من اعضاء الجسم

كلهم راعين ركب